Biblia Todo Logo
Bib sou entènèt

- Piblisite -

DANIELI 7 - Sura Magali Nuntu Ngkatuwu


I DANIELI MANTUNTU WAʼA MPEPATONGAWA ANU NAKITA 7:1–12:13 Pepatongawa anu nakita i Danieli kono pinatuwu aopo 7:1-8

1-2 Ri anu sambengi, ri taʼu anu kaʼisa poparenta i Belisasari mewali datu ri Babeli, i Danieli mangipi pai mangkita pepatongawa. Pangipi setu kuʼuki, pai ewaseʼi podedenya pepatongawa setu: Mewui ngoyu marimbo ungka ri pura-pura payompo yangi, painaka mampareʼe lompiu ri tasi bangke.

3 Ungka lairia mesuwu aopo pinatuwu bose ungka ri raya ue. Sambaʼa-sambaʼa seʼe bereʼe anu siwia.

4 Anu kaʼisa taʼanya ewa singa, paikanya siʼa reʼe paninya ewa pani ntonci kuayangi. Sindara kupampeole siʼa tingkarasaka tewutu paninya pai telapasaka; teʼokotaka siʼa ungka ri wawo ntana pai ndapapekakore ewa tolino, nepa ndawaika nawa-nawa ntolino.

5 Pinatuwu anu karadua taʼanya ewa beruangi. Siʼa mekakore pai witinya radua, pai mantanjua togo mbenci wuku usu ri oyo ngisinya. Kudonge oni nganga mompau ri siʼa mantoʼo, “Iomo konimo sanganya maria-ria gori mpepokonomu!”

6 Ntongo kumangaole-oleka inceʼe, mesuwumo pinatuwu anu ntaninya. Taʼanya ewa Harimau loba, paikanya ri wutongonya njau aopo pani ntonci, pai siʼa aopo woʼonya. Tongawa siʼa reʼe kuasanya.

7 Sindara kupampeole inceʼe mesuwu woʼu pinatuwu anu kaʼaopo. Siʼa maʼai ngkaroso pai matarusu tengiri raya mangkita. Pai waʼa ngisinya anu mabose pai matarusu tengiri raya mangkita. Pai waʼa ngisinya anu mabose pai ewa kapani besi siʼa manganyangi pai mangangkoni sinokonya, nepa naija-ija waʼa yabinya. Mosisala pai pinatuwu anu riunya maka siʼa reʼe sampuyu tondunya.

8 Sindara yaku mampepeoleka waʼa ntondunya, tingkarasaka tuwu sambaʼa tondu anu ntaninya ri oyo waʼa ntondu setu. Tondu setu kodi-kodi paikanya nakoto mangaigi waʼa ntondu anu riunya painaka tatogo tondu setu marabu. Tondu anu kodi setu mampotumpu mata ewa mata ntolino pai nguju anu sondo paunya mobangke-bangke.


Pepatongawa kono Siʼa anu tuwu rantani masae-sae 7:9-14

9 Sindara yaku ntongo mampeole inceʼe, reʼe bara tesangkuja gadera mpoparenta ndadika njairia. Nepa Sira anu tuwu bereʼe kapusanya motunda ri sambaʼa gadera mpoparenta ri oyo waʼa gadera mpoparenta setu. Rengko-A pai wuyuanya mabuya magali ewa taʼa bagi. Gadera mpoparenta-A pai waʼa bolanya mareka-reka ewa reka apu,

10 pai apu setu moili ungka ri gadera mpoparenta-A setu. Moncowu-ncowu tau anu mamporiokoi Sira, pai mojuta-juta tau anu mekakore ri suara-A. Ungka lairia ndatepuʼumo gombo mpobotusi, pai waʼa ncura ndabuleremo.

11 Sindara yaku maole-oleka inceʼe, ntongo kudongepa seʼe i tondu kodi setu mompau-pau ri pobangke-bangkenya. Roo setu pinatuwu anu kaʼaopo setu ndapepate, pai watangkoronya ndatendeka ri raya apu rantani pura mewali amaa.

12 Waʼa mpinatuwu anu ntaninya puramo ndayali kuasanya, paikanya tau seʼe ntongo ndawaipa tempo da tuwu rata ri tempo anu ndapakanoto.

13 Ri raya mpepatongawa anu kukita ri wengi setu, kukita sangaya anu ewa tolino. Siʼa rata nakulamuti limu nepa njoʼu ri sira anu tuwu bereʼe kapusanya setu pai ndapapombeincani pai Sira.

14 Siʼa ndawaika katetubunaka pai kuasa ewa mokole, painaka waʼa ntau ungka ri mpengaya-ngaya banca, lemba pai basa meʼuru ri siʼa. Kakuasanya da toa rantani masae-sae, pai poparentanya bareʼe da posa.


Waʼa mpepatongawa setu ndatotoraka 7:15-28

15 Waʼa mpepatongawa anu kukita setu mampakalingu raya pai mampakapari rayaku.

16 Nepa kutimosuki sambaʼa tau anu mekakore njairia pai kumerapi totoraka kono pura-pura setu, inceʼe painaka natoʼoka yaku.

17 Natoʼo, “Aopo pinatuwu bose seti inceʼemo aopo kamokole anu da mebete ri lino.

18 Paikanya tau i mPue Anu Ndate ri Peawanya da mantarima kuasa moparenta pai poparentanya da mekakore rantani masae-sae.”

19 Ungka lairia da rayaku mangaincani kono pinatuwu anu kaʼaopo setu anu mosisala pai anu ntaninya anu ndapokaeka taʼanya setu mangalesaki pai mangangkoni sinokonya pai kayupa tambaganya pai ngisi besinya, ma ngaija-ija yabinya.

20 Da rayaku woʼu mangaincani kono tandunya anu sampuyu ri woʼonya pai kono tondu kodi anu mesuwu ri oyonya pai mangawuka tatogo tandu anu reʼemo riunya setu. Tondu kodi setu reʼe mata pai nguju anu mompau-pau ri pobangke-bangkenya. Siʼa meruu ndapampokaeka painaka waʼa ntondu anu ntaninya setu.

21 Butu kupatomata mpodago, kukita tondu setu moʼiwali mangaewa waʼa ntau i mPue Ala pai manganangi tau seʼe.

22 Ungka lairia Sira anu tuwu bereʼe kapusanya setu rata pai mangawai botusi anu mampakamonco waʼa ntau i mPue Ala Anu Ndate ri Peawanya. Maka ratamo temponya tau seʼe mantarima kuasa da moparenta.

23 Ewaseʼi totoraka anu ndawaika yaku, “Pinatuwu anu kaʼaopo setu inceʼemo kamokole anu kaʼaopo anu mekakore ri lino pai anu da mosisala pai waʼa ngkamokole anu kaʼaopo anu mekakore ri lino pai anu da mosisala pai waʼa ngkakomole ntaninya.

24 Tondunya anu sampuyu setu inceʼemo sampuyu mokole anu moparenta ri kamokole setu. Ungka lairia da mekakore sambaʼa mokole anu ntaninya; siʼa da mosisala kojo pai waʼa mokole anu riunya, pai siʼa da manganangi tatogo mokole setu.

25 Siʼa da mompau ewa i Pue Ala Anu Ndate ri Peawanya pai mangajeani waʼa ntau i mPue ala. Siʼa da mompari-mpari mawalisaka waʼa mpadika pai waʼa eo bangke agama waʼa ntau i mPue Ala, pai tau seʼe da napapeʼuru ri raya anu tatogo ntaʼu santongo kasaenya.

26 Nepa waʼa ntopobotusi ncuruga da mogombo pai da mangayali kakuasanya pai da mangagero siʼa rantani masana.

27 Kuasa pai kabangke waʼa ngkamokole ri lino da ndawaika waʼa ntau i mPue Ala Anu Ndate ri Peawanya. Kuasa ntau seʼe da moparenta bereʼe kapusanya pai pura-pura anu makuasa ri lino meʼuru ri tau seʼe ri pepoʼinaya.”

28 Ewanceʼemo anu kuparata seʼi. Maʼai kojo kapari ndayaku, painaka memisa kojo lioku, paikanya bereʼe mau sambaʼa tau anu kutoʼoka pura-pura setu.

Swiv nou:



Piblisite