Ɛkliziastis 5 - Krio Fɔs Oli Baybul

Nɔ Ɔri Fɔ Mek Prɔmis

¹ Tek tɛm we yu de go na PAPA GƆD in os; fɔ de lisin PAPA GƆD in wɔd bɛtɛ pas we fulman mek sakrifays, bikɔs dɛn nɔ no se dɛn de du bad.

² Nɔ kwik fɔ tɔk tin, ɛn nɔ mek yu at mek yu se sɔntin to PAPA GƆD, bikɔs PAPA GƆD de na ɛvin ɛn yu de dɔŋ na di wɔl; so nɔ tɔk bɔku bɔku tɔk to am.

³ Yu de drim bikɔs yu de tink bɔku, ɛn na fulman yu go yɛri de tɔk bɔku bɔku.

⁴ Wɛn yu prɔmis PAPA GƆD se yu go du sɔntin, nɔ westɛm fɔ du wetin yu se yu go du; i nɔ lɛk fulman. Du wetin yu se yu go du.

⁵ I bɛtɛ lɛ yu nɔ prɔmis dan fɔ prɔmis ɛn nɔ du wetin yu se.

⁶ Nɔ mek yu mɔt mek yu sin we yu go gɛt fɔ tɛl rɛvrɛn se na mistek yu mistek tɔk. Nɔ mek PAPA GƆD vɛks pan yu ɛn pwɛl wetin yu dɔn lebɔ fɔ.

⁷ We yu de tink plɛnti bɔt di tin dɛn na dis wɔl, yu de put at pan tin dɛn we nɔ de bɛnifit pɔsin ɛn dat go mek yu tɔk bɔku bɔku; bɔt mɔtalman fɔ fred PAPA GƆD.

Layf nɔ min natin

⁸ Nɔ sɔprayz we yu go ɛnisay ɛn si se dɛn de buli poman ɛn nɔ gi am in rayt; bikɔs di bigman dɛnsɛf gɛt dɛn yon bigman dɛn, ɛn dɛnwandɛnde sɛf gɛt dɛn yon bigman dɛn we pas dɛn.

⁹ Na wetin dɛn kin plant na kɔntri, di kiŋ sɛf kin abop pan.

¹⁰ Pɔsin we lɛk mɔni nɔ de ɛva satisfay wit mɔni; ɛn udat lɛk jɛntri nɔ de satisfay wit in prɔfit: dis insɛf na fɔ natin.

¹¹ Di mɔ yu gɛt, di mɔ mɔt yu gɛt fɔ fid. Us prɔfit yu gɛt naw, pas fɔ de si yu jɛntri wit yu yay we dɛn de it am..

¹² Lebra dɛn kin slip swit swit slip ivin if na lili tin dɛn gɛt fɔ it; bɔt dɛn jɛntriman dɛn jɛntri de mek dɛn nɔ slip ol nɛt.

¹³ Wan bad tin de we de apin na dis wɔl, na dat jɛntriman de gɛda jɛntri te i mɔna dɛn,

¹⁴ ɛn di bad tin dɛn we dɛn kin put an pan kin mek dɛn lɔs ɔl dɛn jɛntri. Natin nɔ kin lɛf sɛf fɔ day lɛf gi dɛn pikin dɛn.

¹⁵ Aw dɛn mama bɔn dɛn nekɛd, na so dɛn go day go bak nekɛd aw dɛn bin kam; dɛn nɔ go ol natin na dɛn an go, pan ɔl di yagba we dɛn yagba.

¹⁶ Na ɔda tin dis we de mɔna mi; aw dɛn kam na wɔl, na so dɛn de go bak; so wetin pɔsin de fɛt fɛt fɔ na di wɔl?

¹⁷ We yu luk am bak, ɔl dɛn layf, dɛn nɔ ɔndastand wetin na layf, ɛn na kɔnfyushɔn ɛn siknɛs ɛn vɛksteshɔn dɛn bin de pan.

¹⁸ Wetin mi tink se rayt fɔ du, na fɔ it ɛn drink ɛn ɛnjɔy wetin yu de yagba fɔ di shɔt tɛm we yu gɛt fɔ de na wɔl; na so PAPA GƆD se i fɔ bi fɔ mɔtalman.

¹⁹ Bɔt igen, fɔ di wan dɛn we PAPA GƆD gi mɔni ɛn prɔpati ɛn mek dɛn ebul ɛnjɔy am, ɛn tek am so se na so PAPA GƆD se, ɛn dɛn ebul ɛnjɔy dɛn lebɔ– na PAPA GƆD blɛs dɛn.

²⁰ I go at fɔ mek tin apin to dɛn we go mek dɛn wɔri, bikɔs PAPA GƆD kin mek dɛn gladi ɔltɛm.