Mak 16 - Krio Fɔs Oli Baybul

Jizɔs Rayz frɔm di Grev

¹ Wɛn di de fɔ pre ɛn blo pas, Meri we kɔmɔt Magdala, Meri we na Jems in mama, ɛn Salomi, bay spays we gɛt fayn sɛnt ɛn kɛr am go fɔ rɔb pan Jizɔs in bɔdi.

² Ali Sɔnde mɔnin bifo san kɔmɔt, dɛn tri uman ya go na di ston grev.

³ Dɛn se, “Udat go pul di ston we dɛn tek kɔba di grev domɔt fɔ wi?”

⁴ (Na bin big big ston.) Bɔt wɛn dɛn luk di grev, dɛn si se di ston we dɛn bin tek kɔba di grev domɔt dɔn rol kɔmɔt de.

⁵ Wɛn dɛn de go insay di grev, dɛn si wan yɔŋ man we wɛr lɔŋ wayt klos, i bin sidɔm na di raytan say. Di uman dɛn fred!

⁶ Di man se, “Una nɔ fred! Na Jizɔs we kɔmɔt Nazarɛt, we dɛn bin nel pan di krɔs una kam luk fɔ. I nɔ de ya, i dɔn rayz frɔm di grev. Una luk di ples we dɛn bin le am.

⁷ Una go tɛl Pita ɛn di ɔda lanin bɔy dɛn se, ‘I dɔn go bifo una na Galili, una go mit am de, lɛkɛ aw i bin dɔn tɛl una fɔ du.’”

⁸ Di uman dɛn kɔmɔt na di grev ɛn rɔn go to di lanin bɔy dɛn; na so dɛn bin de trimbul, bikɔs dɛn bin de fred. Di fred we dɛn bin de fred mek dɛn nɔn nɔ ebul tɔk sɛf we dɛn de go. [

AW DIS BUK ƐND NA SƆM PAN DƐN FƆS BUK WE DƐN BIN RAYT Jizɔs Sho Insɛf to Meri we Kɔmɔt Magdala

⁹ Ali Sɔnde mɔnin we Jizɔs rayz frɔm di grev, i sho insɛf fɔs to Meri we kɔmɔt Magdala, di uman we bin gɛt sɛvin dɛbul insay am we Jizɔs drɛb.

¹⁰ Meri go mit di pipul dɛn we bin de wit Jizɔs, ɛn tɛl dɛn ɔl wetin bi; da tɛm de dɛn bin stil de kray fɔ Jizɔs.

¹¹ Dɛn nɔ biliv Meri wɛn i tɛl dɛn se Jizɔs dɔn gɛt layf bak ɛn in dɔn si am.

Jizɔs Sho Insɛf to Tu Man dɛn

¹² Wɛn dat pas, tu man dɛn we bin biliv pan Jizɔs bin de go na wan vilej, na de Jizɔs sho insɛf difrɛn we to dɛn frɔm aw i bin sho insɛf to Meri.

¹³ Di tu man dɛn tɔn bak go tɛl dɛn kɔmpin wetin bi, bɔt dɛn nɔ biliv wetin dɛn tɛl dɛn.

Jizɔs Sho Insɛf to In Ilɛvin Lanin Bɔy dɛn

¹⁴ Wɛn dat dɔn, Jizɔs sho insɛf to in ilɛvin lanin bɔy dɛn wɛn dɛn bin de it. I tɔk pan dɛn fɔ we dɛn nɔ bin biliv lɛkɛ aw dɛn fɔ biliv, ɛn fɔ we dɛn bin traŋayes, ɛn we dɛn nɔ bin biliv dɛn pipul we si am afta i rayz frɔm di grev.

¹⁵ Jizɔs se, “Una go ɔlɔbɔt na di wɔl ɛn tɛl ɔlman di Gud Nyuz bɔt mi.

¹⁶ Ɛnibɔdi we biliv di Gud Nyuz ɛn gri fɔ mek dɛn baptayz am, Gɔd go sev am. Bɔt ɛnibɔdi we nɔ biliv di Gud Nyuz, Gɔd go kɔndɛm am.

¹⁷ Dɛn pipul we biliv di Gud Nyuz, a go gi dɛn pawa fɔ du wɔndaful wok: dɛn go drɛb dɛbul fɔseka mi; dɛn go tɔk laŋwej we dɛn nɔ lan;

¹⁸ if dɛn ol snek ɔ if dɛn drink pɔyzin sɛf, natin nɔ go du dɛn; dɛn go put dɛn an pan pipul we sik ɛn pre fɔ dɛn, ɛn di pipul dɛn go wɛl.”

Jizɔs Go na Ɛvin

¹⁹ Wɛn Masta Jizɔs dɔn tɔk to in lanin bɔy dɛn, Gɔd tek am go ɔp na ɛvin, i go sidɔm na Gɔd in raytan.

²⁰ Di lanin bɔy dɛn go ɔlɔbɔt na wɔl de tɛl pipul di Gud Nyuz, ɛn di Masta bin de ɛp dɛn, ɛn mek dɛn du plɛnti wɔndaful wok we fɔ mek pipul no se na tru dɛn de tɔk.] 9 Di uman dɛn go to Pita ɛn in kɔmpin dɛn ɛn tɛl dɛn ɔl wetin di yɔŋ man tɛl dɛn, dɛn nɔ tek lɔŋ fɔ du dat. 10 Afta dat, Jizɔs sɛn in lanin bɔy dɛn go ɔlɔbɔt na wɔl fɔ tɛl pipul di mɛsej bɔt aw Gɔd go sev dɛn, dat na di mɛsej we go de sote go ɛn we Gɔd insɛf sɛn kam na wɔl.