Ɛzra 4 - Krio Fɔs Oli Baybul

Ɛnimi Dɛn Bigin Ambɔg Di Wok Na PAPA GƆD In Os

¹ We di pipul dɛn na Juda ɛn Bɛnjamin dɛn ɛnimi dɛn yɛri se dɛn wan we dɛn bin kapchɔ dɔn kam bak ɛn de bil Izrɛl dɛn GƆD we na PAPA GƆD in os bak,

² dɛn go mit Zɛrubabɛl ɛn di big wan dɛn na di famili edman ɛn tɛl dɛn se, dɛnsɛf want jɔyn dɛn fɔ bil PAPA GƆD in os, bikɔs dɛn de wɔship Izrɛl dɛn GƆD lɛkɛ aw dɛnsɛf we na Izrɛlayt de wɔship am. Dɛn se na di sem GƆD dɛn bin de mek sakrifays to frɔm di tɛm we Kiŋ Ɛsaadɔn na Asiria bin kɛr dɛn go.

³ Bɔt Zɛrubabɛl, Jɛshwa ɛn di big wan dɛn na di famili ansa dɛn se dɛn nɔ gɛt natin fɔ du pan di wok. Dɛn se dɛn nɔ gɛt nɔn say we dɛn go mitɔp. Dɛn tɛl dɛn se na dɛn nɔmɔ go bil os fɔ PAPA GƆD, Izrɛl dɛn GƆD, jɛs lɛkɛ aw nɔmɔ Kiŋ Sayrɔs na Pashia bin tɛl dɛn fɔ du.

⁴ So di pipul dɛnsɛf bigin ambɔg di Juda pipul dɛn as dɛn de du dɛn wok.

⁵ Dɛn aya masinari fɔ ɔndamayn di wok ɛn diskɔrej dɛn. Ɔl dis bi we Kiŋ Sayrɔs bin de rul Pashia, ɛn sɛf we Kiŋ Dariɔs in tek ova as kiŋ na Pashia, di sem tin kɔntinyu.

Dɛn Ambɔg Dɛn Ju Fɔ Lɛ Dɛn Nɔ Bil Jerusɛlɛm

⁶ We Kiŋ Zaksis bigin fɔ rul, Juda dɛn ɛnimi rayt am lɛta ɛn tɔk bad tin bɔt di pipul dɛn na Juda ɛn Jerusɛlɛm.

⁷ Ɛn afta da tɛm de sɛf we Kiŋ Atazaksis bigin rul na Pashia, di Juda pipul dɛn ɛnimi rayt ɔda bad lɛta to am bɔt di Ju dɛn, ɛn na Bishlam, Mithrɛdath, Tabil ɛn dɛn wan we de nain kabudu na bin di kakatua. Dɛn rayt lɛta to Atazaksis na Arameik laŋwej ɛn dɛn ɛksplen am we dɛn de rid am to am.

⁸ Gɔvna Reum ɛn di sɛktri Shimshay dɛnsɛf rayt bad lɛta bɔt Jerusɛlɛm to Kiŋ Atazaksis. Dɛn rayt se,

⁹ “Frɔm Reum di gɔvna ɛn Shimshay, di sɛktri ɛn dɛn ɔfisa dɛn; frɔm di jɔj dɛn ɛn ɔl di ɔda bigman dɛn na Irɛk, Babilɔn ɛn Susa na Ilam,

¹⁰ ɛn frɔm di pipul dɛn we di gret ɛn pawaful Ashɔbanipal pul kɔmɔt na dɛn om ɛn kɛr dɛn go na Sameria ɛn di wɛst pat na Riva Yufretis”.

¹¹ Na di akchwal lɛta dis: “Wi de rayt dis lɛta to Kiŋ Atazaksis as yu obidiɛnt pipul dɛn we yu de rul na di wɛst pat na Riva Yufretis.

¹² Wi want di kiŋ fɔ no se di Ju dɛn we kɔmɔt Babilɔn we kam tap ya na Jerusɛlɛm dɔn bigin fɔ bil di siti. Mɛmba se dɛn pipul ya de biev lɛkɛ rebɛl ɛn na soso bad tin dɛn de du. Infakt dɛn bin dɔn le fawndeshɔn fɔ bil di siti wɔl ɛn i lɛf smɔl mɔ fɔ bil an dɔn.

¹³ Kiŋ, if dɛn pipul yaso bil dis siti dɔn ɛn bil ɔl di wɔl dɛn sa, dɛn go tap fɔ pe taks to yu, dɛn nɔ go pe dyuti ɛn di ɔda mɔni dɛn we yu fɔ gɛt yu nɔ go gɛt an, dɔn na yu go lɔsis.

¹⁴ Sins wi de ɔnda yu sa, ɛn na yu swɛt wi de it, wi nɔ want shem ɛn disgres fɔ kam pan yu, na dat mek wi disayd fɔ tɛl yu dis wantɛm.

¹⁵ Duya, gi ɔda fɔ lɛ dɛn go luk usay di kiŋ dɛn bifo yu bin de kip rɛkɔd fɔ ɔl wetin bin de apin trade. If yu du so, yu go fɛnɔt se di pipul dɛn na dis siti bin gɛt bad bad traŋayes ɛn bin dɔn de gi prɔblɛm lɔntɛm. Infakt sɛf, dɛn gɛt bad rɛkɔd fɔ traŋayes ɛn na we dɛn nɔ want tek kɔntrol to ɔda kiŋ ɛn kɔntri dɛn mek dɛn pwɛl di siti kpatakpata.

¹⁶ Wi de tɛl yu se, if yu alaw di pipul dɛn fɔ mek dɛn bil dis siti wit ɔl in wɔl dɔn, yu go lɔs di wanol eria te rich to di wɛst pat na Riva Yufretis.”

¹⁷ Di kiŋ sɛn dis riplay to Gɔvna Reum, Shimshay di sɛktri, ɛn dɛn ɔfisa dɛn we de na Sameria ɛn di wɛst pat na Riva Yufretis.

¹⁸ I rayt se, “A de tɛl una ɔl adu. A gɛt una lɛta. Dɛn rid am ɛn translet am fɔ mi.

¹⁹ A bin gi ɔda fɔ lɛ dɛn luk na di rɛkɔd usay dɛn rayt ɔl wetin bin de apin trade, ɛn dɛn fɛnɔt se fɔ tru di pipul dɛn na Jerusɛlɛm nɔ bin de tek ɔda ɛn ɔltɛm dɛn bin de biev lɛkɛ rebɛl to dɛn kiŋ dɛn we bin de oba dɛn. Infakt na gbosgbos dɛn tek mek krid.

²⁰ Jerusɛlɛm bin dɔn gɛt pawaful kiŋ dɛn we bin de rul te rich to di wɛst pat na Riva Yufretis, ɛn dɛn bin de pe taks, dyuti ɛn ɔda mɔni dɛn to am.

²¹ So, una gi ɔda fɔ lɛ dɛn pipul ya tap di wok, ɛn dɛn nɔ fɔ bil da siti de te a gi ɔda fɔ du so.

²² Una mek shɔ se una go du wetin di lɔ se. Wetin fɔ mek a alaw dis kayn tin fɔ bi te i de kam ambɔg mi kindɔm?”

²³ We dɛn rid Kiŋ Atazaksis in lɛta to Reum, Shimshay ɛn i kɔmpin dɛn, dɛn rɔn go Jerusɛlɛm ɛn fos di Ju pipul dɛn fɔ tap fɔ bil di siti.

Di Wok Pan PAPA GƆD In Os Bigin Bak

²⁴ Di wok pan PAPA GƆD in os na Jerusɛlɛm bin tap fɔs, ɛn dɛn nɔ du nɔn wok pan am te di sɛkɛn ia we Dariɔs bi Kiŋ na Pashia.