1 Samuel 3 - Sura Magali Nuntu Ngkatuwu

I Pue mepatongawa ri Semueli 3:1-21

¹ Ri raya ngkaʼewanceʼenya, i Semueli anu ntongo ananggodipa setu, naponinika i Eli mamporiokoi i Pue. Ri tempo setu malaamo kojo dandadonge patuju bara pepatongawa ungka ri Pue.

² Ri anu sambengi, i Eli anu maʼaimo kojo katuʼanya pai bareʼe ntani yosa matanya, njau ntongo ngkayore ri lincunya.

³ I Semueli yore bareʼe lawa ungka ri Peti pojanji i mPue, ri raya Kema Magali. Mosu reme ri kabareʼepanya mowinangkasi reme ntongo marekapa silo ri raya Kema,

⁴ i Pue mampeboo i Semueli, mesono i Semueli, natoʼo, “Seʼi yaku papa.”

⁵ Maliga-liga siʼa njoʼu madadu i Eli, natoʼo, “Seʼi yaku papa, nunjaa anu ndipebooka yaku?” Paikanya mesono i Eli, natoʼo, “Yaku bareʼe kupeboo siko. ako pewalili muni njoʼu yore.” Mewalili muni i Semueli njoʼu yore.

^6-7 Ungka lairia ndapeboo woʼu i mPue i Semueli, pai bareʼepa naincani i Semueli kaʼi Puenya anu mampeboo siʼa, maka bareʼepa reʼe pompau i mPue pai siʼa. Inceʼe painaka kalumbangu siʼa njoʼu madadu i Eli, natoʼo, “Seʼi yaku papa, nunjaa anu ndipebooka yaku? mesono i Eli, “Yaku bareʼe kupeboo siko anaku, pewalilimo njoʼu yore.”

⁸ Ri katatogo ngkaninya ndapeboo woʼu i mPue i Semueli, membangu i Semueli njoʼu madadu i Eli, natoʼo, “Seʼi yaku papa, nunjaa anu ndipebooka yaku?” Narata ndayamo i Eli, manoto i Pue anu mampeboo ananggodi seʼi.

⁹ Inceʼe painaka natoʼoka i Semueli, ewaseʼi anaku, “Njoʼumo yore, pai ane nudonge woʼu siko ndapeboo, da nusonoka, ‘Ndipompaumo Pue, seʼi yaku watuami mampedongeka!’ ” Mewalilimo i Semueli njoʼu yore.

¹⁰ Ungka lairia ratamo i Pue, mekakore njairia, ndapeboo i Semueli ndatoʼo, “Semueli! Semueli!” Mesono i Semueli natoʼo, “Ndipompaumo, Pue, seʼi yaku watua-Mi mampedongeka.”

¹¹ Nepa mompau i Pue ri siʼa, ndatoʼo, “Yaku da mawianaka sangaya kapari anu maʼai kojo ri to Isaraeli, painaka pura-pura tau anu madonge da benge rayanya.

¹² Ri eo setu Yaku da mawianaka pura-pura anu roomo Kupakanoto tila i Eli pai somborinya ungka ri tepuʼunya rata ri kapusanya.

¹³ Roomo Kutoʼoka siʼa, somborinya da Kuhuku rantani masae-sae, maka waʼa ananya mampetikodimo Yaku. Naincani i Eli kajaʼa mpowia waʼa ananya paikanya bareʼe napokarau tau seʼe.

¹⁴ Inceʼe painaka montandokoro Yaku kono sombori i Eli, maʼai gaga kabangke ncalaa ntau seʼe, bareʼemo da Kupokapuru tau seʼe, mau napareʼe panyomba anu ewambeʼi ntano bareʼemo da kutarima rantani masae-sae.”

¹⁵ Roo setu wali ngkayore muni i Semueli, mowuro-wuro membangu siʼa, naloka waʼa dampo Banua i mPue. Nanawa-nawa i Semueli, maeka rayanya da mampetumbu ri Eli, nunjaa anu nadonge sambengi ngena,

¹⁶ paikanya napeboo i Eli siʼa, natoʼo, “Anaku, Semueli.” Mesono i Semueli, “Seʼi yaku papa.”

¹⁷ Meoasi i Eli, natoʼo, “Nunjaa anu ndatoʼoka siko i mPue? Pauka yaku pura-puranya setu. Maka ane reʼe anu nusambunika ri yaku siko sangaya-ngaya da ndahuku i mPue Ala.”

¹⁸ Inceʼe painaka napetumbu i Semueli ri Eli pura-pura. Bereʼe anu nasambunika. Ungka lairia natoʼo i Eli, “Sira Pue, mbolimo ndapowia nunjaa anu madago malulu pepokono-A.”

¹⁹ Kakobangke-bangkemo i Semueli, pai tongawamo i Pue mayunuki siʼa, painaka nunjaa anu natoʼo i Semueli mewali.

^20-21 Inceʼe painaka pura-pura to Isaraeli ri samalele lemba mangaʼaku i Semueli sambaʼa nabi i mPue. Sangkani-sangkani i Semueli mompau napedongeka nto Isaraeli. Ntongo mepatongawa mpaliu i Pue ri Silo, pai pepatongawa anu kaʼisa inceʼemo pompau-A pai i Semueli.