DANIELI 2 - Sura Magali Nuntu Ngkatuwu

Pangipi i Nebukanesa 2:1-13

¹ Ri anu sambengi, ri karua ntaʼunya poparenta i Datu Nebukanesa, mangipi sira. Pangipia setu mampakasusa rayaa, painaka bareʼemo naleʼo yore.

² Inceʼe painaka napeboo waʼa ntau loʼe mowati pai tau loʼe ri potonaa, topopakuli pai waʼa ntau anu reʼe pangaincani da mantotoraka peola mpangipia.

³ Ri pekakore ntau seʼe ri suaraa, ndatoʼo i datu, “Yaku mangipi, pai bareʼemo rodo rayaku maka da rayaku mangaincani peolanya!”

⁴ Mesono tau seʼe ri basa Arami natoʼo, “Marate inosami rantani masae-sae! Ndipaukamo kami pangipi setu, da pangantotoraka nunjaa posokinya.”

⁵ Mesono i datu ndatoʼo, “Roomo kupakanoto ewaseʼi: Komi sangaya-ngaya da mangantoʼoka yaku pangipi setu sangkani pai peolanya. Pai ane bareʼe ndikoto, komi da ndasasa pai banuami da ndaruasi.

⁶ Paikanya ane ndikoto mantoʼo, da kuwaika komi hadia anu meawa sangkani pai katetubunaka anu bangke. Mewali seʼi-seʼi nditoʼokamo yaku pangipiku setu sangkani pai peolanya!”

⁷ Mesono woʼu tau seʼe natoʼo, “Mbolimo komi pue da mantoʼoka kami riunya pangipi setu, roo setu nepa da katotoraka kono nunjaa peolanya.”

⁸ Madonge pompau ntau seʼe setu mesono i datu, “Bareʼemo sala ewa kupangkapa-ngkapa. Komi podo mangaencu-encu tempo, maka ndiincani kayakunya mantinako ndaya

⁹ da mangahuku komi pura-pura pai huku anu siwia-wia ane bareʼe ndikoto mantoʼoka yaku pangipiku setu ri yaku. Komi mogombo-gombo da mombamba mpaliu pai da mampolegaka yaku, maka ndipomata-mata da naka kuwalisaka pobotusiku. Mewali nditoʼomo pangipi setu, da kupaincani kakominya ndikoto woʼu mantotoraka peolanya.”

¹⁰ Mesono woʼu waʼa ntau loʼe setu natoʼo, “Ri sambawo lino bereʼe mau sambaʼa tau anu mangangkoto da mangantoʼo nunjaa anu nditinako ndaya setu pue. Pai bareʼepa reʼe sambaʼa datu anu ewambeʼi kabangke pai peawanya, da mampesingaraka anu ewanceʼi taʼanya ungka ri waʼa ntopowati, waʼa ntau loʼe pai waʼa ntau anu maria pangaincaninya ri raya langkanaenya.

¹¹ Komi mantangara ndaya sangaya anu maʼai kaparinya. Bereʼe mau sambaʼa tau anu mangkoto da mangabangani banya mantoʼo waʼa lamoa, paikanya tau seʼe bereʼe ri oyo ntolino.”

¹² Madonge pesono ntau seʼe setu maʼai kojo kajaʼa ndaya i datu pai napasongka tau mampepate pura-pura waʼa ntau loʼe ri Babeli.

¹³ Songka setu ndapapaincanika waʼa ntau pura-pura, painaka pura-pura waʼa ntau loʼe, tesua i Danieli pai waʼa yununya ndapepali da ndapepate.

I Pue Ala mantotorakaka i Danieli pangipi setu sangkani pai peolanya 2:14-23

¹⁴ Inceʼe painaka njoʼu i Danieli mampomberataka i Ario, tadulako ntopojaga i datu, anu lawi tikalimo da mawianaka popahuku setu. Napeoasi mpodago i Danieli ri siʼa,

¹⁵ wenu painaka i datu mampesuwumo songka anu ewancetu taʼanya. Napau i Ario ri Danieli nunjaa anu mewalimo setu.

¹⁶ Madonge inceʼe, ganggara i Danieli njoʼu mancuara i datu pai merapi ane madago da ndawaipa tempo da napantotoraka posoki mpangipi setu.

¹⁷ Perapi i Danieli ndapoʼioka i datu, nepa mewalili i Danieli ri banuanya nepa napauka i Hananya, i Misaeli pai Asaria nunjaa anu mewalimo setu.

¹⁸ Napokau tau seʼe da mekakai ri Pue Ala anu ri suruga, da naka mapuru rayaa ri tau seʼe da mangantotoraka rahasia mpangipi setu. Maka ane ewanceʼe tau seʼe bareʼe da ndahuku mate sangkani pai waʼa ntau loʼe anu ntaninya.

¹⁹ Ri wengi setu seʼe i Pue Ala mangantoʼo rahasia setu ri Danieli ri sangaya pepatongawa. Inceʼe painaka naunde i Danieli i Pue Ala anu ri suruga,

²⁰ naroʼo, “I Pue Ala loʼe pai maroso, taundemo Sira rantani masae-sae!

²¹ Siramo anu mampakanoto katedikanaka ndaoa pai tempo, Sira anu mampapeʼonto pai malanti tau anu makuasa. Sira woʼu anu mangawai kaloʼe ndaya, pai mangawai parata ndaya.

²² Sira anu mampatongawa rahasia anu maʼai ngkatesambuni. Sira ndaincani pura-pura anu mewali ri raya mbani. Sira nakulamuti rara anu mangkido.

²³ Boo, Pue Ala pue ntau piamoku, Komi kuunde pai kubangkei. Maka ndiawaika yaku loʼe pai roso, perapi mami ndibanganimo. Pai pesono anu da ndatoʼoka i datu roo ndituju.”

Pangipi setu napetumbu pai natotoraka i Danieli 2:24-45

²⁴ Roo setu njoʼu i Danieli ri Ario anu mangaratamo songka da mampepate waʼa ntau loʼe ri Babeli. Natoʼo i Danieli ri siʼa, “Neʼe nupepate waʼa ntau loʼe setu. Poyunumo yaku njoʼu mancuara i datu, maka yaku da mangantoʼoka sira posoki mpangipia setu.”

²⁵ Inceʼe painaka ganggara napoyunu i Ario i Danieli njoʼu mancuara i Datu Nebukanesa, nepa natoʼo ri sira, “Reʼemo karata sambaʼa tau ungka ri oyo waʼa nto Yahudi anu ndatawani anu mangkoto da mangantoʼoka komi posoki mpangipimi pueku.”

²⁶ Ungka lairia ndatoʼo i datu ri Danieli anu karua ntoʼonya i Belitasari, “Ara da nukoto mantoʼoka yaku pangipiku sangkani pai peolanya?”

²⁷ Mesono i Danieli, “Pueku, bereʼe tau anu maria pangaincani, maria opo-opo, to pebolobiangi bara anu loʼe mampeole betuʼe anu mangkoto da mangantoʼoka komi kono inceʼe.

²⁸ Paikanya ri suruga reʼe Pue Ala anu mampatongawa mpengaya-ngaya rahasia, pai Sira anu roo mantoʼoka komi nunjaa anu da mewali ri reme ripuri. Mewali seʼi-seʼi mbolimo ndiwai tempo ri yaku da mantotoraka pangipi pai pepatongawa anu nditarima ri sindara ngkayoremi setu.

²⁹ Sindara komi ntongo ngkayore, komi mampangipika kono tempo anu nepa da rata. I Pue Ala anu mampatongawa mpengaya-ngaya rahasia ri komi kono nunjaa anu da mewali.

³⁰ Rahasia seʼi ndapatongawamo ri yaku, banya ua kayakunya anu meruu ngkaloʼeku ungka ri waʼa ntau ntaninya, paikanya podo da naka ndiincani peola mpangipimi setu pai mangarata ndaya woʼu bangani ndayami.

³¹ Ewaseʼimo pepatongawa anu ndikita setu: Ri suarami reʼe sambaʼa turuki! Turuki setu bangke kojo, pai kampiri-mpiri taʼanya pai tengiri raya mangkita.

³² Woʼonya ungka ri wuyawa anu malino, dada pai takienya ungka ri salaka, lompe pai bengonya ungka ri tambaga,

³³ paʼanya ungka ri besi pai witinya santila ungka ri besi pai santila woʼu ungka ri tana puyu.

³⁴ Sindara komi ntongo meole-oleka turuki setu, reʼe saogu watu bangke anu maloka ungka ri apa buyu anu tindo, seʼi bereʼe tau anu mangalengko, mampere turuki setu ri witinya anu ndapowia ungka ri besi pai ri tana setu painaka malesa.

³⁵ Turuki setu liu-liu madungka, mewalimo wune anu lau besi, tana puyu, tambaga, salaka, wuyawa anu mageromo ewa awu ri kareʼe mpangawaro gandu ri tempo mporeme. Wune setu mawaro nawui ngoyu, painaka bemoreʼe sako wakanya. Paikanya watu anu mampere turuki setu mewali bangke ewa buyu anu mangabuketi sambawo lino.

³⁶ Inceʼemo pangipi setu pue, mewali seʼi da kutotoraka peolanya.

³⁷ Komi pue datu anu meawa, datu ri waʼa mokole; komimo anu meruu ngkakuasami, i Pue Ala ri suruga mangawaikamo komi kadatu seʼi, kakuasa, karoso pai peawa.

³⁸ Komi ndapapewali anu makuasa santila lino anu napeari ntau pai mpengaya-ngaya tonci pai pinatuwu ntaninya. Komi ngkaliomi inceʼe woʼo wuyawa anu ri tutuki setu.

³⁹ Paikanya butu motandomo kadatumi, da meumba kamokole ntaninya anu banyamo ewa kabangke ngkamokolemi. Nepa da mebete kamokole anu katatogo anu ewa napatongawa santila ri koro nturuki anu podo tambaga setu, anu da mangkuasai sambawo lino.

⁴⁰ Roo setu da matunda kamokole anu kaʼaopo, anu ewa karoso besi. Pai ewa karoso besi anu da mangalesaki nunjaa ntano, ewanceʼe seʼe kamokole anu kaʼaopo setu da mangagero waʼa ngkamokole anu ntaninya setu.

⁴¹ Witi pai karama mbiti nturuki setu anu santila besi pai santila tana puyu, inceʼe mampatongawa ripurinya kamokole setu da tetila-tila. Kamokole setu reʼe woʼu rosonya maka tana puyu nagalo besi.

⁴² Waʼa ngkarama mbiti anu ndapowia ungka ri besi pai tana puyu, inceʼe mampatongawa reʼe santila kamokole setu anu maroso pai reʼe woʼu anu malente.

⁴³ Kasigalo besi pai tana puyu setu inceʼe mantuju woʼu kamokole setu mampari-mpari da mampakaroso koronya, ri jaya mpombeporongoka paikanya pompari-mpari setu podo ngkabongo, podo ewa besi bareʼe da mewali sambaʼa-mbaʼa pai tana puyu.

⁴⁴ Ri tempo mpoparenta waʼa mokole setu, i Pue Ala ri suruga mangampatunda sambaʼa kamokole anu da todo rantani masae-sae, pai bareʼe da reʼe banca anu mangkoto manganangi. Kamokole setu da mangagero pura-pura kamokole anu ntaninya setu.

⁴⁵ Ara banya ndikitamo, watu setu bereʼe tau anu mangalengko tetaduli ungka ri apa buyu anu tindo mampere pai mangalesaki turuki besi, tambaga pai tana puyu, salaka pai wuyawa setu? I Pue Ala anu bangke mampatongawa ri komi pueku nunjaa anu da mewali. Pangipi setu sintinaja ndapoaya monco pai totorakaku monco kojo.”

I Danieli marata pombai ungka ri datu 2:46-49

⁴⁶ Ungka lairia mombukotumo i Datu Nebukanesa ri suara i Danieli, pai mawai songka da naka i Danieli ndatubunaka pai ri siʼa da ndapanyombaka panyomba anu da ndaʼombasi pai waʼa mpanyomba anu ntaninya.

⁴⁷ Ndatoʼo i datu, “Monco kojo Danieli. Pue Ala puemu setu maʼai ngkabangke ungka ri Pue Ala. Sira anu makuasa ri wawo waʼa datu, pai mampatongawa mpengaya-ngaya rahasia. Inceʼe tongawamo ri pangkotomu mantotoraka posoki rahasia seʼi.”

⁴⁸ Inceʼe painaka nawaika i Danieli lanti anu ndateka, nawaika woʼu mpengaya-ngaya pombai anu meawa kojo, pai ndalanti mewali petoro Babeli, pai napapewali tadulako ri pura-pura topontotoraka ri langkanae.

⁴⁹ Paikanya ua perapi i Danieli, painaka poparenta ri poropensi Babeli napepombaika i datu ri Sadara, Mesa pai Abenego, pai i Danieli ngkalionya maroo-roo ri langkanae i datu.