DANIELI 12 - Sura Magali Nuntu Ngkatuwu

Kapusa lino 12:1-13

¹ Malaeka anu mampake rengko ayapa lena setu mompau woʼu natoʼo, “Ri tempo setu da rata malaeka bangke i Mikaeli topongkariani bancamu. Ungka lairia da rata tempo ngkapari anu bereʼe kasiwianya ungka ri kareʼe waʼa banca. Paikanya pura-pura tau ungka ri bancamu anu toʼonya teʼuki ri sura mPue Ala ndasorepaka.

² Maria ri oyo ntau seʼe anu matemo da tuwu muni; santila da mangaepe katuwu anu bereʼe kapusanya, pai santila woʼu da mangaepe kakapuru raya anu maʼai kaparinya pai beda reʼe woʼu kapusanya.

³ Waʼa ntadulako anu loʼe da merara ewa kareme ri yangi. Pai tau seʼe da mampagurumo sondo tau da mangawianaka nunjaa anu monco pai mayoa, da merara ewa betuʼe ri yangi rantani masae-sae.”

⁴ Nepa natoʼo woʼu malaeka setu ri yaku, “Danieli, seʼi-seʼi dampomo sura setu, pai patakamo segeli, da naka tedampo mpaliu rantani rata ri kapusa lino. Maria tau anu da mampebutuka mamparesa nunjaa anu ntongo tepewali. Paikanya pompari-mpari ntau seʼe setu podo da ngkabongo.”

⁵ Ungka lairia kukita tuama radua. Anu sambaʼa mekakore ri wingke ngkoronya sambote seʼi, pai anu sambaʼa woʼu mekakore ri smbote njau.

⁶ Anu sambaʼa meoasi ri anu mekakore mosu mpodago ri petii ngkoronya natoʼo, “Impia temponya waʼa ngkatepewali anu ndapojingki seʼi da motando?”

⁷ Tau anu ntaninya setu mantora palenya radua-duanya seʼe ndeki yangi. Kudonge siʼa montandokoro mamposabi i Pue Ala anu bereʼe kapusanya pai mopau natoʼo, “Waʼa anu mewali setu da tewianaka ri raya anu tatogo ntaʼu santongo kasaenya. Ane motandomo pangajeani waʼa ntau i mPue Ala, da motandomo woʼu waʼa anu ndapojingki pewalinya setu.”

⁸ Pura-pura anu natoʼo setu lawi paka kudonge, paikanya bareʼe kurata ndaya. Nepa kumeoasi kutoʼo, “Pue, ewambeʼi da potandonya pura-pura setu?”

⁹ Mesono siʼa natoʼo, “Seʼi-seʼi palaimo, Danieli, maka waʼa mpau seʼi sangaya-ngaya da tesambunika pai da mewali rahasia rantani rata ri kapusa lino.

¹⁰ Maria tau anu da ndaʼuji pai da ndapakagali. Tau seʼe anu majaʼa bareʼe da rata ndaya, da napowia mpaliu jaʼa; podo tau seʼe anu loʼe anu da marata ndaya.

¹¹ Montepuʼu ungka ri tempo pampeʼontoka panyomba sandeme-sandeme setu pai sangaya anu ndapokaeka anu ndatoʼo jaʼa anu mampakagero setu ndapatunda, daliu 1.290 ndeme.

¹² Yontomo kalindo ndaya ntau anu todo rata ri reme anu ka-1.335.

¹³ Siko Danieli, katodomo rantani rata ri kapusanya. Siko da mate, paikanya da membangu da mantarima saromu ri kapusa lino.”