Lɛvitikɔs 12 - Krio Fɔs Oli Baybul

Aw Uman Fɔ Mek Insɛf Klin Na PAPA GƆD Yay Afta I Bɔn Pikin

¹ PAPA GƆD tɛl Mozis se,

² fɔ tɛl di Izrɛlayt dɛn se we uman bɔn bɔbɔ, i nɔ de klin na PAPA GƆD yay fɔ sɛvin de; jɛs lɛkɛ aw i nɔ go klin na PAPA GƆD yay we i de si in piriɔd.

³ Di de we mek et afta i bɔn, i fɔ sakɔmsayz di pikin.

⁴ Dɛn i fɔ wet fɔ tati-tri mɔ de te di blɔd dɔn dray gud ɛn i dɔn klin na PAPA GƆD yay; bay da tɛm de i nɔ fɔ tɔch ɛnitin we oli, ɛn i nɔ fɔ go na di tɛnt usay dɛn kin mit PAPA GƆD in domɔt, te i dɔn du wetin fɔ mek i klin na PAPA GƆD yay.

⁵ Bɔt if na gyal pikin i bɔn, i nɔ de klin na PAPA GƆD yay fɔ tu wik, jɛs lɛk we i de si in piriɔd; i go de so fɔ siksti-siks de mɔ.

⁶ Ɛn wɛn i dɔn mek insɛf klin, wɛda na bɔbɔ ɔ na gyal pikin i bɔn, i fɔ kɛr wan yɔŋ ship we ol wan ia fɔ bɔn ɔfrin ɛn wan yɔŋ ɔdinari pijin ɔ wan bush pijin fɔ sin ɔfrin. I fɔ kɛr dɛn go gi di man we de mek sakrifays fɔ pipul sin na di tɛnt usay dɛn kin mit PAPA GƆD, in domɔt,

⁷ ɛn in go gi PAPA GƆD as ɔfrin ɛn beg padin fɔ am; na da tɛm de i go klin na PAPA GƆD yay we in blɔd go dɔn dray.

⁸ If i nɔ mitɔp fɔ bay di yɔŋ ship, dɛn i go kɛr tu yɔŋ bush pijin ɔ tu ɔdinari pijin, wan fɔ di bɔn ɔfrin ɛn di ɔda wan fɔ di sin ɔfrin; ɛn di man we de mek sakrifays fɔ pipul sin go beg padin fɔ am ɛn i go klin na PAPA GƆD yay.