Lɛvitikɔs 26 - Krio Fɔs Oli Baybul

Blɛsin Fɔ Udat Yɛri Wɔd

¹ Mozis tɛl di Izrɛlayt dɛn se dɛn nɔ fɔ mek ɛni dɛn smɔl smɔl gɔd fɔ de pre to ɛn put ɛnitin we dɛn mek fɔ fiba tin we gɛt layf fɔ de pre to ɔ ɛni pila nɔ fɔ tinap fɔ de pre to, ɛn nɔ fɔ mek ɛnitin we fiba tin fɔ wɔship na di land we dɛn go gɛt fɔ baw to ɛn wɔship; i se bikɔs nain na PAPA GƆD we na dɛn GƆD.

² Pɔsin fɔ mɛmba fɔ blo di de we mek sɛvin ɛn rɛspɛkt usay dɛn kin wɔship am: i se nain na PAPA GƆD.

³ Mozis se if dɛn obe di lɔ dɛn ɛn du ɔl wetin i se fɔ du,

⁴ dɛn PAPA GƆD go mek ren kam di tɛm we i fɔ kam so dat di tin dɛn we dɛn plant go gro.

⁵ Dɛn go so gɛt bɔku dat dɛn go de avɛst te di tɛm we dɛn rɛdi fɔ plant, ɛn dɛn go de plant te di tɛm fɔ avɛst. It go de ɔltɛm ɛn ɔlman go gɛt kol at.

⁶ Mozis se dɛn go gɛt kolat ɛn dɛn go go lidɔm slip ɛn nɔ gɛt natin fɔ wɔri bɔt; ɛn PAPA GƆD go mek dɛn bad bad animal dɛn nɔ de na di land ɛn dɛn nɔ go fred. I se wa nɔ go de de igen

⁷ Dɛn go ebul dɛn ɛnimi dɛn ɛn win dɛn na wa.

⁸ Na fayv man nɔmɔ go win wan ɔndrɛd man, dɔn na wan ɔndrɛd man go win tɛn tawzin; ɔl dɛn ɛnimi dɛn we fɛt dɛn na wa go lɔs di wa.

⁹ Ɛn PAPA GƆD go sho dɛn aw i gud ɛn mek dɛn bɔn bɔku pikin dɛn, fɔ mek dɛn go de ɔlsay na di wɔl, ɛn kip di Kɔvinant wit dɛn.

¹⁰ Dɛn go de it di it we dɛn bin kip fɔ lɔŋ so dɛn go gɛt fɔ mek shɔ se dɛn du sɔntin so dat di it go dɔn we go mek ples fɔ kip nyu wan dɛn.

¹¹ PAPA GƆD se in go tap wit di Izrɛlayt dɛn ɛn nainsɛf go de wit dɛn ɔltɛm.

¹² I se in go de midul dɛn ɔltɛm ɛn i go kɔntinyu fɔ bi dɛn PAPA GƆD, ɛn dɛn go bi in pipul.

¹³ I se PAPA GƆD se nain na PAPA GƆD we na dɛn GƆD we pul dɛn kɔmɔt pan slev layf na Ijipt, so dat dɛn nɔ go bi di Ijipshian dɛn slev; i dɔn pul da lod de kɔmɔt na dɛn ed ɛn naw dɛn kin waka friwan wit dɛn ed ɔp.

Di Swɛ Dɛn Fɔ Traŋayes

¹⁴ Mozis tɛl di pipul dɛn se, lɛ dɛn lisin to wetin PAPA GƆD se. I se if dɛn nɔ rɛspɛkt ɛn biliv PAPA GƆD ɛn du ɔl wetin i dɔn tɛl dɛn fɔ du,

¹⁵ if dɛn mek nɔ bizin bɔt in lɔ dɛn, we mek dɛn nɔ go wan du wetin dɛn se, ɛn nɔ kip in Kɔvinant wit dɛn,

¹⁶ na dɛn tin ya i go du: i go mek siriɔs waala mit dɛn we go mek dɛn sik bad wit ay ay fiva we go mek dɛn yay de rɔn wata ɔltɛm ɛn dɛn bɔdi de wes. Ɛn dɛn go plant fɔ natin bikɔs na dɛn ɛnimi dɛn go gɛt fɔ it wetin dɛn plant.

¹⁷ I go dison dɛn ɛn mek dɛn ɛnimi dɛn win dɛn; di wan dɛn we et dɛn, go rul dɛn ɛn dɛn go de rɔn ivin we nɔbɔdi nɔ de rɔnata dɛn.

¹⁸ If pan ɔl dat, dɛn stil nɔ yɛri wɔd dɛn i go pɔnish dɛn at at wan fɔ dɛn sin dɛn,

¹⁹ ɛn di gbiŋbin we dɛn de mek fɔ dɛn pawa dɔn, ɛn PAPA GƆD nɔ go mek ren kam we go mek di land bia tin fɔ it. Dɛn ɔl go traŋa lɛk ayɛn;

²⁰ da tɛm de dɛn go jɛs de wes dɛn tɛm fɔ natin bikɔs natin nɔ gɛt fɔ gro na di grɔn.

²¹ I se if dɛn stil mek traŋayes ɛn nɔ lisin to am, i go kɔntinyu fɔ pɔnish dɛn at at wan fɔ dɛn sin dɛn.

²² I go mek dɛn bad bad animal kil dɛn pikin dɛn, dɛn animal dɛn we dɛn de mɛn na os ɛn dɛn nɔ go bɛtɛ igen we go mek dɛn trit dɛn dray bikɔs pipul nɔ go de fɔ de waka ɔp ɛn dɔŋ.

²³ Ɛn if ɔl dat nɔ mek dɛn chenj bɔt kɔntinyu fɔ mek traŋayes,

²⁴ dɛn nainsɛf go pɔnish dɛn at at wan fɔ dɛn sin dɛn.

²⁵ I go mek dɛn ɛnimi dɛn atak dɛn bikɔs dɛn dɔn brok in Kɔvinant; ɛn if dɛn ɔl go ayd na dɛn siti dɛn, i go ib sik pan dɛn we go prɛd ɛn kil bɔku pipul, ɛn dat go mek dɛn ɛnimi dɛn ebul dɛn.

²⁶ Wɛn i go mek una nɔ gɛt it fɔ it, tɛn uman go ebul bek na waŋren ovin, di uman dɛn go gɛt fɔ sheb it bay wet, we pan ɔl we dɛn go it, dɛn nɔ go ɛva satisfay.

²⁷ Ɛn if wit ɔl dɛn tin ya, dɛn stil mek traŋayes ɛn nɔ lisin to am,

²⁸ dɛn insɛf go mek traŋayes ɛn nɔ lisin to dɛn bikɔs i vɛks bad ɛn nainsɛf go pɔnish dɛn fɔ dɛn sin dɛn.

²⁹ Dɛn go ivin it dɛn pikin dɛn we it nɔ go de.

³⁰ PAPA GƆD go pwɛl pwɛl ɔl di ples dɛn we dɛn bil fɔ wɔship dɛn ɔda gɔd dɛn wit di insɛns ɔlta dɛn we dɛn go dɔn bil fɔ dɛn ɛn na pan dɛn brok brok bɔdi i go ib di wan dɛn we de wɔship dɛn, dɛn dedebɔdi. I nɔ go de wit dɛn igen

³¹ I go pwɛl dɛn siti dɛn kpatakpata ɛn ɔl di ples dɛn we dɛn kin go wɔship nɔ go fit fɔ go igen ɛn ivin di smɛl we go de kɔmɔt pan dɛn sakrifays dɛn nɔ go mek i gladi.

³² I se in go so nyamanyama di land dat dɛn ɛnimi dɛn we bin dɔn go tap de bay fos go wɔnda.

³³ Dɛn go skata ɔlɔbɔt we dɛn ɛnimi dɛn go jɛs de atak dɛn; di land go pwɛl kpatakpata ɛn di siti dɛn ɔl go pwɛl.

³⁴ Dat go mek di blo we dɛn nɔ bin mek di land blo we di sɛvin ia fɔ blo bin kam, nain i go blo we dɛn nɔ go de de.

³⁵ Wans i dɔn pwɛl kpatakpata, i go blo di blo we dɛn nɔ bin mek i blo we di sɛvin ia fɔ blo bin kam wɛn dɛn bin tap de.

³⁶ I se i go mek di wan dɛn we lɛf nɔ biliv pan dɛnsɛf; if lif shek sɛf, dɛn go fred se dɛn ɛnimi dɛn de rɔnata dɛn; dɛn go de rɔn lɛk udat de rɔn kɔmɔt na wa bɔt nɔbɔdi nɔ go de rɔnata dɛn.

³⁷ Dɛn go wund dɛnsɛf fɔ natin we dɛn go de fɔdɔm pan dɛnsɛf wit fred lɛkɛ udat dɛn atak bɔt nɔbɔdi nɔ go de rɔnata dɛn; ɛn dɛn nɔ go gɛt maynd fɔ fes dɛn ɛnimi dɛn.

³⁸ Na ɛgzayl dɛn go day ɛn na de dɛn go bɛr dɛn na dɛn ɛnimi dɛn land.

³⁹ Di wan dɛn we lɛf go jɛs wes na di ɛnimi dɛn land bikɔs ɔf dɛn sin dɛn ɛn bikɔs dɛn fɔstɛm-papa dɛnsɛf bin dɔn sin.

⁴⁰ I se if di wan dɛn we lɛf kɔnfɛs dɛn sin dɛn wit dɛn fɔstɛm-papa dɛn sin dɛn, we dɛn bin stil de mek traŋayes ɛn nɔ lisin to am,

⁴¹ we bin mek PAPA GƆD insɛf mek traŋayes ɛn nɔ lisin to dɛn bifo dat i mek dɛn go ɛgzayl na dɛn ɛnimi dɛn land; if dɛn we lɛf nɔ mek traŋayes bɔt lisin to PAPA GƆD ɛn aksɛpt di pɔnishmɛnt fɔ dɛn sin;

⁴² dɛn PAPA GƆD go mɛmba di Kɔvinant wit dɛn fɔstɛm-papa dɛn we na Ebaam, Ayzak ɛn Jekɔb ɛn i go mɛmba wetin i bin se bɔt di land.

⁴³ Bɔt di pipul go gɛt fɔ lɛf di land mek i blo di blo we dɛn bin fɔ mek i blo di sɛvin ia we i bin fɔ blo bikɔs PAPA GƆD go dɔn pwɛl am kpatakpata; ɛn dɛn go aksɛpt di pɔnishmɛnt fɔ dɛn sin dɛn we na bikɔs dɛn nɔ bin bisin bɔt in lɔ dɛn.

⁴⁴ Bɔt pan ɔl dat, we dɛn de na dɛn land, PAPA GƆD, in, go bisin bɔt dɛn, ɛn in nɔ go dɔnawe wit dɛn we go mek i brok di Kɔvinant bikɔs nain na PAPA GƆD we na dɛn GƆD;

⁴⁵ bɔt i go mɔs mɛmba di Kɔvinant we i bin dɔn mek wit dɛn fɔstɛm-papa dɛn we i pul kɔmɔt pan slev layf na Ijipt fɔ sho ɔda neshɔn dɛn aw i pawaful, so dat i go bi dɛn GƆD; nain na PAPA GƆD.

⁴⁶ Na di lɔ dɛn dis we PAPA GƆD gi Mozis fɔ gi di Izrɛlayt dɛn na Mawnt Saynay.