Sɔlɔmɔn In Siŋ Dɛm 7 - Krio Fɔs Oli Baybul

Di Man

¹ Luk we yu fut dɛn mol fayn insay sandal, yɔŋ gyal we tan lɛk kwin! Yu lɛg dɛn rawnd rawnd lɛk juɛl we dɔn pas na masta sabi wokman in an.

² Yu nebul na lɛk rawnd bol, we ɔltɛm gɛt wayn we dɛn de miks. Yu bɛlɛ tan lɛk we dɛn kɔt nyu rɛs na fam, ɛn put Lili flawa dɛn rawnd am

³ Yu tu bɔbi dɛn tan lɛk tu fritambo pikin, twin dɛn we fritambo bɔn.

⁴ Yu nɛk tan lɛk ayvri tawa. Yu yay dɛn tan lɛk dɛn watasay na Ɛshbɔn, nia di get na Bat Rabim. Yu nos tan lɛk Libanɔn tawa, usay yu go tinap si Damaskɔs.

⁵ Yu ed ay lɛk Mawnt Kamɛl ɛn yu lɔŋ ia tan lɛk pɔpul klos; yu dɔn kapchɔ kiŋ insay yu ia.

⁶ Luk we yu fayn, luk we yu gud fɔ luk, Di wan we a lɛk, yɔŋgyal, yu tu swit

⁷ Lɛk pam tik na so yu tret ɛn ay, Yu bɔbi dɛn tan lɛk banga ed.

⁸ A se a go klem di pamtri ɛn ol di branch dɛn. Ey! Mek yu bɔbi dɛn tan lɛk bɔnch greps ɛn yu mɔt in sɛnt lɛk apul.

⁹ Ɛn mek yu kis dɛn, tan lɛk dɛn dia ɛn soba wayn, we de go dɔŋ di trot smut wan, de slayd fayn pan lip ɛn tit.

Di Uman

¹⁰ Mi na mi bilɔvɛd yon ɛn na mi i want.

¹¹ Kam mi daliŋ, lɛ wi go na di fil dɛn, ɛn tap na di vilej dɛn.

¹² Lɛ wi kɔmɔt ali go na di greps gadin dɛn fɔ luk if di greps dɛn flawa dɔn opin, ɛn if di pomigranet dɛnsɛf dɔn rɛdi. Na de a go gi yu mi lɔv.

¹³ Da bɔn-pikin flawa de pul fayn sɛnt, ɛn ɔlsay pan wi domɔt na dɛn fayn fayn frut, nyu wan ɛn ol wan we a bin dɔn kip fɔ yu mi daliŋ.