Jɛrimaya 24 - Krio Fɔs Oli Baybul

Tu Blay Fignɔt

¹ Afta we Nɛbyukadnɛza, we na kiŋ na Babilɔn bin dɔn kɛr Jɛkonaya, we na Jɛoiakim we na kiŋ na Juda, in bɔypikin, togɛda wit di bigman dɛm na Juda, di man dɛm we de mek tinks dɛn wit dɛn an, ɛn di goldsmit ɛn blaksmit dɛm, go ɛgzayl na Babilɔn kɔmɔt Jerusɛlɛm, PAPA GƆD bin sho mi dis vishɔn; A si tu baskit fignɔt we dɛn put bifo PAPA GƆD in tɛmpul.

² Wan baskit gɛt gud gud fignɔt, lɛk di fɔs fignɔt dɛn we kin rɛp, bɔt insay di ɔda baskit, na fignɔt dɛn we nɔ gud de de. Dɛn so pwɛl dat pɔsin nɔ go ebul it dɛm.

³ Nain PAPA Gɔd aks mi se, “Wetin yu de si Jɛrimaya?” A se “A si Fignɔt dɛm. Di wan dɛn we gud, gud tumɔs ɛn di wan dɛm we pwɛl, pwɛl bad bad wan. Dɛn so pwɛl dat nɔbɔdi nɔ go ebul it dɛm.

⁴ Nain PAPA GƆD in wɔd kam to mi se:

⁵ “Na dis PAPA GƆD we na Izrɛl dɛn Gɔd se: A go si di wan dɛn we kɔmɔt Juda go ɛgzayl, we a pul kɔmɔt ya sɛn go na di Babilonian dɛn land, lɛkɛ dɛn gud fignɔt dɛm ya.

⁶ A go gyad dɛm sote go, ɛn a go briŋ dɛm kam bak na dis land. Nɔto brok a go brok dɛm, na bil a go bil dɛm; nɔto rut a go rut am, na plant a go plant am.

⁷ A go gi dɛm di at fɔ no se na mi na di PAPA GƆD; ɛn dɛn go bi mi pipul ɛn mi go bi dɛn Gɔd, bikɔs dɛn go kam bak to mi wit ɔl dɛn at.

⁸ “Bɔt na dis PAPA GƆD se: Lɛk aw yu si dɛn fignɔt dɛm we so pwɛl dat nɔbɔdi nɔ go ebul it dɛm, na so a go trit Zɛdikaya, we na kiŋ na Juda, in bigman dɛm, di pipul dɛm we kɔmɔt Jerusɛlɛm we lɛf na dis land, ɛn dɛn wan we tap na Ijipt.

⁹ A go mek dɛn tin fɔ fred to ɔl di kɔntri dɛm na di wɔl. Pipul go shem fɔ de wit dɛm, dɛn nem nɔ go gɛt rɛspɛkt, dɛn go provok dɛm ɛn go bi pipul dɛn we gɛt swɛ, ɔlsay usay a go drɛb dɛn go.

¹⁰ Ɛn a go sɛn wa, bad bad aŋri ɛn siknɛs pan dɛm, sote dɛn ɔl day kpatakpata kɔmɔt na di land we a gi dɛn ɛn dɛn fɔstɛmpapa dɛm.