AYUBI 3 - Sura Magali Nuntu Ngkatuwu

Peʼode i Ayubi ri Pue Ala 3:1-26

¹ Ungka lairia montepuʼumo mompau i Ayubi mantadeasi eo pampoana siʼa, natoʼo,

^2-3 “Boo Pue Ala, nditadeasimo eo pampoana yaku, pai wengi pontepuʼu ineku mampongkenika yaku!

⁴ Boo Pue Ala, ndipakawanimo eo setu, ndipalisimo ungka ri nawa-nawami naka paya; neʼe boi ndipapaliuka sindi ndeme da merara ri eo setu.

⁵ Ndipakaeta pai ndipakawani mparokii, ndipakawani kojo, pai moʼu-moʼu neʼe boi meilo-ilo reme. Ndikaʼuwika limu pai gawu anu makumba. Ndiompo boi nakono rara ndeme.

⁶ Mbolimo wengi setu da ndataji ungka ri imba ntaʼu pai wuya; neʼemo boi kono ndaendo, bara da kono woʼu ndaimba.

⁷ Mbolimo wengi setu buke pai kawaninya. Bereʼe kalesenya, bereʼe kawongko ndaya.

⁸ Ee waʼa ntopobaratapa pai waʼa ntopelamba naga ndipapaperekamo dua pai petadeasi eo setu;

⁹ neʼe boi mesindi pancula ndeme, neʼe boi mawinangkasi reme! Mbolimo wengi setu bereʼe yowenya mantanga-ntanga da karata eo pai pampomata-mata anu dawoʼu.

¹⁰ Tetadeasimo wengi anu jaʼa setu, ri tempo pampoana i ine yaku, waikamo napangkoyo kapari.

¹¹ Ara wenu painaka yaku bareʼe mate ri raya ngkompo ineku, bara bareʼe maʼinosa sindara pampoana?

¹² Wenu painaka yaku ndasoko ineku pai ndapasusu yaku?

¹³ Ane rapanya ri tempo setu yaku matemo, yaku da yore pai da meosa ri kalindo ndaya,

¹⁴ da ewa waʼa mokole pai tau anu makuasa piamo, anu mawali wangu muni langkanae ipiamo.

¹⁵ Yaku da tekayore ewa ana mokole, anu mabangani banuanya pai salaka anu makilaya.

¹⁶ Ara wenu painaka yaku bareʼe ndapoana bareʼe moʼinosa da naka lintu kojo kayoreku.

¹⁷ Njairiamo dayoku, bereʼe tau majaʼa anu da majaʼati, pai topotetala anu pura rosonya da mampakaʼosa lengenya.

¹⁸ Ewanceʼe seʼe tau ndatawani rodo rayanya, bareʼe da nadonge pepokarau ntau majagai.

¹⁹ Njairia pura-pura tau siwia; tau anu tetoʼo pai tau anu bareʼe tetoʼo, njairia waʼa mbatua maradekamo.

²⁰ Wenu painaka tolino ndapapaliuka mapari mpaliu katuwunya? Wenu painaka ndawai kareme ri tau anu masusa rayanya?

²¹ Tau seʼe meruu pampokononya dayo painaka aga-aga. Mampepetaʼa kapate paikanya bareʼe jela.

²² Kalindo ndaya nepa da ndaepe kojo ane mate pai ndadayomo.

²³ Reme ngkatuwu ntau seʼe ri tempo anu nepa darata ndasalimbuti i mPue Ala. Tau seʼe ndalimbu ncape.

²⁴ Pangkoniku inceʼe meʼode-ode, bereʼe peʼontoku mantodosaka pari.

²⁵ Pura-pura anu kupoʼipu ndaya, mamperemo yaku, waʼa anu kupokaeka mampogulalangimo yaku.

²⁶ Bereʼe karodo ndayaku, yaku mangkoyo pari, bereʼe kapusanya.”