Lɛta Fɔ Rom 8 - Krio Fɔs Oli Baybul

Fɔ Liv Lɛkɛ Aw Gɔd In Spirit Sho Wi

¹ Gɔd nɔ de kɔndɛm dɛn pipul we gɛt wanwɔd wit Jizɔs Krays.

² Gɔd in Spirit we de gi layf ɛn we de rul wi dɔn mek wi gɛt wanwɔd wit Jizɔs Krays, ɛn i dɔn pul wi ɔnda di pawa we sin ɛn day bin gɛt oba wi.

³ Gɔd dɔn du wetin di Lɔ nɔ ebul du bikɔs mɔtalman nɔ ebul ɛp insɛf. Gɔd kɔndɛm di sin we de wok insay mɔtalman in at wɛn i sɛn in yon Pikin lɛkɛ mɔtalman kam na wɔl fɔ pul sin kɔmɔt na mɔtalman in at.

⁴ Gɔd du dis so dat wi we nɔ de du wetin wi at tɛl wi fɔ du igen, bɔt wi de du wetin Gɔd in Spirit tɛl wi, go ebul du ɔl wetin di Lɔ se rayt fɔ du.

⁵ Dɛn pipul we de fala wetin dɛn at tɛl dɛn, na dat nɔmɔ go de na dɛn ed fɔ du; bɔt dɛn wan we de du wetin Gɔd in Spirit tɛl dɛn fɔ du, na wetin di Spirit want nɔmɔ nain de na dɛn ed fɔ du.

⁶ If una jɛs de mɛmba wetin una at want nɔmɔ, dat go mek una day; bɔt if una jɛs de mɛmba wetin Gɔd in Spirit want nɔmɔ, una go gɛt di tru layf ɛn kol at.

⁷ So, if mɔtalman jɛs de mɛmba wetin in at want nɔmɔ, dat go mek i nɔ lɛk Gɔd; i nɔ go de du wetin Gɔd in lɔ se, ɛn i nɔ go ebul du am sɛf.

⁸ Dɛn pipul we jɛs de du wetin dɛn at tɛl dɛn fɔ du, nɔ go pliz Gɔd.

⁹ Bɔt una nɔ de du wetin una at gi una fɔ du, una de du wetin Gɔd in Spirit tɛl una, if Gɔd in Spirit de insay una. If Krays in Spirit nɔ de insay pɔsin, da pɔsin de nɔto Krays yon.

¹⁰ Bɔt if Krays de insay una, pan ɔl we una bɔdi go day bikɔs una dɔn sin, Gɔd in Spirit go mek una gɛt layf, bikɔs Krays dɔn mek ɔltin rayt bitwin una ɛn Gɔd.

¹¹ If Gɔd, we mek Jizɔs rayz frɔm di grev, in Spirit de insay una, Gɔd insɛf go mek in Spirit we de insay una mek una bɔdi we go day gɛt di tru layf.

¹² So mi kɔmpin Kristiɛn dɛn, wi mɔs du wetin Gɔd in Spirit tɛl wi fɔ du, nɔto wetin wi at tɛl wi fɔ du.

¹³ Bikɔs if una jɛs de du wetin una at tɛl una nɔmɔ, una go day, bɔt if una mek Gɔd in Spirit ɛp una fɔ kil dɛn tin we de mek una sin, una go gɛt di tru layf.

¹⁴ Dɛn pipul we de du wetin Gɔd in Spirit tɛl dɛn fɔ du, na Gɔd in pikin dɛn.

¹⁵ Di Spirit we Gɔd gi una nɔ mek una bi slev ɛn i nɔ de mek una fred, bɔt i mek una bi Gɔd in pikin dɛn ɛn nain de mek wi se, “Papa, mi Papa,” we wi de kɔl Gɔd.

¹⁶ Gɔd in Spirit wit wi yon spirit de tɔk di sem tin se wi na Gɔd in pikin dɛn.

¹⁷ We wi na Gɔd in pikin dɛn, wi go gɛt dɛn blɛsin we Gɔd dɔn prɔmis in pipul dɛn, semwe so, wi gɛt pan wetin Gɔd bin kip fɔ Krays. If wi sɔfa lɛkɛ aw Krays sɔfa, Gɔd go mek di wɔndaful layf we Krays gɛt bi wi yon.

Di Wɔndaful Tin dɛn we Gɔd Go Gi Wi

¹⁸ A shɔ se di sɔfa we wi de sɔfa naw, nɔ go kam klos ɔl di wɔndaful tin dɛn we Gɔd go mek bi to wi.

¹⁹ Ɔltin we Gɔd mek de wet ɛn dɛn want bad bad mek Gɔd sho dɛn in pikin dɛn.

²⁰ Gɔd mekɔp se ɔltin we i mek nɔ go min natin bambay, dɛn ɔl nɔ want dat fɔ bi, bɔt na dat Gɔd want. Ɔltin we Gɔd mek de abop se,

²¹ Gɔd go fri dɛn, so dat dɛn nɔ go rɔtin igen, dɛn go fri, lɛkɛ aw Gɔd in pikin dɛn dɔn fri.

²² Wi no se sote naw, i jɛs tan lɛkɛ se ɔl wetin Gɔd mek de pini bikɔs dɛn de fil pen lɛkɛ di pen we uman kin fil bifo i bɔn pikin.

²³ Nɔto dɛn tin ya we Gɔd mek nɔmɔ de pini; bɔt wi we gɛt Gɔd in Spirit, ɛn nain Spirit i gi wi fɔs, wisɛf de pini na wi at as wi de wet fɔ di tɛm we Gɔd go mek wi bi in pikin dɛn ɛn fri wi bɔdi, wɛn i gi wi nyu bɔdi.

²⁴ Bikɔs wi bin abop pan Gɔd, na dat mek i sev wi. Bɔt if wi dɔn si wetin wi de abop fɔ, wi nɔ go kɔl dat abop. Udat go abop fɔ tin we i dɔn si?

²⁵ Bɔt if wi de abop fɔ tin we wi nɔ si yet, wi go bia wet fɔ am.

²⁶ Semwe so, Gɔd in Spirit de ɛp wi, we wi nɔ ebul biliv pan Gɔd gud gud yet. Wi nɔ no aw fɔ pre, na Gɔd in Spirit insɛf de tɔk to Gɔd fɔ wi; di pini we i de pini gɛt minin to Gɔd we mɔtalman nɔ ebul ɔndastand ɔ tɔk.

²⁷ Gɔd, we no wetin mɔtalman want nain at, no wetin di Spirit min, bikɔs di Spirit de beg Gɔd fɔ in pipul dɛn ɛn i de tɔk wetin Gɔd insɛf want.

²⁸ Wi no se ɛnitin we mit wi, Gɔd de mek i bi fɔ wi yon gud, wi we lɛk am, ɛn we i dɔn kɔl fɔ du wetin i bin dɔn plan.

²⁹ Gɔd bin dɔn pik dɛn pipul we i bin dɔn mak fɔ tan lɛkɛ in Pikin, so dat in Pikin go bi di fɔs pikin pan in plɛnti brɔda dɛn.

³⁰ So Gɔd kɔl dɛn pipul we i bin dɔn pik; dɛn pipul we i kɔl, i mek ɔltin rayt bitwin dɛn ɛn insɛf; wɛn i dɔn mek ɔltin rayt bitwin dɛn ɛn insɛf, i mek sɔm pan di wɔndaful layf we Krays gɛt bi dɛn yon.

Jizɔs Krays Sho Wi Aw Gɔd Lɛk Wi

³¹ Wɛn wi luk ɔl dɛn tin ya, wetin wi go se? If Gɔd de fɔ wi, nɔbɔdi nɔ go ebul wi.

³² Gɔd nɔ kip in Pikin mek i nɔ sɔfa, i sakrifays am fɔ wi ɔl! Gɔd we sakrifays in Pikin fɔ wi ɔl, i nɔ go gi wi ɔltin fri?

³³ Udat go se Gɔd in pipul dɛn du bad? Gɔd insɛf dɔn mek ɔltin rayt bitwin in ɛn dɛn.

³⁴ So ɛnibɔdi de we go se Gɔd in pipul dɛn du bad? Jizɔs Krays na di wan we dɔn day fɔ wi, ɔ a fɔ se, nain Gɔd mek rayz frɔm di grev ɛn i sidɔm na Gɔd in raytan. I de beg Gɔd fɔ wi.

³⁵ Udat ɔ wetin go mek di lɛk we Krays lɛk wi tap fɔ rich wi? Natin: trɔbul, traŋa layf, di sɔfa we pipul de mek wi sɔfa, aŋri, po, denja, ɔ day sɛf nɔ go ebul mek di lɛk we Krays lɛk wi tap fɔ rich wi.

³⁶ Lɛkɛ aw dɛn rayt na Gɔd in Buk we dɛn se, “Papa Gɔd, na fɔseka yu, pipul de tray fɔ kil wi ɔltɛm; dɛn de trit wi lɛkɛ ship we dɛn gɛt fɔ kil.”

³⁷ Bɔt insay ɔl dɛn tin ya, we de bi to wi, di wan we lɛk wi de mek wi ebul win ɔltɛm.

³⁸ A shɔ se natin nɔ ebul tap wi fɔ fil di lɛk we i lɛk wi: day ɔ layf, enjɛl ɔ dɛn bad spirit we de rul ɔ dɛn pawa na di klawd, dis tɛm ya ɔ di tɛm we de kam;

³⁹ di wɔl we de pantap ɔ di wɔl we de ɔnda natin nɔ de we Gɔd mek we go ebul mek di lɛk we Gɔd lɛk wi we Jizɔs Krays wi Masta dɔn sho wi, tap fɔ rich wi.