DANIELI 5 - Sura Magali Nuntu Ngkatuwu

I Datu Belisasari ana i Nebukanesa mampareʼe posusa 5:1-12

¹ Ri anu sandeme i Datu Belisasari mampeboo sancowu waʼa ntau bangke da maʼi ri posusanya anu bangke, pai manginu-nginu anggoro.

² Sindara tau seʼe manginu-nginu, nasongka i Belisasari tau da mangantima waʼa mangko wuyawa pai salaka anu napamurumo mpapanya i Nebukanesa ungka ri raya Banua i mPue ri Yerusale. Tangara ndaya i Datu Belisasari da naka waʼa ntau bangke setu pai waʼa rongonya, waʼa rongo piaranya pai siʼa ngkalionya, da mampanginu waʼa mangko setu.

³ Ganggara waʼa mangko setu ndakeni ri siʼa, nepa manginu anggoro tau seʼe pura-pura mampake waʼa mparewa mpanginu setu.

⁴ Seʼi manginu, tau seʼe mangaunde-unde waʼa lamoa anu ndapowia ungka ri wuyawa, salaka, tambaga, kaju pai watu.

⁵ Tingkarasaka ndakita pale ntolino anu moʼuki ri woto ndindi langkanae ri kareʼe anu maʼai katongawanya narara ncilo, painaka yosa kojo pangkita i datu.

⁶ Memisa lionya nakeni ngkaeka ndayanya painaka kandende-ndende wukotunya.

⁷ Mekiu siʼa, mamperapi da naka waʼa ntopotonaa, to poʼopo-opo, anu loʼe mampeole betuʼe ndapeboo. Ri karata ntau seʼe, natoʼo i datu, “Isema ntano anu mangkoto mangabasa uki setu pai mangantoʼoka yaku posokinya, da kuwaika siʼa rengko ngkamokole inceʼemo juba makodara pai enu wuyawa tanda ngkatetubunaka. Pai siʼa da kulanti mewali tau anu katatogo anu makuasa ri raya ngkamokoleku.”

⁸ Megencu ri suara waʼa ntau anu loʼe setu, paikanya bereʼe mau sambaʼa ungka ri oyo ntau seʼe anu mangkoto mangabasa uki setu bara anu mangantoʼoka i datu posokinya.

⁹ Inceʼe painaka i Datu Belisasari mapari rayanya pai memisa woʼu lionya; ewanceʼe seʼe waʼa ntau bangke lantinya setu lingu rayanya.

¹⁰ Madonge peboo-boo i datu, painaka mesua ine i datu ri tambale mposusa setu. Nepa mompau siʼa natoʼo, “Tuwumo pueku rantani masae-sae! Ndiparodo rayami pueku pai neʼemo memisa liomi.

¹¹ Maka ri raya ngkamokole mpueku reʼe sambaʼa tuama anu buke pai inosa waʼa lamoa anu magali. Sindara mpoparenta mpapa mpueku, tau setu tongawa mampotumpu pangaincani, parata ndaya pai loʼe ndaya, anu ewa kaloʼe waʼa lamoa. Papa mpueku Datu Nebukanesa mangalantimo siʼa mewali tadulako waʼa ntau loʼe montonaa, opo-opo, pai waʼa ntau anu maria pangaincani pai loʼe mampeole betuʼe.

¹² Siʼa loʼe kojo pai gana pangaincaninya mantotoraka kono pangipi, mabulere rahasia pai mangkaresaka waʼa anu masusa. Toʼonya i Danieli, paikanya i datu mampapotoʼo siʼa i Belitasari. Ndipeboomo siʼa. Siʼa da mangantoʼoka komi pueku nunjaa posokinya uki setu.”

I Danieli mantotoraka posoki uki setu 5:13-30

¹³ Inceʼe painaka ganggara ndakeni i Danieli mancuara i datu. Nepa meoasi idatu ri siʼa ndatoʼo, “Bara sikomo i Danieli, to Yahuda anu ndatawani, anu ndakenimo mpapaku ungka ri tana Yahuda?

¹⁴ Kudonge siko buke pai waʼa inosa lamoa anu magali, pai kasikonya mampotumpu kaloʼe, parata ndaya, pai loʼe anu bereʼe kasiwianya.

¹⁵ Waʼa ntau loʼe pai anu loʼe ri opo-opo napebutuka mabasa uki seʼi pai da mangantoʼoka yaku posokinya. Paikanya bareʼe nakoto ntau seʼe.

¹⁶ Nepa kudonge mpinca kasikonya anu mangkoto mangabulere waʼa rahasia pai mangangkaresaka waʼa anu mapari. Ane nukoto mangabasa uki seʼi pai mangantoʼoka yaku posokinya, siko da kuwaika rengko ngkamokole inceʼemo juba makodara pai enu wuyawa tanda ngkatetubunaka. Pai siko da kulanti mewali tau anu katatogo makuasa ri raya ngkamokoleku.”

¹⁷ Mesono i Danieli natoʼo, “Pueku, mau bareʼe ndiwai mparasee setu ri yaku, mbolimo ndiwaika tau ntaninya. Da kubasaka komi uki setu sangkani pai posokinya da kutoʼoka komi.

¹⁸ I Pue Ala Anu ndate ri Peawanya anu mampapewali papami i Nebukanesa datu anu bangke pai mangawaika sira kabangke pai katetoʼo.

¹⁹ Ewancetumo kabangkea painaka painaka waʼa ntau ungka ri mpengaya-ngaya banca, lemba, pai basa, kandende-ndende pai maeka ri sira. Ane da raya mampepate tau, ndapepate ewanceʼemo seʼe tau seʼe. Pai ane da rayaa mancorepaka sambaʼa tau, ndasorepaka tau setu. Sira anu mangabangkei pai mangangkodisi isema ntano malulu pepokonoa.

²⁰ Paikanya ri tempo siramobangke-bangke, mapeni woʼo pai masii, sira d ndanawu ungka ri gadera mpoparentaa painaka tetaji kabangkea.

²¹ Sira ndairi ungka ri oyo ntolino pai ponawa-nawa jamo ewa ponawa-nawa mpinatuwu. Sira tuwu ri oyo ngkalide lampu, mangaande ewo ewa japi pai yore ri tongo mpada painaka nayoʼosi ndini. Ri purinya sira mangaʼaku kaʼi Pue Ala Anu Ndate ri Peawanya anu makuasa ri wawo ngkamokole ntolino pai kamokole setu ndawaika isema ntano anu ndapilisi.

²² Paikanya anaa, inceʼemo komi pueku ngkaliomi, bareʼe ndipokono mampakalauka koro, seʼi ndiincanimo pura-pura setu.

²³ Komi mobangke-bangke ri suara i mPue ri suruga pai makoje mampokau ndakeni mpesua waʼa mangko anu ndapamurumo ungka ri Banua i mPue. Nepa komi sangkani pai waʼa ntau bangke, waʼa rongo pai waʼa rongo piara mampanginumo waʼa mangko setu. Komi mangaunde-unde waʼa lamoa anu ndapowia ungka ri wuyawa, salaka, tambaga, besi, kaju pai watu, waʼa lamoa anu bareʼe nakoto meole, bara mompedongeka pai bareʼe naincani bara nunjaa-njaa. Pueku bareʼe mantubunaka i Pue Ala anu mampakanoto tuwu bara mate komi pai mampakanoto jaya ngkatuwu mpueku.

²⁴ Inceʼe puʼunya painaka i Pue Ala mampakatu pale da mangaʼuki pau-A.

²⁵ Ewaseʼi uki setu, ‘Ndaimba, ndadasi, ndatila.’

²⁶ Pai seʼimo posokinya: Ndaimba, tempo mpoparentami roo ndaimba i mPue Ala pai ndapapotandomo;

²⁷ ndadasi, komi roo ndadasi pai tongawa jamangaʼa-ngaʼa;

²⁸ ndatila, kamokole ndatila ndawaika Media pai Parasia.”

²⁹ Madonge inceʼe, ganggara napokau i Belisasari waʼa mpegawainya da naka mampaporengkoka i Danieli juba anu makodara pai mampapogonggaka siʼa ri leʼenya enu wuyawa. Nepa ndalanti i Danieli mewali tau anu katatogo makuasa ri kamokolenya.

³⁰ Ri wengi setu seʼe ndapepate i Belisasari datu nto Babeli setu.