Jɛrimaya 3 - Krio Fɔs Oli Baybul

Izrɛl we nɔ de Waka Tret na PAPA GƆD in Yay

¹ PAPA GƆD se, “If man dayvɔs in wɛf ɛn in wɛf kɔmɔt to am ɛn go mared to ɔda pɔsin, di man go go bak to di uman? Dat nɔ go mek di land dɔti na PAPA GƆD in yay? Yu dɔn bi rare gyal wit bɔku lɔva dɛm, dɔn yu wan kam bak to mi?

² Es yu yay luk di ɛmti mawnten dɛm ɛn si! Usay de we yu nɔ dɔn rare? Yu dɔn sidɔm nia di rɔd de wet fɔ yu lɔva dɛm, lɛkɛ dɛn Arab na di dray ɛn ɛmti ples. Yu dɔn mek di land dɔti na PAPA GƆD yay wit yu rare gyal biznɛs.

³ Fɔseka dat, wan ren nɔ de kam, ren nɔ de kam ren sizin; pan ɔl dat yu stil yu gɛt rare gyal fɔrɛd, yu nɔ gri shem.

⁴ Yu nɔ jɛs de pre to mi se, ‘Mi Papa, na yu na mi padi we a bin yɔŋ –

⁵ I go vɛks pan mi sote go, I go stɔbɔn sote go?’ Luk, yu dɔn tɔk am, bɔt una dɔn du ɔl di ivul tin dɛn we una ebul du.”

Izrɛl Ɛn Juda Mɔs Ripɛnt

⁶ PAPA GƆD tɛl mi dyurin di tɛm we Josaya na bin kiŋ, se, “Yu dɔn si wetin i du, dawande we nɔ gɛt feth, we nem Izrɛl, aw i bin go ɔp ɔl dɛn ay il ɛn ɔnda ɔl dɛn grin tik, de biev lɛk rare gyal?

⁷ A bin de tɔk na mi at se, ‘dis, we i dɔn du ɔl dɛn tin dɛn ya dɔn, i go kam bak to mi;’ bɔt i nɔ kam bak, ɛn in fɔls sista, Juda, bin si.

⁸ I bin si se, fɔ ɔl di adɔltri we dawande, we na Izrɛl we nɔ gɛt feth, bin kɔmit, a bin dɔn dayvɔs am; pan ɔl dat, da in fɔls sista nɔ bin fred, insɛf go mek insɛf rare gyal.

⁹ Bikɔs i nɔ de shem fɔ rare, i dɔti di land na PAPA GƆD in yay we i de kɔmit adɔltri de wɔship tik ɛn ston.

¹⁰ Pan ɔl dat, in fɔls sista, Juda, nɔ kam bak to mi wit ɔl in at, bɔt bin de pritɛnd; na so PAPA GƆD se.”

¹¹ Ɛn PAPA GƆD tɛl mi se, “Izrɛl we nɔ gɛt feth dɔn sho se i nɔ gilti rich Juda we de mek fɔls.

¹² Go anawns to di pipul dɛn na di nɔt, se PAPA GƆD se, ‘Tɔn bak kam to mi, yu Izrɛl we nɔ gɛt feth. PAPA GƆD se, A nɔ go vɛks pan una igen bikɔs Mi na Gɔd we de sɔri fɔ pipul; A nɔ go vɛks igen igen

¹³ Una jɛs gri nɔmɔ se una gilti, se una dɔn tɔn una bak pan PAPA GƆD we na una Gɔd ɛn skata una lɔv to trenja dɛn ɔnda ɔl dɛn grin tik dɛm ɛn una nɔ obe mi kɔmandmɛnt dɛm.

¹⁴ PAPA GƆD se, una tɔmbak kam to mi bikɔs mi na una masta; A go tek wan wan pɔsin na ich siti, ɛn tu tu na ich famili ɛn a go briŋ una kam Zayɔn.

¹⁵ “Ɛn a go gi una shɛpad dɛn we a lɛk, we go fid una wit sɛns ɛn sabi.

¹⁶ Ɛn wɛn una dɔn mɔltiplay ɛn grow na di land, PAPA GƆD se, una nɔ go se, “PAPA GƆD in Ak ɔf di Kɔvinant” igen. I nɔ go kam na una maynd ɔ una nɔ go mɛmba am, ɔ mis am; una nɔ go mɛk am igen.

¹⁷ Da tɛm de, dɛn go kɔl Jerusɛlɛm, PAPA GƆD in tron, ɛn ɔl di difrɛn neshɔn gɛda de fɔ wɔship PAPA GƆD na Jerusɛlɛm, ɛn dɛn nɔ go stɔbɔn de du wetin dɛn ivul at dɛn se.

¹⁸ Dɛn tɛm dɛn de, di Juda fambul go jɔyn wit di Izrɛl fambul, ɛn una go kɔmɔt na di land na di nɔt togɛda, go na di land we a bin gi una fɔstɛmpapa dɛm as dɛn yon prɔpati.

Gɔd In Pipul Dɛn Laylay Gɔd Biznɛs

¹⁹ A bin de tink bɔt aw a go put una wit mi bɔypikin dɛm, ɛn gi una fayn fayn land, prɔpati we fayn pas ɔl dɛn neshɔn dɛn yon. Ɛn a bin tink se una go kɔl mi, Mi Papa, ɛn nɔ go tɔn una bak pan mi.

²⁰ PAPA GƆD se, Biliv mi, “lɛkɛ aw wɛf we nɔ gɛt feth kin lɛf in man, na so una Izrɛl nɔ bin gɛt feth pan mi.

²¹ Yu yɛri wan vɔys na ɛmti il, we Izrɛl in bɔypikin dɛn de kray ɛn beg, bikɔs dɛn kɔrɔpt, dɛn dɔn fɔgɛt PAPA GƆD we na dɛn Gɔd.

²² “Una kam bak to mi, una dɛn bɔypikin dɛn we nɔ gɛt feth, a go mɛn una mek una go gɛt feth.” “Luk, we dɔn kam to yu; bikɔs yu na PAPA GƆD we na wi Gɔd.

²³ Fɔ tru, di tin dɛn we de apin na di il dɛn de mek pɔsin tink tin we nɔ bi, dat na di kayn wɔship we de na di mawnten dɛm. Fɔ tru, na PAPA GƆD we na wi Gɔd nɔmɔ go sev Izrɛl.

²⁴ “Bɔt frɔm we una yɔŋ, di shemful biznɛs pwɛl ɔl wetin wi fɔstɛmpapa dɛn dɔn wok fɔ, dɛn ship ɛn dɛn kaw, ɛn dɛn bɔy ɛn gyal pikin dɛm.

²⁵ Lɛ wi lidɔm pan wi shem, ɛn lɛ wi disrɛspɛkt kɔba wi; bikɔs wi dɔn kɔmit sin agens PAPA GƆD we na wi Gɔd, wi ɛn wi papa dɛm, frɔm we wi yɔŋ, te tide; ɛn wi nɔ dɔn obe PAPA GƆD we na wi Gɔd in vɔys.”