Egay 1 - Krio Fɔs Oli Baybul

PAPA GƆD Gi Ɔda Fɔ Bil In Os Bak

¹ Insay di mɔnt we mek siks, afta we Dariɔs bin dɔn bi kiŋ fɔ tu ia, PAPA GƆD tɔk to Egay na di fɔs de na da mɔnt de. I sɛn Egay to Zerubabɛl we na bin Shialtiɛl in bɔypikin ɛn na gɔvna na Juda. I sɛn am bak to Jɔshwa we na bin di bigman fɔ ɔl dɛn man we de mek sakrifays fɔ pipul sin ɛn na Jɛozedak in bɔypikin.

² I tɛl dɛn se PAPA GƆD Ɔlmayti se, di pipul dɛn de se tɛm nɔ rich yet fɔ bil PAPA GƆD in os bak.

³ So PAPA GƆD tɛl Egay we na prɔfɛt wetin fɔ tɔk.

⁴ I se fɔ aks dɛn if na tɛm fɔ dɛn fɔ bil os dɛn wit dia matirial fɔ dɛnsɛf, we PAPA GƆD in yon os de brok brok wan.

⁵ PAPA GƆD we na PAPA GƆD Ɔlmayti se dɛn fɔ tink gud bɔt wetin dɛn de apin to dɛn.

⁶ Dɛn de plant bɔku sid bɔt nɔto ɔl de bia, dɛn de it, bɔt dɛn nɔ de bɛlful; we dɛn wɛr klos sɛf, kol stil de kech dɛn ɛn i tan lɛk we dɛn pe dɛn na bɔs bag dɛn de put di mɔni.

⁷ PAPA GƆD we na PAPA GƆD Ɔlmayti aks dɛn se if dɛn nɔ ebul tink bɔt wetin de apin to dɛn.

⁸ I se, if dɛn no wetin bɛtɛ, dɛn fɔ jɛs go ɔp di il; go kɔt bɔd ɛn kam bil PAPA GƆD in os bak saful. Dat go mek in at swit ɛn in go sho dɛn wetin i kin du de.

⁹ I se we dɛn kin dɔn plant, dɛn de abop se na bɔku tin dɛn go gɛt, bɔt usay! Di smɔl bit sɛf we dɛn kin briŋ kam na os kin jɛs skata lɛk na briz blo ɔl go. Dis na bikɔs dɛn jɛs lɛf Papa GƆD in os fɔ de brokbrok wan ɛn ɔlman bizi de mek in yon os fayn.

¹⁰ Dat mek ren nɔ de fɔdɔm ɛn so natin nɔ de gro.

¹¹ PAPA GƆD se, nain dɔn mek di grɔn dɛn ɔl dray, di tin dɛn we dɛn de bia, nɔ bɛtɛ, ɛn ivin di animal ɛn mɔtalman nɔ de kɔmɔt fayn.

Di Pipul Obe PAPA GƆD

¹² Zɛrubabɛl we na Shialtiɛl in bɔypikin ɛn Jɔshwa we na Jɛozedak in bɔypikin ɛn di bigman fɔ ɔl dɛn man we de mek sakrifays pipul sin wit ɔl di balans pipul obe Papa GƆD we na dɛn PAPA GƆD ɛn du wetin Egay we i sɛn, se, bikɔs dɛn de fred ɛn rɛspɛkt PAPA GƆD.

¹³ Dɛn Egay we na PAPA GƆD in midulman tɛl dɛn wetin PAPA GƆD se, dat na, i se in de wit dɛn.

¹⁴ PAPA GƆD mek Zɛrubabɛl we na gɔvna ɛn na Shialtiɛl in bɔypikin, Jɔshwa we na di bigman fɔ ɔl dɛn man we de mek sakrifays fɔ pipul sin ɛn Jɛozedak in bɔypikin, pik zil, jɔyn am wit di zil we di balans pipul dɛnsɛf gɛt, ɛn bigin wok fɔ bil PAPA GƆD we na dɛn PAPA GƆD Ɔlmayti, in os bak.

¹⁵ Na di de we mek twɛnti - fo pan di mɔnt we mek siks insay di sɛkɛn ia afta Dariɔs bi kiŋ.