Biblia Todo Logo
Bib sou entènèt

- Piblisite -

Daniɛl 10 - Krio Fɔs Oli Baybul


Di Mɛsenja We Kɔmɔt Ɛvin

1 Insay di tɔd ia we Sayrɔs na bin kiŋ na Pashia, wɔd bin kam to Daniɛl we in ɔda nem na bin Bɛlshaza. Di wɔd na bin tru wɔd, ɛn i bin briŋ big big kɔnfyushɔn. Daniɛl bin ɔndastand wetin dɛn se ɛn bin ɔndastand di vishɔn.

2 Dɛn tɛn dɛn de, mi, Daniɛl, bin de fast ɛn pre fɔ tri wik.

3 A nɔ bin de it natin we swit ɛn fayn, nɔn bif, nɔn wayn sɛf nɔ krɔs mi mɔt, ɛn a nɔ rɔb ɔyl pan misɛf at ɔl, fɔ di ful tri wik.

4 Di de we mek twɛnti fo insay di fɔs mɔnt na di Ju kalɛnda, as a bin tinap na di sho na da big riva, dat na Riva Taygris;

5 a es mi yay ɔp ɛn luk, nain a si wan man we bin wɛr linin klos ɛn i bin tay bɛlt we dɛn mek wit di gold we fayn pas ɔl, rawnd in wes, ɛn i kɔmɔt na Ɔpaz.

6 In bɔdi bin tan lɛk dayamɔn, ɛn in fes de shayn lɛk Laytin. In yay dɛn tan lɛk tɔch layt ɛn in an ɛn lɛg dɛn tan lɛk dɛn bras we dɛn pɔlish we de shayn, ɛn wɛn i de tɔk, in vɔys bin tan lɛk we big big krawd de mek nɔys.

7 Na mi Daniɛl waŋren bin si di vishɔn: bikɔs di pipul dɛn we wi ɔl bin de nɔ bin si dis vishɔn, bɔt dɛn bin de trimbul bad bad wan ɛn dɛn rɔnawe go ayd.

8 So na mi waŋren bin lɛf ɛn si dis big big vishɔn, ɛn a bin wik bad bad wan ɛn mi fes we bin de shayn brayt wan bin chenj bad bad wan, ɛn ɔl mi bɔdi bin wik.

9 Nain a yɛri in vɔys, ɛn wɛn a yɛri in vɔys, a butu na grɔn ɛn slip dip dip wan wit mi fes tɔn na grɔn.

10 Nain wantɛm, wan an tɔch mi, we mek mi an ɛn ni dɛn ɔl trimbul.

11 Nain i tɛl mi se, “Daniɛl, man we dɛn lɛk pasmak, lisin wetin a de tɛl yu. Tinap tret, bikɔs dɛn sɛn mi to yu.” Di tɛm we i bin de tɔk to mi, a tinap de trimbul.

12 Nain i tɛl mi se, “Daniɛl, nɔ fred, bikɔs frɔm di fɔs de we yu bin dɔn mek ɔp yu maynd fɔ ɔndastand ɛn put yusɛf dɔŋ bifo PAPA GƆD, dɛn bin dɔn yɛri wetin yu bin de se, ɛn a kam to yu bikɔs ɔf wetin yu bin de se.

13 Di prins we de na di Pashian kindɔm bin de fɛt mi fɔ twɛnti wande, bɔt Maykɛl, wan pan di akenjɛl dɛn, bin kan ɛp mi, so a lɛf an de wit di prins we de na di Pashian kindɔm,

14 ɛn a dɔn kam fɔ mek yu ɔndastand wetin gɛt fɔ apin to yu pipul dɛn bambay. Bikɔs di vishɔn nɔto fɔ naw, na fɔ bambay.

15 We i bin dɔn tɛl mi dɛn tin ya dɔn, a butu mi fes na grɔn ɛn nɔ bin ebul tɔk.

16 Nain a si sɔmbɔdi we tan lɛk mɔtalman tɔch mi lip dɛn, na datɛnde a bin ebul tɔk. Nain a tɛl di wan we bin tinap bifo mi se, “O mi PAPA GƆD, bikɔs ɔf di vishɔn, ɔl mi bɔdi de at mi ɛn ɔl mi bɔdi wik.

17 Aw mi we na mi masta in wokman go tɔk to mi masta? Rayt naw, mi bɔdi wik bad bad wan, ɛn a nɔ ebul blo bɛtɛ igen sɛf.”

18 Nain sɔmbɔdi we tan lɛk mɔtalman tɔch mi ɛn mek a gɛt trɛnk bak.

19 Nain i tɛl mi se, ‘Yu mɔtalman we dɛn lɛk pasmak, nɔ fred, lɛ yu gɛt kol at; gɛt maynd ɛn gɛt ay kɔrej.” Wɛn i dɔn tɔk to mi dɔn, a bin gɛt trɛnk bak. Nain a se, “Lɛ mi masta tɔk bikɔs yu dɔn gi mi trɛnk.”

20 Nain i se, “Yu no wetin mek a kam to yu? Naw, a go go bak ɛn go fɛt di prins na Pashia. Wɛn a go dɔn dɔn wit am, datɛnde, di prins na Gris go kam.

21 Bɔt a go tɛl yu wetin rayt insay di buk we gɛt di tru: Nɔbɔdi nɔ de we de ɛp mi fɛt dɛn prins dɛn ya, pas Maykɛl we na una prins.

Krio Bible © The Bible Society of Sierra Leone, 2013.

Bible Society in Sierra Leone
Swiv nou:



Piblisite