DANIELI 3 - Sura Magali Nuntu Ngkatuwu

I Nebukanesa mampapesuwu songka da naka pura-pura palilinya manyomba ri turuki wuyawa 3:1-7

¹ Ri anu sangkani i Datu Nebukanesa mampowia sambaʼa turuki wuyawa anu kalangkatinya 27 meteri kabininya 3 meteri. Nawangu inceʼe ri Rato Dura ri poropensi Babeli.

² Ungka lairia napeboo i datu waʼa mokole ri pura-pura lemba, waʼa petoro, waʼa bupati, topontotoraka ri negara, bendahara, topobotusi anu loʼe ri padika pai pura-pura kapala daera da rata ri poʼupacara karoomo nturuki setu.

³ Butu ratamo waʼa ntau setu pura-pura mekakore ri suara nturuki setu,

⁴ meboomo tau anu ndapopokau i datu marimbo oni nganganya natoʼo, “Ee waʼa ngkasangkompo ungka ri waʼa banca, lemba pai basa! Pedongeka songka i datu seʼi:

⁵ Ane umonimo surupeta, nalulu oni ncanggona, kecapi pai rebana, gambusu, sereda pai waʼa mparewa musiki ntaninya, komi pura-pura sangaya-ngaya da mombukotu manyomba ri turuki wuyawa anu roomo ndawangu i Datu Nebukanesa.

⁶ Pai bara isema anu bareʼe mawianaka songka seʼi, liu-liu da ndatendeka ri tongo apu mareka-reka.”

⁷ Butu nadonge waʼa ntau setu waʼa mparewa musiki ndapapowotu, waʼa ntau ungka mpengaya-ngaya banca, lemba pai basa, mombukotu manyomba ri turuki wuyawa setu.

Yunu i Danieli tatogo ndatuluri maewa songka i datu 3:8-18

⁸ Reʼe bara tesangkuja to Babeli, mampake songka setu da mampakarugi toYahudi.

⁹ Natoʼo ntau seʼe ri Datu Nebukanesa, “Marate inosami rantani masae-sae!

¹⁰ Komi pueku mampapesuwumo songka anu mantoʼo, ane ndapapowotumo waʼa mparewa musiki, pura-pura tau sangaya-ngaya da mombukotu manyomba ri turuki wuyawa setu,

¹¹ pai bara isema anu bareʼe mawianaka songka setu da ndatendeka ri dampu anu mareka-reka apunya.

¹² Paikanya bara tesangkuja to Yahudi anu ndiwaikan kuasa moparenta ri poropensi Babeli seʼi, bareʼe mampedongeka songkami setu pue. Tau seʼe setu i nceʼemo i Sadara, i Mesa pai i Abenego, tau setu bareʼe napokono manyomba ri waʼa lamoami pueku pai bareʼe woʼu manyomba ri turuki wuyawa anu ndiwangu setu pue.”

¹³ Madonge pompetumbu setu maʼai kojo kajaʼa ndaya i datu, painaka nawai songka da naka tau tatogo setu ndakeni mancuara siʼa.

¹⁴ Meoasi i datu ri tau seʼe ndatoʼo, “Sadara, Mesa, Abenego! Bara monco kojo bareʼe ndipokono manyomba ri waʼa lamoaku pai bareʼe woʼu mombukotu ri turuki wuyawa anu kuwangu setu?

¹⁵ Mewali seʼi-seʼi bara tokamo komi da mombukotu pai manyomba ri turuki ri tempo mpowotu musiki? Ane bareʼe ndipokono, komi liu-liu da ndatendeka ri dampu anu mareka-reka apunya. Pai lamoa mbeʼi anu mangkoto da malapasaka komi ungka ri kuasaku?”

¹⁶ Mesono i Sadara, i Mesa pai i Abenego, natoʼo, “Datu anu meawa, kami bareʼe da mesapu.

¹⁷ Ane ri Pue Ala anu kapanyomba mangkoto mancorepaka kami ungka ri dampu anu mareka-reka apunya setu pai ungka ri kuasami pueku, manoto da ndapawianaka inceʼe.

¹⁸ Paikanya ane rapanya Sira bareʼe woʼu mancorepaka, mbolimo da ndipaincani pueku, kakaminya bareʼe da manyomba ri lamoami pueku pai bareʼe woʼu da manyomba ri turuki wuyawa anu ndiwangu setu pueku.”

I Sadara, i Mesa pai i Abenego ndahuku mate 3:19-25

¹⁹ Inceʼe painaka maʼaimo kajaʼa ndaya i Datu Nebukanesa ri Sadara, i Mesa pai Abenego, painaka mawaa kojo lionya. Inceʼe painaka nasongka da naka ndapakarameda papitu ngkani karameda dampu apu setu pai anu biasanya.

²⁰ Nepa napokau bara tesangkuja tau anu maroso ungka ri oyo waʼa ncurodadonya da mangampungu i Sadara, i Mesa pai i Abenego, pai mangentendeka tau seʼe ri tongo apu anu mareka-reka setu.

²¹ Ganggara ndapungu mainti-inti tau tatogo setu, rengkonya bareʼe ndayali, tau seʼe mampake rengko, kameja, juba, songko pai rengkonya anu ntaninya, nepa ndatendeka ri tongo dampu anu mareka-reka apunya setu.

²² Ua songka i datu anu bareʼe maya ndasapu setu, inceʼe painaka dampu setu ndapakaʼai karamedanya, gori ngkaʼai ngkaramedanya, tau anu mantendeka i Sadara, i Mesa pai i Abenego setu mate wara ua mantimosuki rara apu setu.

²³ Ewanceʼemo tau tatogo setu mainti-inti pungunya manawu ri tongo-tongo dampu anu mareka-reka apunya setu.

²⁴ Tingkarasaka i Datu Nebukanesa maʼai katesaluntengkunja. Ganggara peokonya meboo siʼa ri waʼa mpegawainya natoʼo, “Ara banya kita ngena mangampungu tau tatogo pai mantendeka tau seʼe ri tongo apu setu?” Mesono tau seʼe natoʼo, “Lawi monco pueku.”

²⁵ Masono i datu ndatoʼo, “Paikanya wenu painaka kukita njau tau aopo melinja-linja ri tongo-tongo apu setu? Tau seʼe bareʼemo tepungu pai bareʼe liu-liu bara makuja-kuja. Pai anu kaʼaopo setu taʼanya ewa lamoa.”

Tau tatogo setu ndalapa pai ndapapepone lantinya 3:26-30

²⁶ Nepa natimosuki i Nebukanesa dampu setu, nepa meboo siʼa natoʼo, “Sadara, Mesa pai Abenego, waʼa mbatua i mPue Ala Ane Ndate ri Peawanya! Ndipesuwumo ungka ri dampu setu!” Mesuwumo kojo tau seʼe.

²⁷ Pura-pura aweri i datu, waʼa mpetoro, bupati, pai waʼa mpegawai ntaninya mantolilimi tau tatogo setu, nakita ntau seʼe tau tatogo setu bareʼe sako naisu apu. Wuyua ntau seʼe bareʼe wara, rengko ntau seʼe bareʼe omba, sakopa wau ndangasu bereʼe ri tau seʼe.

²⁸ Nepa mompau i datu ndatoʼo, “Undemo i Pue Ala anu napanyomba i Sadara, i Mesa pai i Abenego. Sira mampokaumo malaʼeka-A mancorepaka watua-A tatogo anu meaya ri Sira. Tau seʼe mangalewamo songkaku moruana mate painaka da manyomba bara da mangaunde lamoa mbeʼi ntano, podo ri Pue Ala pue ntau seʼe panyombanya.

²⁹ Inceʼe painaka kupesongkaka ri sambaʼa-sambaʼa tau ungka ri banca, lemba banca bara basa nunjaa ntano, anu mampasowa pau pompetikodi ri Pue Ala anu napanyomba i Sadara, i Mesa pai i Abenego, da ndasasa pai banuanya da ndadungkalaka pai da mewali awu. Maka bereʼe lamoa anu mangkoto da mangawianaka nunjaa anu roo ndawianaka mPue Ala setu.”

³⁰ Roo setu ndapapepone i datu lanti i Sadara, i Mesa pai i Abenego, painaka tau seʼe mewali waʼa ntau anu bangke lantinya ri poropensi Babeli.