DANIELI 4 - Sura Magali Nuntu Ngkatuwu

I Nebukanesa mangipi ri karadua ngkaninya 4:1-18

¹ Ewaseʼi songka i Datu Nebukanesa anu ndapakatu ri waʼa ntau ungka ri mpengaya-ngaya banca pai basa ri sambawo lino: “Tabea mpetubunaka!

² Da rayaku mangampauka komi anu ndapojingki pai tanda ngkuasa anu ndawianakamo i mPue Ala Anu Ndate ri Peawanya ri yaku.

³ Maʼai ngkabangke tanda ngkuasa anu ndawianaka! Maʼai kojo ndapampojingki anu ndawianaka! Pue Ala anu mewali mokole rantani masae-sae. Sira makuasa rantani pusa lino.”

⁴ Yaku maroo-roo ri karodo ndayaku ri langkanaeku pai tuwu ri gana-gana.

⁵ Paikanya ri anu sambengi sindara ntongo lintu yore, yaku mangipi mangkita pepatongawa anu maʼai pampakaʼipunya rayaku.

⁶ Nepa kupeboo waʼa ntau loʼe anu reʼe ri Babeli da mangantotorakaka yaku peola mpangipi seʼe.

⁷ Paikanya jabutu waʼa ntopontonaa, loʼe opo-opo, tau anu moua nawa-nawanya, maria paincaninya kono betuʼe setu rata ri yaku, pai kupauka tau seʼe pangipiku setu, bereʼe mau sambaʼa tau anu maincani mantotoraka posoki mpangipiku setu.

⁸ Kapusanya ratamo i Danieli anu ndapapotoʼo i Belitasari ewa toʼo lamoaku. I Danieli nakuasai inosa waʼa lamoa anu magali. Kupauka siʼa woʼu pangipiku setu, kutoʼoka,

⁹ “Ee Belitasari, tadulako ntau anu maria pangaincaninya, kuincani kasikonya buke pai inosa waʼa lamoa anu magali, painaka bereʼe rahasia anu da tesambuni ri siko. Padongeka pangipiku seʼi, pai totorakamo posokinya.

¹⁰ Sindara yaku ntongo ngkayore, kukita sampuʼu kaju anu tuwu ri tongo-tongo lino.

¹¹ Puʼu ngkaju setu malangkati kojo; wotonya bangke pai maroso. Yoyonya sawi ri yangi painaka yosa napangkita ntau pura-pura ri sambawo lino.

¹² Waʼa iranya malimbokori pai maria kojo wuanya, gana da nakoni ntau sambawo lino. Waʼa mpinatuwu anu maila moyuku-yuku ri ara lerunya pai waʼa ntonci mosea ri raʼanya. Pai pura-pura anu tuwu maya mangkoni waʼa mbuanya.

¹³ Sindara yaku ntongo monawa-nawa pepatongawa setu, kukita sambaʼa malaʼeka menaʼu ungka ri suruga; tongawa siʼa tikali kojo pai moncoro-ncoro.

¹⁴ Morimbo oni nganganya mompau natoʼo, ‘Towomo puʼu ngkaju setu pai tandosimo waʼa raʼanya, rudusi waʼa iranya pai posebukamo waʼa wuanya. Irimo waʼa mpinatuwu anu moyuku-yuku ri lerunya pai waʼa ntonci anu mosea ri waʼa raʼanya.

¹⁵ Paikanya papaliukamo tuʼanya nakanjau ri raya ntana. Rambika rante besi pai tambaga nepa nupalaika ri tongo mpada. Papaliukamo napayoʼo-yoʼosi rini, pai tuwu sangkani-ngkani pai waʼa mpinatuwu pai waʼa ewo anu njau njairia.

¹⁶ Mbolimo nawa-nawa ngkatolinonya da mogumbali mewali nawa-nawa mpinatuwu ri raya anu papitu ntaʼu kasaenya.

¹⁷ Incetumo botusi mami, kami waʼa malaʼeka anu tikali pai mainga-inga mpaliu. Tinako ndaya mami inceʼemo da naka waʼa ntau ri mbeʼi ntano kareʼenya da mangaʼaku, i Pue Ala Anu Ndate ri Peawanya, makuasa ri wawo ngkuasa kamokole ntolino pai kamokole setu da ndawaika isema ntano anu ndapilisi, bara ri tau anu bereʼe kojenya ntano!’

¹⁸ Ee, Belitasari inceʼemo pangipiku. Mewali seʼi-seʼi toʼokamo yaku nunjaa peolanya. Maka bereʼe mau sambaʼa ungka ri oyo waʼa ntau anu loʼe anu reʼe ri poparentaku anu mangangkoto mangantoʼoka yaku, paikanya siko da nukoto, maka siko buke pai waʼa inosa lamoa anu magali.”

I Danieli mantotoraka peola mpangipi setu 4:19-33

¹⁹ Madonge inceʼe i Danieli anu ndapapotoʼo woʼu i Belitasari, tesaluntengku pai jingki rayanya sambinoro. Inceʼe painaka yaku, Datu Nebukanesa mompau ri siʼa kutoʼo, “Belitasari, neʼe mapari rayamu ua pangipi pai posokinya setu.” Mesono i Belitasari natoʼo, “Pueku, sangkadagonya ane rapanya anu natoʼo mpangipi setu da mampere waʼa iwali mpueku pai neʼe ri komi.

²⁰ Puʼu ngkaju anu ndikita setu, anu ewancetu kalangkatinya, rantani yoyonya sawi ri yangi, pai nakoto ntau sambawo lino mangangkita.

²¹ Waʼa iranya marombo pai momberoe wuanya painaka gana nakoni waʼa bangani dunia seʼi. Waʼa mpinatuwu maila moyuku-yuku ri ara lerunya, pai waʼa ntonci mosea ri waʼa raʼanya.

²² Boo pueku, puekumo puʼu ngkaju anu malangkati pai maroso setu. Kabangke mpueku teranga-rangani sawi ri yangi pai kakuasa mpueku tebini rata ri tando lino.

²³ Pai ndikita woʼu sambaʼa malaʼeka menaʼu ungka ri suruga mantoʼo, ‘Towomo pai geromo puʼu ngkaju seʼi, paikanya papaliukamo tuʼanya ri raya ntana. Rambikamo pai rante besi pai tambaga nepa nupalaika ri tongo mpada. Papaliumo napayoʼo-yoʼosi rini pai tuwu sangkani-ngkani pai waʼa mpinatuwu ri raya anu papitu ntaʼu kasaenya.’

²⁴ Pueku, ewaseʼimo posoki mpepatongawa setu pai inceʼimo pobotusi i mPue Ala Anu Ndate ri Peawanya kono kakominya pueku.

²⁵ Komi da ndairi ungka ri oyo waʼa ntolino pai da tuwu ri oyo waʼa mpinatuwu ri pada. Ri raya anu papitu ntaʼu kasaenya komi da mangaande ewo ewa japi pai da yore ri tongo mpada, painaka da nayoʼosi ndini. Roo setu komi da mangaʼaku kaʼi Pue Alanya Anu Ndate ri Peawanya anu makuasa ri wawo ngkamokole ntolino, pai kamokole setu da ndapepombaika ri sema ntano anu ndapilisi.

²⁶ Waʼa malaʼeka mampesongkaka da naka tuʼa ngkaju setu da ndapapaliukamo ri raya ntana. Incetu posokinya komi da mewali datu muni ri karoonya ndiʼaku kaʼi Pue Alanya anu makuasa ri sambawo lino.

²⁷ Inceʼe painaka komi da mampedongeka totorakaku. Neʼe ndipowia woʼu salaa, paikanya ndiwianakamo anu monco pai mayoa, pai ndipokapurumo tau kaasi-asi. Ane ewanceʼe komi da madago mpaliu katuwumi.”

²⁸ Pura-pura setu tepewali ri wotongkoro, Datu Nebukanesa.

²⁹ Pusa sampuyu pai radua mbuya ungka njairia, sindara yaku ntongo melinja-linja ri bonde anu ndate ri wawo ata langkanaeku ri Babeli,

³⁰ mompau yaku kutoʼo, “Peole, ara madolidisa kota Babeli! Yakumo anu mangawangu mewali indolipu negara mantuju kakuasaku pai rosoku, peawa pai pangkotoku!”

³¹ Bareʼepa pusa pompauku, kudongemo oni nganga ungka ri yangi, “Datu Nebukanesa, pedongeka inceʼi! Kakuasamu ewa sambaʼa datu roomo ndayali ungka ri siko.

³² Siko da ndairi ungka ri oyo ntolino, pai da tuwu sangkani-ngkani pai pinatuwu ri pada. Ri raya anu papitu ntaʼu kasaenya siko da mangaande ewo ewa japi. Roo setu nepa da nuʼaku Kaʼi Pue Alanya Anu Ndate ri Peawanya anu makuasa ri wawo ngkamokole ntolino pai kamokole setu da ndawaika isema ntano anu ndapilisi.”

³³ Ri tempo setu seʼe, waʼa mpau setu liu-liu mewali. Yaku i Nebukanesa ndairi ungka ri oyo ntolino pai mangaande ewo ewa japi. Koroku nayoʼosi ndini, wuyuaku marate ewa wuyu ngkongka, pai kayupaku ewa karate kayupa ntonci.

I Nebukanesa maunde i Pue Ala 4:34-37

³⁴ Ri kapusamo ntempo anu papitu ntaʼu setu, metingara yaku ri yangi, nepa wali ngkayoa muni rayaku. Inceʼe painaka kuunde i Pue Ala Anu Ndate ri Peawanya. Kuunde pai kubangkei Sira anu tuwu rantani masae-sae setu. “Pue Ala anu mewali datu rantani masae-sae. Sira anu makuasa rantani pusa lino.

³⁵ Waʼa banca ri sambawo lino bereʼe kuasanya. Pue Ala anu mangkuasai waʼa malaʼeka ri suruga pai waʼa bangani dunia. Bereʼe mau sambaʼa tau ntano anu mangkoto maewa pepokono-A, bereʼe anu mantaha da mampeoasi nunjaa anu da ndawianaka.”

³⁶ Jabutu menaa muni rayaku, katetoʼoku pai peawaku pai katebambari ngkamokoleku ndapapewalili muni ri yaku, yaku nasuncu waʼa mpegawaiku pai waʼa ntau bangke, pai yaku ndapapewalili ri kamokoleku, pai peawaku maʼai woʼu kabangkenya ungka ri anu owi.

³⁷ Mewali seʼi-seʼi yaku, i Nebukanesa, maunde, mabangkei pai mampapeawa Datu Ncuruga. Pura-pura powia-A anu monco pai mayoa, pai Sira mangkoto mangkodisi tau anu mobangke-bangke.