Biblia Todo Logo
Bib sou entènèt

- Piblisite -

Jɔshwa 18 - Krio Fɔs Oli Baybul


Jɔshwa Sheb Di Balans Land

1 Di Izrɛlayt dɛn bin dɔn kapchɔ di wanol land. So dɛn ɔl go mit na Shilɔ usay dɛn go mek ples we dɛn put di Ak ɔf di Kɔvinant.

2 Bɔt sɛvin fambul dɛn bin stil de we Jɔshwa nɔ bin gi land yet.

3 So Jɔshwa tɛl dɛn se dɛn nɔ fɔ wes mɔ tɛm fɔ go tek dɛn yon land.

4 So i tɛl se di sɛvin fambul fɔ pik tri tri man we dɛn go sɛn go sɔve di land ɛn go gi am di pepa.

5 Di Juda fambul dɛn we ɔlrɛdi dɔn gɛt dɛn yon land na di sawt, ɛn di Manasɛ ɛn Ifrem fambul dɛn na di nɔth go stil de na dɛn yon land.

6 I se dɛn fɔ divayd di land to sɛvin pat na di pepa we dɛn fɔ kɛr go gi am ɛn in go fɛnɔt to PAPA GƆD we na dɛn PAPA GƆD, udat fɔ gɛt usay.

7 Jɔshwa mek an klia to dɛn se di Livay fambul nɔ gɛt pan di land bikɔs na dɛn PAPA GƆD dɔn pik fɔ sav am. I se di Gad fambul, di Rubɛn fambul ɛn af pan di Manasɛ fambul dɛn dɔn gɛt dɛn yon land na di ist pat oba Riva Jɔdan we Mozis bin dɔn gi dɛn.

8 Jɔshwa tɛl di man dɛn we di sɛvin fambul pik fɔ go sɔve di land se mek dɛn go sɔve ɛn drɔ di land na pepa go gi am so in go fɛnɔt to PAPA GƆD insay Shilɔ de aw fɔ sheb di land gi dɛn.

9 Di man dɛn go go sɔve di land ɛn sheb an sɛvin say. Dɔn dɛn mek sɛvin plan fɔ di sɛvin difren pat dɛn we sho di difrɛn siti dɛn na di sɛvin pat dɛn na di land go gi Jɔshwa na Shilɔ.

10 Jɔshwa fɛnɔt to PAPA GƆD insay Shilɔ de. We i gɛt di ansa, i sheb di land wan wan pat to di sɛvin fambul dɛn we nɔ bin gɛt dɛn yon land yet.

11 We Jɔshwa bin de fɛnɔt udat fɔ gɛt usay, di fɔs fambul we gɛt land pan dɛn sɛvin fambul we nɔ bin gɛt land yet na di Bɛnjamin fambul; dɛn gɛt di land we de bitwin di Juda ɛn di Josɛf fambul na di sawt, ɛn di Ifrem ɛn Wɛst Manasɛ na di nɔth.

12 Dɛn bawndri na di nɔth bigin na Riva Jɔdan. Dɔn i go ɔp to Jɛriko, go ɔp na di wɛst say na di Kɔntri dɛn we de ɔp il ɛn go tap na di ɛmti ples we pɔsin nɔ go ebul tap we de nia Bɛthavɛn Siti.

13 Frɔm de, di bawndri go dɔŋ na di sawt pat na Luz we dɛn kin kɔl Bɛthɛl, go dɔŋ to Atarɔth Ada na di bɔtɔm pat na Bɛth Ɔrɔn Mawnten.

14 Dɔn di bawndri tɔn kɔmɔ wɛst tɔn sawt na di mawnten lɛ yu de go Kirith Baal, we na di Juda fambul dɛn de de. Dat na di bawndri na di wɛst.

15 Di bawndri na di sawt bigin as yu lɛf Kiriath Jɛarim ɛn go lɛk we yu de go usay wata de kɔmɔt ɔnda grɔn na Nɛftoa Spriŋ.

16 I rɔn go dɔŋ di mawnten we go bɔs na di nɔth pat na Refaim Vali usay Di Sɔn ɔf Inɔm Vali bigin. Frɔm de i tɔn sawt, pas insay Inɔn Vali nia di lɔŋ rod we di Jɛbyusayt dɛn de, fɔ go tɔch usay wata de kɔmɔt ɔndagrɔn we dɛn kɔl Ɛnrogɛl Spriŋ.

17 Dɔn i tɔn nɔth go Shɛmɛsh, te to Gɛliɔth we de na di rod fɔ klem go ɔp Adumim, dɔn i go dɔŋ to Boan Ston we na wan pan Rubɛn in pikin nem dɛn gi di ston.

18 Frɔm de, di bawndri pas na di nɔth pat na di lɔŋ tayt rod ɔp di mawnten usay yu go tinap ɛn si Jɔdan Vali, dɔn i go dɔŋ di vali.

19 Di bawndri na di sawt tap usay Riva Jɔdan jɔyn wit di Dɛd Si.

20 Na Riva Jɔdan na di bawndri na di ist pat. Dɛnwandɛnde na di difrɛn bawndri fɔ di Bɛnjamin fambul dɛn yon land we dɛn sheb gi di difrɛn famili dɛn.

21 Na di siti dɛnwanya we di Bɛnjamin fambul gɛt: Jɛriko, Bɛth Ɔgla, Ɛmɛk Kɛziz,

22 Bɛth Araba, Zɛmaraim, Bɛthɛl,

23 Avim, Para, Ofra,

24 Chɛfaramɔni, Ɔfni ɛn Gɛba. Dɛnwanya na twɛlv pan di siti we di Bɛnjamin fambul gɛt wit ɔl dɛn vilej dɛn.

25 Di Bɛnjamin fambul gɛt fotin mɔ siti. Dɛn na Gibɛɔn, Rama, Biarɔt,

26 Mizpa, Chɛfira, Moza

27 Rɛkɛm, Ipil, Tarala,

28 Zɛla, Aɛlɛf, Jɛbus (dat na Jerusɛlɛm), Gibɛa ɛn Kirith Jɛarim. fotin siti wit ɔl dɛn vilej dɛn. So na dɛn siti dɛn ya mek ɔp di land we di Bɛnjamin fambul bin gɛt we di land bin sheb.

Krio Bible © The Bible Society of Sierra Leone, 2013.

Bible Society in Sierra Leone
Swiv nou:



Piblisite