DANIELI 9 - Sura Magali Nuntu Ngkatuwu

I Danieli mampekakaika bancanya 9:1-19

^1-2 Ri taʼu kaʼisa poparenta i Darius to Media setu, ana i Ahasiwero ri kamokole Babeli, yaku i Danieli, mabasa-basa sura waʼa sura agama. Kunawa-nawa kono nuntu i mPue ri Nabi Yeremia, kota Yerusale damarua mpaliu ri raya anu papitu mpuyu ntaʼu.

³ Nepa mekakai yaku rikaliogu ndayaku ri Pue Ala, merapi kapuru ndayaa. Yaku woʼu mopuasa pai mampake rengko karu nepa kumotunda ri awu.

⁴ Mpengaya-ngaya salaa bancaku kupangakuka ri Pue Ala pueku. Kutoʼo, “Pue Ala, Komi bangke, pai kami mantubunaka Komi. Bareʼe bali-bali ndipangabangani janji-Mi pai mampatongawa kapande ndayami anu bareʼe kapuranya ri tau anu mampotowe komi pai anu mangawianaka nunjaa anu ndipesongkaka.

⁵ Kami masalaamo, kami mampowiamo jaʼa, pai mawianaka kasala. Kami maewamo pai malewamo songkami pai mebiamo ungka ri waʼa mpadika-Mi.

⁶ Kami bareʼe mampedongeka waʼa nabi, waʼa mbatuami setu, anu mompaumo mamposabi toʼomi ri waʼa mokole mami, ri waʼa ntopombawanaka mami. Waʼa ntau piamo mami pai ri pura-pura banca mami.

⁷ Boo Pue, powia-Mi sintinaja pai mayoa, paikanya kami bareʼe bali-bali mampareʼe ea mata ri koro mami, inceʼemo kami pura-pura anu meari ri Yudea, pai ri Yerusale pai pura-pura kami anu sambaʼa-mbaʼa banca anu ndiwuragamo ri suo-suo ntana anu lawa bara anu mosu ua tau seʼe bareʼe mepoʼinaya ri komi.

⁸ Waʼa mokole mami, waʼa ntopombawanaka mami pai tau piamo mami mawianakamo waʼa anu mepakaea pai mowiamo salaa ri komi, boo Pue.

⁹ Komi buke puru ndaya pai kapande ndaya, seʼi kami maewamo Komi.

¹⁰ Kami bareʼe mampedongeka oni ngangami, boo Pue Ala pue mami, ri tempo ndapampokau kami da mangalulu waʼa mpadikami anu ndiwaimo ri kami mampoliu waʼa nabi, waʼa mbatuami setu.

¹¹ Pura-pura to Isaraeli malewamo waʼa mpadikami pai bareʼe napokono mampedongeka oni ngangami. Kami masalaamo ri komi, inceʼe painaka ndipapakoyoka kami puloru anu teʼuki ri raya ncura i Musa, watuami setu.

¹² Komi mowia singkono pai anu roo ndijanji ri kami pai ri waʼa ntau anu makuasa ri kami. Yerusale roo ndihuku meruu ngkaneenya ungka ri waʼa ngkota mbeʼi ntano ri lino seʼi.

¹³ Mpengaya-ngaya kapepa anu reʼe teʼuki ri raya Mpadika i Musa ndapapakoyokamo kami. Paikanya mau ewanceʼe, boo Pue Ala pue mami, ntongo bareʼepa kapokono da mampakawongko rayami. Kami bareʼekapokono mampalaika waʼa ncalaa mami pai bareʼe kapokono woʼu mamparindaya waʼa pompagurumi.

¹⁴ Komi, boo Pue Ala pue mami, mangahukumo kami pai kapepa anu lawi ndipakanotomo; powiami sintinaja pai mayoa, paikanya kami bareʼe mampedongeka oni ngangami.

¹⁵ Boo Pue, Pue Ala pue mami, komi mantujumo kuasami ri ndipangangkeni mpesuwu taumi ungka ri tana Masiri, pai kuasami setu bareʼe ndakalingani. Kami masalaamo pai mampowia kasala.

¹⁶ Komi mampelaemo kami ipiamo, inceʼe painaka neʼemo ndipokarau Yerusale, kotami ngkaliomi, pongku ntanami anu magali. Ua salaa mami pai kajaʼa ntau piamo mami, inceʼe painaka pura-pura tau anu mantolilimi kami mampetikodimo Yerusale pai waʼa ntaumi.

¹⁷ Boo Pue Ala pue mami, ndipedongeka pekakai pai perapiku. Ndiwangunaka muni banuami anu roomo ndagero setu, ndipaka dago muni, da naka naincani ntau pura-pura kakominya Pue Ala.

¹⁸ Ndipedongeka kami boo Pue Ala, ndipeolemo kami, pai ndipetiromo kapari ndaya mami sangkani pai kagero ngkota anu ndatoʼo pai toʼomi. Kami mekakai ri komi banya ua kadago mpowia mami, paikanya ua kakominya buke pai kapande ndaya.

¹⁹ Pue ndipedongeka kami, neʼe ndikitanaka salaa mami, ndipetiromo kami pai ganggaramo ndiwianaka! Neʼemo ndilantu-lantu, da naka naincani ntau pura-pura kakominya Pue Ala. Maka Yerusale pai waʼa ntau-Mi inceʼe anu-Mi anu ndipilisi.”

I Jabaraeli mantotoraka wati setu 9:20-27

²⁰ Yaku mekakai mpaliu pai mangaʼaku kasalaaku pai salaa bancaku Isaraeli, seʼi merapi ri Pue Ala pueku da naka mawali wangu banuaa anu magali.

²¹ Sindara yaku ntongo mekakai, i Jabaraeli anu kukitamo ri pepatongawa owi, moyoko maʼi ri yaku. Sindara setu tempomo ntau da mampanyombaka panyomba ngkinowia.

²² Nepa natotoraka i Jabaraeli ewaseʼi, “Danieli, yaku seʼi mangantulungi da nuparata ndaya wati setu.

²³ Sindara siko montepuʼu mekakai ri Pue Ala, Sira mangawai sononya. Yaku seʼi da mamparata maka Sira mampotowe siko. Mewali, pedongekamo mpodago-dago sindara yaku mantotoraka posoki mpepatongawa setu.

²⁴ Papitu ngkani papitu mpuyu ntaʼu inceʼemo tempo anu ndapakanoto i mPue Ala da ndapalapa bancamu pai kotamu anu magali setu ungka ri salaa pai jaʼa. Waʼa ncalaa bareʼemo da ndakitanaka pai kamonco anu bereʼe kapusanya da ndapapekakore rantani pepatongawa pai wati setu da kobangani, pai Banua i mPue anu magali setu da ndapake muni manyomba ri Pue.

²⁵ Ukimo pai parindayamo inceʼi: Papitu ngkani papitu ntaʼu, da liumo, montepuʼu ungka ri tempo pampapesuwu songka da mangawangu muni Yerusale, rantani rata sambaʼa tadulako anu ndapilisi i mPue Ala. Sangkasae papitu ngkani ono mpuyu pai radua ntaʼu waʼa jaya pai waʼa bente Yerusale da ndawali wangu muni, paikanya tempo setu buke pai kapari.

²⁶ Ri kapusa ntempo setu tadulako anu ndapilisi i mPue Ala setu da ndapepate, ntanoka siʼa bareʼe masala. Inceʼe painaka rata surodado sambaʼa mokole anu maroso, mangagero kota Yerusale sangkani pai Banua i mPue. Kapusa lino setu da rata ewa ue mowo anu mangkeni poʼiwali pai kagero, silulu pai anu roo ndapakanoto i mPue Ala.

²⁷ Mokole setu da mampareʼe pojanji pai tau anu sondo ri raya anu papitu ntaʼu. Ri parantongo tempo setu, siʼa da mangampapeʼonto pawianaka pawai panyomba pai panyomba. Ungka lairia sangaya anu ndatoʼo jaʼa anu da mangagero da ndadika ri Banua i mPue pai da njau mpaliu njairia rantani siʼa anu mangadika njairia napere ngkagero anu ndapakanotomo i mPue Ala da tilanya.”