Ɛksodɔs 27 - Krio Fɔs Oli Baybul

Di Ɔlta Fɔ Mek Sakrifays

¹ PAPA GƆD tɔk to Mozis bak. I se, “Tek akeshia bod bil ɔlta. I fɔ gɛt skwaya shep. I fɔ bi sɛvin ɛn af fut.

² Di fo kɔna dɛn ɔl fɔ gɛt wan, wan ɔn pantap. Na kav dɛn fɔ kav di ɔn dɛn pan am ɛn kɔba am wit bras.

³ Mek pan dɛn we go de ɔnda fɔ lɛ di ashis go de fɔdɔm insay. Mek shɔbul, bol, fɔk ɛn pan dɛn fɔ put faya. Na bras fɔ tek mek ɔl dɛn tiŋs ya.

⁴ Mek bras gretin, ɛn put fo bras riŋ dɛn na di fo kɔna fɔ tek es am.

⁵ Put di gretin insay di ɔlta ɛn prɛs am lɛ i go dɔŋ lilibit.

⁶ Yuz akeshia bod mek tu pol dɛn fɔ tot di ɔlta.

⁷ Yuz bras fɔ kɔba di pol dɛn ɛn wɛr dɛn insay di riŋ dɛn pan di ɔlta.

⁸ Na bod yu fɔ yuz fɔ mek di ɔlta ɛn yu fɔ mek di insay dip. Mek shɔ se yu go bay di plan we a sho yu na di mawnten.”

Di Spes We Fɔ De Rawnd Di Tɛnt

⁹ “As fɔ di spes we go de rawnd di tɛnt in yon say, i fɔ bi fifti yad na di raytan say. Mek fayn linin klos we go kɔba dis spes.

¹⁰ I fɔ gɛt twɛnti bras pila we go ol am. Di bes we dɛn de sidɔm pan fɔ bi twɛnti ɛn dɛn fɔ bi bras, bɔt di uk ɛn di rɔd dɛn fɔ bi silva.

¹¹ Na di sem tin yu fɔ du fɔ di lɛfan say.

¹² Yu fɔ yuz twɛnti-fayv yad matirial fɔ mek klos we go ɛŋ na di bak. In fɔ gɛt tɛn pila ɛn tɛn bes.

¹³ Fɔ di frɔnt say, usay dɛn de pas go insay, insɛf fɔ bi twɛnti-fayv yad wayd.

¹⁴ Di say we dɛn de pas go insay fɔ gɛt sɛvin ɛn af yad wit tri pila ɛn tri bes.

¹⁵ Di men say fɔ pas go insay insɛf fɔ gɛt tɛn yad. Na di sem tin fɔ de na di ɔda sayd ɛn insɛf fɔ gɛt tri pila ɛn tri bes.

¹⁶ Na fayn linin matirial we gɛt blu, pɔpul ɛn rɛd kɔla fɔ tek mek di klos we fɔ ɛŋ na di domɔt, ɛn fɔ dɛkɔret am. I fɔ gɛt fo pila ɛn fo bes.

¹⁷ Ɔl di pila dɛn rawnd dis spes ya fɔ gɛt silva rɔd dɛn we jɔyn togɛda. Di uk dɛn fɔ bi silva, dɔn di bes dɛn fɔ bi bras.

¹⁸ Ɔl ɛn ɔl, di wanol ples fɔ bi fifti yad lɔŋ, twɛnti-fayv yad wayd ɛn tu ɛn af yad ay. Na fayn linin matirial fɔ tek mek di klos we de ɛŋ, ɛn di bes dɛn fɔ bi bras.

¹⁹ Ɔl di tin dɛn we fɔ yuz na di tɛnt ɛn di pɛg dɛn, wit di pɛg dɛnsɛf fɔ di big spes fɔ bi bras.

Aw Fɔ Kia Fɔ Di Lamp Dɛn Na PAPA GƆD In Os

²⁰ “Gi di Izrɛlayt dɛn ɔda se, dɛn fɔ gi di bɛst ɔliv ɔyl fɔ layt di lamp, so dat di lamp dɛn nɔ go ɛva ɔl.

²¹ Erɔn ɛn in bɔypikin dɛn fɔ de tek kia ɔf di lamp. I fɔ layt frɔm ivintɛm te mɔnin. Dɛn fɔ put am insay di tɛnt bifo di Kɔvinant Bɔks. Di Izrɛlayt dɛn fɔ de du dis ɛvri de ɛn i nɔ fɔ ɛva tap.