DANIELI 10 - Sura Magali Nuntu Ngkatuwu

Pepatongawa ri Danieli ri Koro Tigirisi 10:1–11:2a

¹ Ri taʼu katatogo poparenta i Datu Koresi ri Parasia sangaya patiendo ndapatongawa ri Danieli bara i Belitasari. Patiendo setu monco, paikanya mapari kojo da ndapangarata ndaya. Sindara pompari-mparinya da mangarata ndaya, i Danieli mantarima totoraka kono posoki mpatiendo setu mampoliu sambaʼa pepatongawa.

² Sindara setu yaku ntongo mobaratapa muntu-muntu tatogo minggu.

³ Sangkasae setu yaku bareʼe mangkoni pangkoni anu monyami bara wayawo; yaku bareʼe manginu anggoro, pai bareʼe masara wuyuaku.

⁴ Ri rua mpuyu pai aopo eo mbuya kaʼisa taʼu setu, yaku ntongo mekakore ri wingke ngKoro Ue Tigirisi anu bangke setu.

⁵ Metingara yaku nepa kukita sambaʼa tau anu morengko lena pai mosoʼo ntongo wuyawa anu malino.

⁶ Koronya mengkido-ngkido ewa paramata, lionya ewa perara sindi ngkila, pai matanya mareka-reka ewa apu. Pale pai witinya makilaya ewa tambaga anu roo ndaasa, pai oni nganganya ndadonge ewa oni nganga ntau sondo.

⁷ Podo yaku ngkalioku anu mangkita pepatongawa setu. Waʼa ntau anu sangkani-ngkani pai yaku bareʼe nakita, paikanya maeka raya ntau seʼe painaka molonco mesambuni.

⁸ Napalaika ntau seʼe jamo yaku ngkalioku njairia, sindara yaku maole-oleka pepatongawa anu mejingkiti setu. Bareʼemo reʼe rosoku pai memisamo lioku.

⁹ Jabutu kudonge oni nganganya, malimpumo yaku pai tedungkalakamo mokepe-kepe ri tana.

¹⁰ Ungka lairia reʼe pale anu maisu yaku painaka tepembangu yaku meruntubo ri tana tepombukotu.

¹¹ Natoʼo malaʼeka setu ri yaku, “Danieli, siko ndapotowe i mPue Ala. Pembangumo pekakore nepa nupedongeka mpodago waʼa mpauku seʼi. Yaku ndapokau maʼi ri siko.” Sindara pompaunya ewanceʼe, mekakoremo yaku kandende-ndende.

¹² Nepa natoʼoka yaku, “Danieli, neʼe maeka. Ndapedongekamo i mPue Ala pekakaimu montepuʼu ungka ri eo anu kaʼisa nupampakanoto siko da mampakalauka koromu da naka loʼe. Karataku seʼi ewa sono mpekakaimu.

¹³ Malaʼeka anu mangkariani kamokole Parasia maewa yaku ri raya anu ruampuyu pai sambaʼa eo. Nepa maʼi i Mikaeli, siʼa sambaʼa tadulako ri oyo waʼa ntadulako malaʼeka, mampelae yaku. Siʼa ndate kupalaika ri Parasia.

¹⁴ Yaku rata da mawaika siko parata ndaya kono nunjaa anu da mewali raneonya ri bancamu. Pepatongawa seʼi kono reme anu nepa da rata.”

¹⁵ Ri pangantoʼonya inceʼe setu, metutu yaku bareʼe kukoto mompau.

¹⁶ Ungka lairia malaʼeka anu ewa taʼa ntolino setu malaenaka palenya nepa naisu wiwiku. Mompau yaku ri siʼa kutoʼo, “Pue, pepatongawa seʼi mampaka pari rayaku painaka bereʼe liu-liu rosoku.

¹⁷ Yaku jamo ewa sambaʼa watua anu mekakore ri suara mpuenya. Ewambeʼi da kupangkoto mompau ri komi? Puramo rosoku pai sodo poʼinosaku.”

¹⁸ Inceʼe painaka naisu woʼu yaku, nepa kuepe terangani rosoku.

¹⁹ Natoʼo, “I Pue Ala mampokapuru siko, inceʼe painaka neʼe malelu rayamu pai maeka, io pakaroso rayamu!” Sindara pompaunya ewanceʼe, kuepe terangani woʼu rosoku pai kumompau kutoʼo, “Ndipompaumo Tua, Komi mangaranganimo rosoku.”

^20-21 Nepa mesono siʼa natoʼo, “Bara nuincanimo nunjaa puʼunya painaka yaku maʼi madadu siko? Tinako ndayaa inceʼemo da mangantoʼoka siko nunjaa anu teʼuki ri raya Ncura ngKamonco. Seʼi-seʼi yaku sangaya-ngaya da mewalili moʼiwali mangaewa malaʼeka anu mangkariani Parasia. Roo setu malaʼeka anu mangkariani Yunani da rata. Bereʼe anu da mampelae yaku waʼanyamo podo i Mikaeli, malaʼeka anu mangkariani Isaraeli, negaramu.