Di Nɔmba Dɛm 35 - Krio Fɔs Oli Baybul

Di Big Tɔŋ Dɛn We Dɛn Gi Di Livayt Dɛn

¹ We dɛn de na di flat grɔn bay Riva Jɔdan, PAPA GƆD tɛl Mozis se,

² “Ɔda di Izrɛlayt dɛn fɔ gi di Livayt dɛn siti dɛn fɔ tap frɔm di prɔpati we di Izrɛlayt dɛn gɛt as dɛn yon. Dɛn fɔ mek shɔ se ples de fɔ dɛn animal dɛn rawnd di siti dɛn.

³ Da tɛm de dɛn go gɛt siti dɛn fɔ de ɛn ples go de we ɔl dɛn animal dɛn go de it de.

⁴ Di land fɔ di animal dɛn fɔ bi fayv ɔndrɛd yad rawnd di siti in wɔl.

⁵ We yu de kɔmɔt na di siti, yu fɔ mɛzhɔ wan tawzin yad bay ɔlsay so dat di siti go de midul. Dis eria we de rawnd di siti fɔ bi di ples fɔ di ɔda animal dɛn fɔ it.

⁶ PAPA GƆD se, “Siks pan di siti dɛn we dɛn de gi di Livayt dɛn fɔ bi siti dɛn we pɔsin we dɔn kil pɔsin kin rɔn go ayd. Wit da wande, dɛn fɔ ad foti-tu ɔda siti de.

⁷ Ɔl ɛn ɔl una fɔ gi di Livayt dɛn, foti-et siti ɛn dɛn ɔl fɔ gɛt eria we dɛn animal dɛn go de it.

⁸ Di siti dɛn we una de gi di Livayt dɛn fɔ bi bay di prɔpati we di Izrɛlayt dɛn gɛt bay di fambul we dɛn blant, dat na fɔ tek plɛnti siti na di fambul we gɛt plɛnti in an ɛn sɔm nɔmɔ na di fambul we gɛt smɔl in an.

Dɛn Big Tɔŋ Dɛn We Fɔ Go Ayd

⁹ Dɛn PAPA GƆD tɛl Mozis se,

¹⁰ “Tɛl di Izrɛlayt dɛn se wɛn dɛn krɔs Riva Jɔdan go Kenan,

¹¹ dɛn fɔ pik sɔm siti dɛn we pɔsin we dɔn kil pɔsin bay mistek kin go ayd.

¹² Na ples we dɛn go rɔn go fɔ mek di pɔsin we in pɔsin day nɔ go kil am bay wamat we i nɔ go gɛt chans fɔ mek bare yɛri wetin in go gɛt fɔ se.

¹³ Na dɛn siks siti de go de fɔ di pɔsin we dɔn kil pɔsin bay mistek fɔ go ayd.

¹⁴ Tri pan dɛn fɔ de na dis say ya dɔn di ɔda tri go de na Kenan fɔ dat.

¹⁵ Dɛn siks siti ya go de fɔ di Izrɛlayt dɛn, di trenja dɛn ɔ ɛnibɔdi we de wit dɛn so dat i go rɔn go ayd ɛnitɛm we i mistek kil pɔsin.

¹⁶ If ɛniwan tek ayɛn nak in kɔmpin we mek i day, in na mɔdra; dɛn fɔ kil ɛnibɔdi we kil in kɔmpin bay wilful.

¹⁷ Ɔ if ɛnibɔdi tek ston we kin kil wap in kɔmpin ɛn i day, nain kil am; dɛn fɔ kil pɔsin we kil in kɔmpin bay wilful.

¹⁸ Ɔ if ɛnibɔdi ol ɛnitin we dɛn tek wud mek, ɛn i kin kil, dɔn i tek am nak pɔsin we mek i day, nain kil am; dɛn fɔ kil pɔsin we kil in kɔmpin bay wilful.

¹⁹ Di pɔsin we day in fambul gɛt rayt fɔ kil di wan we kil ɛn ɛnitɛm dɛn brakɛt, i go kil am.

²⁰ If ɛnibɔdi we bin dɔn de mɛmba bad fɔ in kɔmpin push am ɔ trowe sɔntin pan am bay wilful we mek i day,

²¹ ɔ if wit in wamat i bɔks am ɛn i day, dɛn fɔ kil da pɔsin de bikɔs i dɔn kil pɔsin. Di dayman in fambul fɔ kil am if dɛn tu brakɛt.

²² Bɔt if nɔto wit wamat pɔsin jɛs push in kɔmpin ɔ i mistek trowe sɔntin pan am,

²³ ɔ if i nɔ si am i ib ston dɔŋ we kil am ɛn i day, wans nɔto bin in ɛnimi, ɛn i nɔ bin min fɔ du am bad,

²⁴ di Izrɛlayt kɔmyuniti fɔ disayd wetin go apin bitwin di pɔsin we day in fambul ɛn in we kil am bay wetin di lɔ se.

²⁵ Di kɔmyuniti fɔ mek di dayman in fambul nɔ kil di man so dɛn fɔ gri fɔ lɛ i lɛf na di siti we i bin dɔn rɔn go ayd mek dɛn nɔ go kil am. I fɔ lɛf de te di edman fɔ dɛn man we de mek sakrifays fɔ pipul sin day.

²⁶ If dis man ya kɔmɔt insay di siti we i bin dɔn rɔn go ayd,

²⁷ ɛn di dayman in fambul brakɛt am, di dayman in fambul kin kil am ɛn nɔbɔdi nɔ go ol am se i kil pɔsin.

²⁸ Di man we bin rɔn go ayd na di siti mek dɛn nɔ kil am, kin de de te afta di edman fɔ dɛn man we de mek sakrifays fɔ pipul sin dɔn day; nain i kin go bak usay i bin tap.

²⁹ Na dɛn tin dɛn ya bay lɔ fɔ de ɛnisay we una de na ɔl di jɛnareshɔn dɛn.

³⁰ Fɔ kil ɛnibɔdi we kil ɔda pɔsin pas if pipul dɛn de we go tɔk se nɔto bay wilful. Bɔt if at list wan pɔsin dɔn tɔk se nɔto bay wilful, nɔ fɔ kil di pɔsin.

³¹ Nɔ fɔ gri mek pɔsin gi ɛni pan in prɔpati fɔ di pe fɔ ɛnibɔdi we i kil, insɛf fɔ day.

³² Nɔ fɔ gri mek pɔsin we rɔn go ayd na di siti fɔ mek dɛn nɔ kil am, pe so dat i go go nain os bak we di edman fɔ dɛn man we de mek sakrifays fɔ pipul sin nɔ day yet.

³³ Nɔ bamfa di land we una de. If dɛn kil pɔsin de, dat go bamfa di land ɛn nɔn kayn we nɔ de fɔ beg fɔ land usay dɛn dɔn kil pɔsin, pas dɛn kil di pɔsin we kil pɔsin de.

³⁴ Una nɔ pwɛl di land we una de ɛn we na de misɛf de, bikɔs, mi, PAPA GƆD de wit di Izrɛlayt dɛn.