Di Nɔmba Dɛm 31 - Krio Fɔs Oli Baybul

Di Wa We PAPA PAPA GƆD Mek Wit Midian

¹ Dɛn PAPA GƆD tɛl Mozis se,

² “Go fɛt di Midianayt dɛn fɔ wetin dɛn bin du di Izrɛlayt dɛn. Afta dat yu go day go mit yu pipul dɛn.

³ So Mozis tɛl di pipul dɛn fɔ rɛdi dɛn wɛpɔn bikɔs sɔm pan dɛn de go fɛt di Midianayt dɛn fɔ sho se PAPA GƆD vɛks pan dɛn.

⁴ I tɛl dɛn se ɔl di fambul dɛn na Izrɛl fɔ sɛn wan wan tawzin man fɔ go fɛt di wa.

⁵ So na twɛlv tawzin man gɛda, wan wan tawzin frɔm ɔl di fambul dɛn na Izrɛl, wit ɔl dɛn wɛpɔn fɔ go fɛt di fɛt.

⁶ Mozis sɛn dɛn ɔl, wan wan tawzin frɔm ɔl di fambul dɛn na Izrɛl, togɛda wit Finɛas, we na Ɛlieza di man we de mek sakrifays fɔ di pipul dɛn sin, in bɔypikin. In kɛr di tin dɛn we de na di ples we oli pas ɔl ɛn di trɔmpɛt dɛn fɔ de blo fɔ mek signal.

⁷ Dɛn ɛn di Midianayt dɛn fɛt lɛk aw PAPA GƆD bin tɛl Mozis ɛn dɛn kil ɔlman.

⁸ Pan di wan dɛn we dɛn kil na Ɛvi, Rɛkɛm, Zɔ, Ɔ, ɛn Rɛba we na di fayv kiŋ na Midian. Dɛn bin kil Belam we na Beɔ in bɔypikin sɛf na di fɛt we dɛn fɛt.

⁹ Di Izrɛlayt dɛn kapchɔ di Midianayt uman ɛn pikin dɛn, ɛn siz dɛn animal dɛn ɛn ɔl wetin dɛn gɛt.

¹⁰ Dɛn bɔn ɔl di siti dɛn usay di Midianayt dɛn bin dɔn sɛtul ɛn di kamp dɛn we dɛn bin dɔn mek.

¹¹ Dɛn tek ɔl di tin dɛn we dɛn bin dɔn siz, wit na di pipul dɛn ɛn di animal dɛn.

¹² Dɛn kɛr dɛn go to Mozis ɛn Ɛlieza we na di man we de mek sakrifays fɔ pipul sin wit ɔl di ɔda Izrɛlayt dɛn, as dɛn gɛda na dɛn kamp pantap di flat grɔn na Moab bay di Jɔdan Riva na Jɛriko.

Di Sojaman Dɛn Tɔn Bak

¹³ Mozis, Ɛlieza we na di man we de mek sakrifays fɔ pipul sin wit ɔl di lida dɛn na di kɔmyuniti kɔmɔt na di kamp go mit di sojaman dɛn.

¹⁴ Mozis bin vɛks wit ɔl di kɔmanda dɛn we kam bak afta di fɛt.

¹⁵ I aks dɛn wetin mek dɛn nɔ kil di uman dɛn.

¹⁶ I se na di uman dɛn du wetin Belam se ɛn na dɛn bin mek di Izrɛlayt dɛn pul at pan PAPA GƆD na Peɔ we mek bad bad sik we kil dɛn fɔdɔm pan PAPA GƆD in pipul dɛn.

¹⁷ I se dɛn fɔ kil ɔl di bɔbɔ dɛn ɛn di uman dɛn we nɔto vajin.

¹⁸ I tɛl dɛn se dɛn kin tek ɔl di vajin dɛn fɔ dɛnsɛf.

¹⁹ I se ɛnibɔdi we dɔn kil pɔsin ɔ tɔch ɛnibɔdi we dɛn kil, fɔ kɔmɔt na di kamp fɔ sɛvin de. Di de we mek tri ɛn di de we mek sɛvin, dɛn fɔ was dɛnsɛf ɛn di wan we dɛn kapchɔ we de wit dɛn, mek dɛn go klin na PAPA GƆD yay.

²⁰ I se dɛn fɔ mek shɔ se ɔl dɛn klos dɛn klin bifo PAPA GƆD wit ɛnitin we dɛn mek wit lɛda, got ia ɔ wud.

²¹ Dɛn Ɛlieza di man we de mek sakrifays fɔ pipul sin, tɛl di sojaman dɛn we go fɛt se, di lɔ we PAPA GƆD gi Mozis se,

²² gold, silva, bras, ayɛn, tin, lɛd,

²³ ɛn ɛni ɔda tin we nɔ go pwɛl if i go na faya, fɔ go de. Di lɔ se na da tɛm de i go klin. I se bɔt dɛn fɔ was am bak wit da wata we de mek dɛn klin na PAPA GƆD yay. Dɔn wetin go pwɛl we i go na faya, i se, dɛn jɛs gɛt fɔ was am wit da wata de mek i go klin na PAPA GƆD yay.

²⁴ Di de we mek sɛvin, dɛn fɔ was dɛn klos dɛn fɔ klin na PAPA GƆD yay. Dɛn i se, da tɛm de dɛn kin go insay di kamp.

Dɛn Sheb Di Tin Dɛn We Dɛn Siz

²⁵ PAPA GƆD tɛl Mozis se,

²⁶ “Yu ɛn Ɛlieza di man we de mek sakrifays fɔ pipul sin ɛn ɔl di big wan dɛn na di famili dɛn na di kɔmyuniti fɔ kɔnt ɔl di pipul dɛn we dɛn kech ɛn di animal dɛn we dɛn siz.

²⁷ Sheb ɔl di tin dɛn gi di sojaman dɛn we go fɛt ɛn di balans pipul dɛn na di kɔmyuniti.

²⁸ Pan wetin di wan dɛn we go fɛt fɔ gɛt, put wan pan ɛni fayv ɔndrɛd wansay fɔ PAPA GƆD, wɛda na mɔtalman, ɔ na kaw, ɔ na ship ɔ na got ɔ dɔŋki.

²⁹ Tek pan di af we dɛn fɔ gɛt gi Ɛlieza we na di man we de mek sakrifays fɔ pipul sin wetin fɔ bi PAPA GƆD in yon.

³⁰ Pan di af we di ɔda Izrɛlayt dɛn fɔ gɛt, pul wan pan ɛni fifti wɛda na mɔtalman ɔ kaw ɔ dɔŋki ɔ ship ɔ got, ɛn gi di Livayt dɛn as na dɛn de kia fɔ PAPA GƆD in tɛnt.

³¹ So Mozis ɛn Ɛlieza we na di man we de mek sakrifays fɔ pipul sin du wetin PAPA GƆD tɛl Mozis.

³² Di tin dɛn we lɛf pan ɔl wetin di sojaman dɛn siz na 675,000 ship,

³³ 72,000 kaw,

³⁴ 61,000 dɔŋki

³⁵ ɛn 32,000 vajin.

³⁶ Af ɔf dɛn, nain dɛn gi di sojaman dɛn we fɛt di fɛt. Dat na 337,500 ship,

³⁷ bɔt 675 na fɔ PAPA GƆD;

³⁸ 36,000 kaw, bɔt 72 na fɔ PAPA GƆD;

³⁹ 30,500 dɔŋki, bɔt 61 na fɔ PAPA GƆD;

⁴⁰ 16,000 vajin, bɔt 32 na fɔ PAPA GƆD.

⁴¹ Mozis gi di wan dɛn we na fɔ PAPA GƆD to Ɛlieza we na di man we de mek sakrifays fɔ pipul sin lɛk aw PAPA GƆD bin tɛl am.

⁴² Di ɔda af pan di tin dɛn we dɛn siz na fɔ di ɔda Izrɛlayt dɛn we nɔ go fɛt.

⁴³ Wetin di kɔmyuniti gɛt na 337,500 ship,

⁴⁴ 36,000 kaw,

⁴⁵ 30,500 dɔŋki.

⁴⁶ Ɛn 16,000 vajin.

⁴⁷ Pan di ɔda Izrɛlayt dɛn yon af, Mozis pul wan kɔmɔt pan ɛni fifti as PAPA GƆD se, ɛn gi di Livayt dɛn we na dɛn de kia fɔ PAPA GƆD in Tɛnt usay dɛn kin mit PAPA GƆD.

⁴⁸ Di ami kɔmanda dɛn go mit Mozis,

⁴⁹ ɛn tɛl am se, dɛn dɔn kɔnt ɔl dɛn man dɛn ɛn dɛn nɔ lɔs nɔbɔdi.

⁵⁰ Dɛn se, so dɛnsɛf dɔn briŋ di tin dɛn we mek wit gold kam gi PAPA GƆD fɔ beg am padin fɔ dɛn sin. Dɛn se di tin dɛn we dɛn briŋ na baŋuls, riŋ, yerin ɛn chen dɛn.

⁵¹ Mozis ɛn Ɛlieza we na di man we de mek sakrifays fɔ pipul sin, tek di tin dɛn we dɛn mek wit gold na dɛn an.

⁵² Di tin dɛn we dɛn mek wit gold we di kɔmanda dɛn kam gi Mozis ɛn Ɛlieza fɔ gi PAPA GƆD we bɔt sɔm 420 pawns.

⁵³ Dɛn ɔl we na sojaman bin gɛt wetin dɛn tek fɔ dɛnsɛf.

⁵⁴ Mozis ɛn Ɛlieza we na di man we de mek sakrifays fɔ pipul sin tek di tin dɛn ɛn briŋ dɛn kam na di Tɛnt usay dɛn kin mit PAPA GƆD. So wɛn dɛn si dɛn, dɛn go de mɛmba wetin PAPA GƆD du fɔ dɛn.