DANIELI 11 - Sura Magali Nuntu Ngkatuwu

¹ Siʼamo anu ndapapolako da mampelae pai da mancambiranaka yaku ri taʼu anu kaʼisa poparenta i Dariusi ri Media setu.

^2a Pai nunjaa anu da kutoʼoka siko inceʼe monco.”

Kamokole Masiri pai kamokole Siria 11:2b-20

^2b Natoʼo malaʼeka setu, “Tatogo datu ntaninya da mamparenta Parasia, natondaraka datu anu kaʼaopo anu meruu ngkasugi ungka ri anu ntaninya. Ri tando-tando ngkakuasanya pai kakoreʼenya, da mombetima rosonya pai kamokole Yunani.

³ Ungka lairia da meoko sambaʼa mokole anu maroso. Siʼa da mangamparenta sambaʼa kamokole anu maʼai ngkabangke pai da mowia malulu pepokononya.

⁴ Paikanya ri tando-tando ngkatebambarinya, kamokolenya da tewuraga pai da tetila-tila mewali aopo ntila. Waʼa mokole anu banya mulinya da moparenta mancawani siʼa, pai tau seʼe banyamo ewa karosonya.

⁵ Datu ntana ri selata da mewali maroso. Paikanya sambaʼa ungka ri oyo waʼa ntadulako ncurodadonya, da meruu ngkarosonya, painaka siʼa, da mamparenta kamokole anu meruu woʼu kabangkenya.

⁶ Bara tesangkuja ntaʼu ungka njairia datu ntana selata da mampareʼe kasambaʼa-mbaʼa pai datu ntana utara pai da mampapolangkai ananya pai datu ntana utara setu. Paikanya kasambaʼa-mbaʼa setu bareʼe masae, pai ananya anu weʼa setu da ndapepate, ewanceʼe seʼe langkainya pai ananya pai waʼa ana mayununya anu mangawawamo siʼa.

⁷ Bareʼe masae ungka njairia, sambaʼa tau anu mokasangkompo pai ana datu anu weʼa setu da mewali datu. Siʼa da mangaungku surodado datu ntana utara, maungku bentenya pai manganangi.

⁸ Ri pewalilinya ri tana Masiri, siʼa da mangangkeni turuki lamoa iwalinya pai waʼa aga-aga wuyawa pai salaka anu roo ndapanyombaka ri lamoa setu. Reʼe bara tesangkuja ntaʼu kasaenya siʼa bareʼe mampoʼiwalika datu ntana utara.

⁹ Ungka lairia datu ntana utara da mangaungku tana selata, paikanya siʼa tetumba pai da mewalili ri tananya ngkalionya.

¹⁰ Ungka lairia waʼa ana tuama datu ntana utara mompatikali da moʼiwali, napasingkanduru surodado anu sondo kojo. Sambaʼa ungka ri oyo ntau seʼe setu da njoʼu mopaungku ewa porumuku ue mowo. Ri popaungku anu karadua ngkaninya siʼa da maungku bente iwali.

¹¹ Inceʼe painaka masengkemo datu ntana selata, painaka njoʼu siʼa ri kareʼe mpombetoto maewa datu ntana utara. Siʼa da naleʼo manangi surodado anu sondo anu nawawanaka datu ntana utara.

¹² Inceʼe painaka da mekiunde siʼa ua penanginya pai ua napangkoto mampepate iwalinya anu sondo, paikanya siʼa bareʼe da makuasa mpaliu.

¹³ Da karadua ngkaninyamo datu ntana utara mampasingkanduru surodado anu sondo, pai meruu ngkasondo woʼu painaka anu kaʼisa. Ane ratamo ri temponya, siʼa da moiwo woʼu njoʼu moʼiwali mampoyunu surodadonya anu sondo pai waʼa mparewanya anu sondo kojo.

¹⁴ Inceʼe painaka maria tau anu maewa i datu ntana selata. Pai bara tesangkuja tau anu masii ungka ri bancamu, Danieli da meewa woʼu ua nakitamo ntau seʼe sangaya pepatongawa. Paikanya bareʼe da reʼe yowenya.

¹⁵ Ungka lairia datu ntana utara da mangaungku pai da mangarampa sambaʼa kota anu ndabente. Surodado ntana selata bareʼe da nakoto meewa, pai waʼa ncurodado anu napilisi seʼe bareʼe da nakoto mampareʼe peewa.

¹⁶ Datu ntana utara setu da mowia gori mpepokononya, maka beliu-liu reʼe peewa mau sakodi. Siʼa woʼu da mampotundasi tana anu madolidi pai mangkuasai pura-pura.

¹⁷ Ungka lairia datu ntana utara da mampatikali pura-pura surodadonya da mangaungku tana selata. Tinako ndayanya da mangkuasai juku-juku kamokole waʼa iwalinya, da napareʼe kasambaʼa-mbaʼa pai siʼa da mampapolangkai ananya pai datu ntana Masiri setu; paikanya tinako ndayanya seʼe bareʼe mewali.

¹⁸ Roo setu siʼa da mangaungku waʼa banca ri wiwi ntasi, pai maria anu naleʼo manangi, paikanya sambaʼa tadulako ungka ri tana ntau ntaninya da mampapeʼonto powianya anu mampetikodi tau setu pai da mampesawaki pompetikodi setu ri siʼa.

¹⁹ Datu ntana utara setu da mewalili muni ri waʼa bente ri tananya ngkalionya, pai siʼa da ndanangi pai bemo da reʼe bambarinya.

²⁰ Siʼa da nasawani sambaʼa datu anu da mampokau waʼa mpegawainya anu masii da mamparuru asele ri periso da mangarangani kakoreʼe ngkamokolenya. Ri tempo anu bareʼe masae datu setu da ndapepate, bareʼe naincani ntau pai banya woʼu ri poʼiwali.”

Datu ntana utara anu majaʼa 11:21-45

²¹ Natoʼo woʼu malaʼeka setu, “Datu anu tondanya mamparenta tana utara, inceʼe sambaʼa tau anu baleparu, anu kamonconya bareʼe sintinaja da mewali datu. Paikanya siʼa da rata ri kabareʼenya ndasoro-soro, pai mangarampa potunda i datu ri poʼakalanya.

²² Waʼa ncurodado anu maewa siʼa, sako i Tadu mPanyomba Bangke nasaorari naʼopisaka.

²³ Bareʼe naaya waʼa mpojanji anu nepa roo mpinca napareʼe pai waʼa banca ntaninya. Pai siʼa da kako maroso-roso, mau siʼa podo mamparenta negara anu kodi-kodi.

²⁴ Ri pokira-kiranya siʼa da mangaungku lemba anu malimbokori ri tempo waʼa ntau anu njau njairia tuwu ri kalindo ndayanya. Siʼa da mangawianaka anu bareʼepa reʼe napawianaka ntau piamonya. Nepa da natila-tilaka waʼa ntaunya aga-aga anu napamuru pai kakoreʼe anu naleʼo ri poʼiwali. Siʼa da mampowia akala da mangaungku waʼa ngkota anu reʼe bentenya, paikanya temponya da ronga pura.

²⁵ Ungka lairia ua kakojenya mampasingkanduru surodado anu sondo kojo da mangaungku datu ntana selata anu lawi mompatikalimo da mangaewa siʼa pai surodado anu maroso pai sondo kojo. Paikanya datu ntana selata bareʼe da nakoto maewa siʼa maka siʼa da napobalu waʼa ntaunya.

²⁶ Waʼa ntopontotorakanya anu mosu mpodago pai siʼa anu da manganawusaka siʼa. Maria tau ri oyo ncurodadonya da ndapepate, pai surodadonya da ndaʼopisaka pura-pura.

²⁷ Roo setu datu radua setu da mancuara sambaʼa meja mangkoni sangkani-ngkani, paikanya majaʼa tinako ndaya ntau seʼe, pai tau seʼe da mombembambasi. Paikanya tangara ndaya ntau seʼe bareʼe mewali maka bareʼepa rata temponya.

²⁸ Ungka lairia datu ntana utara da mewalili ri tananya mangkeni waʼa aga-aga anu naleʼo mampanuru. Siʼa mompari-mpari da mangagero agama anu nakekeni waʼa ntau i mPue Ala. Siʼa da mowia malulu pepokononya nepa da mewalili ri tananya ngkalionya.

²⁹ Bara tesangkuja ntempo ungka njairia siʼa da mangaungku tana selata, paikanya sangkani seʼi banyamo ewa kaloʼunya anu kaʼisa.

³⁰ Maka waʼa nto Roma pai waʼa ngkapalanya da rata ungka ri Siperu da mangaungku siʼa, painaka merata eka ndayanya. Painaka mewalili siʼa ri kasengke ndayanya pai napari-pari da mangagero agama waʼa ntau i mPue Ala. Siʼa mampedongeka totoraka waʼa ntau anu mampalaikamo agama setu.

³¹ Nepa napokau waʼa ncurodado anu da mampakakarika Banua i mPue. Tau seʼe da mampapeʼonto pawianaka panyomba anu sandeme-sandeme pai mampatunda sangaya anu ndapokaeka anu ndatoʼo anu mampakagero.

³² Ri kasondo akalanya i datu setu da mangkanarasi waʼa ntau anu mampalaikamo agama setu, da naka napokono ntau seʼe mantulungi siʼa. Paikanya waʼa ntau anu mepoʼinaya ri Pue Ala da makoje maewa siʼa.

³³ Tau anu loʼe mangawawanaka waʼa ntau sondo painaka maria tau anu marata ndaya. Paikanya bara ri sangkuja ntempo kasaenya, reʼe bara tesangkuja ri oyo ntau seʼe da ndapepate ua poʼiwali bara ua apu, pai bara tesangkuja da ndapamuru pai ndatawani.

³⁴ Sindara ngkatewianaka pompepate setu, waʼa ntau i mPue Ala da mangarata sakodi petulungi, paikanya maria tau anu mompasanjuyu pai tau seʼe podo ua da mampepali rasinya ngkalionya.

³⁵ Santila ungka ri waʼa ntadulako anu loʼe setu ndapepate. paikanya inceʼe mewali sambaʼa popaʼuji ri tau seʼe, da naka magali tau seʼe. Inceʼe da tepewali mpaliu rantani rata ri kapusa lino, inceʼemo tempo anu roo ndapakanoto i mPue Ala.

³⁶ Datu ntana utara da mowia gori mpepokono ndayanya. Ri pobangke-bangkenya da natoʼo kasiʼanya anu meruu ngkabangkenya pai lamoa mbeʼi ntano, sako pai Pue Ala Anu Nate ri Peawanya siʼapa anu meruu ngkabangke. Siʼa da nakoto mowia ewanceʼe rantani pura karau ndaya i mPue Ala. Maka nunjaa anu roo ndapakanoto i mPue Ala sangaya-ngaya da tewianaka riunya.

³⁷ Datu setu bareʼe da mampedongeka lamoa mbeʼi ntano anu napanyomba ntau piamonya, tesua lamoa anu napanyomba waʼa mbeʼa. Bareʼe naaya waʼa lamoa setu, maka naepe siʼapa anu meruu ngkabangke pai tau seʼe.

³⁸ Paikanya siʼa da mantubunaka lamoa anu bareʼepa reʼe napampanyomba ntau piamonya, inceʼemo waʼa lamoa anu mangkariani waʼa bente. Siʼa da mampanyombaka wuyawa, salaka, paramata, pai waʼa mpanyomba anu masuli ntaninya ri waʼa lamoa anu bareʼepa reʼe napampanyomba waʼa ntau piamonya.

³⁹ Siʼa da mangampilisi waʼa ntau anu da manyomba ri lamoa ntau ntaninya, da mangaungku waʼa bente anu maroso. Isema anu mangaʼaku lamoa setu da nawaika katetubunaka anu bangke pai lanti anu ndateka sangkani pai tana mewali saronya.

⁴⁰ Ane mosumo tempo ngkapusa ngkakuasa datu ntana utara, datu ntana selata da mangaungku siʼa. Nepa i datu ntana setu da mampesawaki popaungku setu ri gori ngkaʼainya. Siʼa da mangkeni kareta mpoʼiwali anu sondo, nyara pai kapala. Da mopaungku ewa porumuku ue mowo, pai da mampotundasi maria negara.

⁴¹ Sakopa tana anu madolidi woʼu da naungku, pai sampuyu ncowu tau da ndapepate. Paikanya waʼa ngkamokole Edomi, Moabi pai waʼa ntana anu motoʼo ri kamokole Amoni bareʼe nalengko.

⁴² Sindara napampotundasi waʼa ngkamokole setu, kamokole Masiri woʼu bareʼe ndalai.

⁴³ Siʼa da mampamuru aga-aga Masiri ewa wuyawa pai salaka sangkani pai waʼa aga-aga ntaninya anu maʼai ngkasulinya. Siʼa da napelae nto Libia pai Sudani.

⁴⁴ Nepa bambari ungka ri pebetea pai utara da mampaka tesaluntengku siʼa, painaka siʼa da moʼiwali ri gori rosonya pai maria tau napepate.

⁴⁵ Pai siʼa mangabini woʼu kema ngkamokolenya ri oyo ntasi pai buyu kareʼe Banua i mPue. Paikanya ripurinya siʼa mate pai bereʼe mau sambaʼa tau anu da mampelae siʼa.”