Jɛrimaya 32 - Krio Fɔs Oli Baybul

Jɛrimaya Bay Wan Fil

¹ Di wɔd we PAPA GƆD sɛn to Jɛrimaya, insay di ia we mek Zɛdikaya tɛn ia as kiŋ na Juda, we na bin di ia we mek etin we Nɛbyukadnɛza bin dɔn de na pawa.

² Da tɛm de, di kiŋ na Babilɔn in ami bin sɔrawnd Jerusɛlɛm, ɛn dɛn bin lɔk Jɛrimaya we na prɔfɛt, na di gyadman dɛn yad, we bin de na di kiŋ na Juda in os.

³ Bikɔs Zɛdikaya we na kiŋ na Juda bin dɔn lɔk am ɔp, de se, “Wetin du yu fɔ prɔfisay se, ‘Na dis PAPA GƆD se: A de tɛl una, a de gi dis siti to di kiŋ na Babilɔn, ɛn i go kapchɔ am;

⁴ Zɛdikaya we na kiŋ na Juda nɔ go ɛskep, di Babilonian dɛn go kech am go to di kiŋ na Babilɔn, ɛn i go tɔk to am fes to fes, ɛn dɛn go si kojuma koju;

⁵ ɛn i go tek Zɛdikaya go Babilɔn, ɛn na de i go de sote a go waka to am. Ɔlwe una go fɛt di Babilonian dɛm, una nɔ go ebul dɛm’?”

⁶ Jɛrimaya se, “PAPA GƆD in wɔd rich mi se:

⁷ Biliv mi, Anamɛl, we na yu ɔnkul Shalum in bɔypikin, go kam tɛl yu se, ‘Bay mi land we de na Anatɔt bikɔs na yu nɔmɔ gɛt di rayt fɔ ridim am we yu bay am.’

⁸ Nain Anamɛl we na mi kɔzin kam to mi insay di pales yad, akɔdin to wetin PAPA GƆD bin se, ɛn tɛl mi se, ‘Bay mi land we de na Anatɔt, na di land ɔf Bɛnjamin, bikɔs na yu gɛt di rayt fɔ ridim am we yu bay am; bay am fɔ yusɛf.’ Na da tɛm de a no se na PAPA GƆD in wɔd.

⁹ “So a bay di land na Anatɔt to mi kɔzin Anamɛl, ɛn a we di mɔni pe am. Na bin sɛvintin silva kɔpɔ.

¹⁰ A sayn di kɔnveans, sil am, gɛt witnɛs dɛm ɛn we di mɔni na skel.

¹¹ Dɔn a tek di sil kɔnveans we ɔl di agrimɛnt rayt, ɛn di kɔpi we nɔ sil;

¹² a gi Baruch we na Nɛria in bɔypikin ɛn Masɛya in grampikin, bifo Anamɛl we na mi kɔzin, di witnɛs dɛm we sayn di kɔnveans, ɛn ɔl di Ju dɛm we bin sidɔm insay di gyad dɛn yad.

¹³ A tɛl Baruch bifo dɛn ɔl, se,

¹⁴ ‘Na dis PAPA GƆD Ɔlmayti we na Izrɛl dɛn Gɔd se: tek dɛn kɔnveans dɛn ya, di sil wan ɛn di wan we nɔ sil, ɛn put insay kle kɔntena, so dat dɛn go las lɔŋ.

¹⁵ Bikɔs na dis PAPA GƆD Ɔlmayti we na Izrɛl dɛn Gɔd se; Dɛn go bay os ɛn land ɛn greps bak na dis land.

Jɛrimaya In Prea

¹⁶ “Afta a dɔn gi Baruk we na Nɛria in bɔypikin di kɔnveans, a pre to PAPA GƆD se:

¹⁷ ‘E PAPA GƆD we na mi Gɔd! Na yu mek ɔp di klawd ɛn di wɔl wit yu big big pawa ɛn wit yu an we yu opin wayd! Natin nɔ traŋa fɔ yu fɔ du,

¹⁸ yu de sho lɛknɛs we nɔ de shek to tawzin tawzin pipul, bɔt yu de tɔn di papa dɛm gilt pan dɛn pikin dɛm, Yu big ɛn mayti Gɔd we in nem na PAPA GƆD Ɔlmayti,

¹⁹ we sabi plan wit sɛns ɛn kin du wɔndaful tin: I de si ɔl mɔtalman in we, ɛn de pe ɔlman bay in we ɛn bay wetin dɛn mek bi.

²⁰ In we dɔn sho sayn ɛn wɔnda na Ijipt, ɛn te tide i de du am na Izrɛl ɛn to ɔlman na di wɔl, ɛn dat mek dɛn no yu ɔlsay jɛs lɛk tide.

²¹ Yu briŋ yu pipul dɛm we na Izrɛl kɔmɔt Ijipt, wit sayn ɛn wɔnda, wit traŋa an ɛn an we strɛch opin wayd, ɛn wit tin we de mek pipul fred bad bad wan;

²² ɛn yu gi dɛm dis land, we yu bin swɛ to dɛm fɔstɛmpapa fɔ gi dɛm; land we gud fɔ plant ɛn fɔ mɛn animal;

²³ ɛn dɛn bin go insay de ɛn tek am fɔ dɛnsɛf. Bɔt dɛn nɔ bin obe yu vɔys ɔ du wetin yu lɔ se; dɛn nɔ du natin pan ɔl wetin yu kɔmand dɛm fɔ du. Na fɔseka dat yu mek ɔl dɛn bad bad tin ya mit dɛm.

²⁴ Di dɔti we dɛn pak rawnd fɔ klem ɛn atak, dɔn bil kam ɔp di siti fɔ kapchɔ am, ɛn fɔseka wa ɛn bad bad aŋri ɛn siknɛs, dɛn go gi di siti to di Babilonian dɛm we de fɛt dɛm. Wetin yu bin se dɔn bi, ɛn yu si am wit yu yay.

²⁵ Pan ɔl dat, yu PAPA GƆD we na mi Gɔd tɛl mi se, “Bay di land wit mɔni ɛn gɛt witnɛs dɛm” –ɔlwe di Babilonian dɛn de kapchɔ di siti.’”

²⁶ PAPA GƆD in wɔd rich Jɛrimaya. I se:

²⁷ ‘A de tɛl una, na mi na PAPA GƆD di Gɔd fɔ ɔl mɔtalman; ɛnitin de we traŋa fɔ mi fɔ du?

²⁸ Fɔsɛka dat, na dis PAPA GƆD se: Biliv mi, a de gi dis siti to di Babilonian dɛm ɛn to Nɛbyukadnɛza we na kiŋ na Babilɔn, ɛn i go kapchɔ am.

²⁹ Di Babilonian dɛm we de fɛt dis siti go kam sɛt faya pan am, ɛn bɔn am, wit di os dɛm we dɛn dɔn bɔn insɛns na dɛn ruf to Beal, ɛn dɛn dɔn mek drink ɔfrin to ɔda gɔd dɛm, fɔr provok mi mek a vɛks.

³⁰ Bikɔs na so so ivul Izrɛl in bɔypikin dɛm ɛn Juda in bɔypikin dɛn dɔn du bifo mi fɔrm we dɛn yɔŋ; Izrɛl in bɔypikin dɛm nɔ du natin pas fɔ prɔvok mi mek a vɛks bay wetin dɛn de du wit dɛn yon an. Na so PAPA GƆD se.

³¹ I se. Dis siti dɔn mek a vɛks ɛn mek mi at wam frɔm di de we dɛn bin bil am, te to tide, so a go pul am kɔmɔt bifo mi

³² fɔseka ɔl di bad we Izrɛl in bɔypikin dɛm ɛn Juda in bɔypikin dɛm du fɔ provok mi mek a vɛks– dɛn kiŋ dɛn, dɛn man dɛn we de mek sakrifays fɔ pipul sin, dɛn prɔfɛt dɛm, di man dɛn na Juda ɛn di pipul dɛn we tap na Jerusɛlɛm.

³³ Dɛn nɔ tɔn dɛn fes to mi, na dɛn bak dɛn tɔn to mi; ɛn ɔlwe a de tich dɛm a nɔ de taya, dɛn nɔ lisin fɔ mek dɛn lan.

³⁴ Dɛn put dɛn bad bad tin dɛn we a nɔ lɛk insay di os we dɛn se na fɔ mi, fo dɔti am na mi yay.

³⁵ Dɛn bil ples dɛm fɔ wɔship Beal na Inɔm in bɔypikin in vali, fɔ sakrifays dɛn bɔy ɛn gyalpikin dɛm to molɛk, ɔlwe a nɔ kɔmand dɛn fɔ du dat, ɛn dat nɔ kam na mi maynd sɛf, fɔ mek dɛn du da tin we a et bad bad wan, fɔ mek Juda kɔmit sin.

Prɔmis Fɔ Abop Pan

³⁶ “Fɔseka dat, na dis PAPA GƆD we na Izrɛl dɛn Gɔd se bɔt dis siti we yu tɔk bɔt se, ‘Dɛn dɔn gi am to di kiŋ na Babilɔn we yu go yuz, wa, bad bad aŋri ɛn siknɛs’:

³⁷ Biliv mi, a go gɛda dɛm kɔmɔt na ɔl di kɔntri dɛm we a bin drɛb dɛn go we a bin vɛks ɛn mi at bin wam bad bad wan; a go briŋ dɛn kam bak na ya, ɛn a go mek dɛn sef.

³⁸ Ɛn dɛn go bi mi pipul ɛn a go bi dɛn Gɔd.

³⁹ A go gi dɛm wan at ɛn wan we, so dat dɛn go fred mi sote go fɔ dɛn yon gud, ɛn fɔ dɛn pikin dɛn gud.

⁴⁰ A go mek wan Kɔvinant wit dɛn we go de sote go, so dat a nɔ go tap fɔ du dɛn gud; ɛn a go put fred na dɛn at fɔ mi, so dat dɛn nɔ go tɔn bak pan mi.

⁴¹ A go de gladi fɔ du dɛm gud, ɛn a go plant dɛm na dis land in wit tret maynd, wit ɔl mi at ɛn mi sol.

⁴² “Bikɔs na dis PAPA GƆD se: Jis lɛk aw a briŋ ɔl dɛn bad bad tin dɛn ya pan dɛn pipul ya, na so a go briŋ ɔl di gud tin dɛm we a dɔn prɔmis dɛm, to dɛm.

⁴³ Dɛn go bay grɔn na dis land we yu de tɔk bɔt se, i nɔ gud fɔ natin, witawt mɔtalman ɔ animal; i dɔn bi di Babilonian dɛn yon.

⁴⁴ Dɛn go bay land wit mɔni, ɛn dɛn go sayn ɛn witnɛs kɔnveans dɛm, na di land ɔf Bɛnjamin, na di ples rawnd Jerusɛlɛm, ɛn na di siti dɛn na Juda, di siti dɛn na di il kɔntri, di Shɛfɛla dɛn siti dɛn, ɛn na di siti dɛn we de na di Nɛgɛb; bikɔs a go gi dɛm dɛn jɛntri bak. Na so PAPA GƆD se.”