Sɔlɔmɔn In Siŋ Dɛm 6 - Krio Fɔs Oli Baybul

Di Uman

¹ Wɛl usay yu man we yu lɛk dɔn go naw, uman we fayn pas ɔl? Usay yu dɔn put ed, so dat wi kin ɛp yu luk fɔ am?

Di Uman

² Mi daliŋ dɔn go dɔŋ nain gadin, usay dɛn plant spays, i go fid in ship dɛn na gadin ɛn gɛda Lili flawa dɛn.

³ Mi na mi daliŋ yon, ɛn mi daliŋ na mi yon, i de fid in ship dɛn usay dɛn Lili flawa de.

Di Nɔmba Fayv Siŋ Di Man

⁴ Yu fayn lɛk Tiza mi lɔv, fayn lɛk Jerusɛlɛm, fiaful lɛk ami we de mach wit bana.

⁵ Pul yu yay kɔmɔt pan mi i de tɔch mi. Yu ia na lɛk wɛn got dɛn gɛda, dɛn de waka go dɔŋ Mawnt Giliad

⁶ Yu tit lɛk we uman ship dɛn gɛda wansay, we dɛn kɔmɔt was, we dɛn ɔl bɔn twin, nɔn pan dɛn pikin nɔ day.

⁷ Yu chik dɛn tan lɛk af af pomigranet, biɛn yu vel.

⁸ Siksti kwin dɛn de, ɛn eti switat dɛn ɛn fɔ yɔŋ gyal dɛn, man nɔ fit kɔnt.

⁹ Mi dɔv, mi yon we nɔ gɛ bɔt, nain wangren, In mami bɔl yay, i nɔ si wan bɔt pan am. Di yɔŋ gyal dɛn luk am, dɛn gi am nem, Gladis, di kwin ɛn switat dɛnsɛf si am ɛn prez am.

¹⁰ “Udat dis we de shayn lɛk do klin, fayn lɛk mun, de shayn lɛk san, fiaful lɛk ami we de mach wit bana.

¹¹ A go go dɔŋ na di fam we dɛn plant almɔnd tik, fɔ si if dɛn plant dɛn de bɔs na di vali, fɔ si if di greps dɛn dɔn bigin bia, ɛn if di pomigranet dɛn dɔn de kɔmɔt.

¹² Bifo a kin kechɔp misɛf, di want we a want yu, mek a si misɛf lɛk a de insay chariɔt nia mi prins.

Di Uman

¹³ Kam bak, kam bak o, Shulamayt uman, kam bak lɛ wi go luk yu gud. Wetin mek una fɔ luk di Shulamayt lɛk yu de luk tu ami dɛn dans?