Ibrani 3 - Sura Magali Nuntu Ngkatuwu

I Yesu meruu ngkabangke-A painaka i Musa 3:1-6

¹ Ee waʼa ngkasangkompo kita to Kerisitu anu roomo woʼu ndapeboo i mPue Ala! Koisa ndinawa-nawa mpodago kono i Yesu seʼi! I Pue Ala mampokau Sira da mewali Tadu mPanyomba Bangke ri agama anu takekeni seʼi.

² Sira todo ri Pue Ala anu roo mampakanoto Sira mangkekeni tetala setu, ewa i Musa woʼu owi todo mawianaka tetalanya ri Banua i mPue Ala.

³ Paikanya i Yesu singkana meruu da ndapantubunaka painaka i Musa. Maka tau anu mawangu banua inceʼe anu meruu ndapantubunaka pai banua anu nawangu.

⁴ Lawi pura-pura banua reʼe anu mangawangu, paikanya anu mawangunaka mpengaya-ngaya inceʼemo i Pue Ala ngkalio-A.

⁵ I Musa todo ewa toporioko ri raya Banua mPue Ala pai mamparata mpengaya-ngaya anu da ndapatongawa i mPue Ala ri reme anu nepa da rata.

⁶ Paikanya i Kerisitu todo ewa Ana anu makuasa ri Banua mPue Ala. Pai kitamo seʼi waʼa Banua i mPue Ala, ane todo kita ri peaya pai ri pompari-mpari, da mangarata nunjaa anu tapomata-mata.

Peosa tila ntau i mPue Ala 3:7–4:13

⁷ Inceʼe painaka, ewa pantoʼo Inosa mPue Ala, “Ane ri sandeme seʼi ndidonge oni nganga i mPue Ala,

⁸ neʼe boi ndipakapeni woʼomi, ewa powia waʼa ntau piamomi, ri pangaewa ntau seʼe i Pue Ala, mampebutuka i Pue Ala ri pada bone.

⁹ ‘Njairia waʼa ntau piamomi mampebutuka Yaku, pai maʼuji Yaku,’ pantoʼo i mPue Ala, ‘ntanoka nakitamo ntau seʼe ewambeʼi powia-Ku aopo mpuyu ntaʼu kasaenya.’

¹⁰ Inceʼe puʼunya painaka marau raya-Ku ri tau seʼe, Kutoʼoka, ‘Tau seʼe bareʼe bali-bali kabaleparunya, bareʼe napokono malulu waʼa ncongka-Ku.’

¹¹ Masengke raya-Ku painaka Kumontandokoro, ‘Tau seʼe bareʼe da mesua ri tana setu da naparata peosa sangkani-ngkani pai Yaku.’ ”

¹² Ee waʼa ngkasangkompo, da ndiendo-endoka neʼe boi reʼe sambaʼa tau ri oyomi anu ewanceʼe kajaʼa mponawa-nawanya, pai bareʼe meaya painaka siʼa metorobaka mampalaika i Pue Ala anu tuwu!

¹³ Mewali, da naka neʼe reʼe mau sambaʼa tau ri oyomi anu manawu ri raya ncalaa maewa i Pue Ala, mbolimo komi da mombepatiendo sandeme-sandeme ri sindara kita ntongo tuwupa ri tempo anu ndatoʼo “Eo Seʼi” ri Sura Magali.

¹⁴ Kita pura-pura inceʼemo yunu sampotetala i ngKerisitu, podoia kita mekekeni maroso ri peaya ndaya anu tapotumpu ungka ri pontepuʼunya.

¹⁵ Inceʼimo anu ndaʼuki ri Sura Magali, “Ane ri sandeme seʼi ndidonge oni nganga mPue Ala, neʼe boi ndipakapeni woʼomi ewa powia waʼa ntau piamomi meewa, ri tempo paewa ntau seʼe i Pue Ala.”

¹⁶ Mewali, isema ntano waʼa ntau anu madonge oni nganga i mPue Ala pai maewa Sira? Ara banya waʼa ntau anu nawawanaka i Musa anu mesuwu ungka ri tana Masiri?

¹⁷ Pai isema anu ndapokarau i mPue Ala aopo mpuyu ntaʼu kasaenya? Ara banya waʼa anu masalaa anu mate ri pada bone?

¹⁸ Ri tempo mpontandokoro i mPue Ala ewaseʼi, “Tau seʼe bareʼe da mesua ri tana setu da marata peosa sangkani-ngkani pai Yaku” – ara isema woʼu anu ndatinako ndaya i mPue Ala setu? Ara banya anu ndatinako ndaya setu waʼa ntau anu maewa i Pue Ala?

¹⁹ Seʼi-seʼi tarata ndayamo katau seʼenya bareʼe da naleʼo mesua, ua tau seʼe bareʼe meaya ri Pue Ala.