2 Kɔrint 10 - Krio Fɔs Oli Baybul

Pɔl Tray fɔ Sho se Wetin I de Du Rayt

¹ Na mi, Pɔl, de beg una dɛn se a de fred fred wɛn a de wit una, na wɛn a nɔ de klos una nɔmɔ, a gɛt mɔt. A de tek di sem peshɛnt ɛn kwayɛt we we Krays gɛt beg una:

² una nɔ fos mi fɔ dil wit una traŋa wan wɛn a kam to una; a shɔ se a go dil wit dɛn wan we de se nɔto fɔ Gɔd wi de du ɔl wetin wi de du so.

³ Na tru se na di wɔl wi de, bɔt wi nɔ de fɛt lɛkɛ aw mɔtalman de fɛt.

⁴ Di tin dɛn we wi de tek fɛt nɔ kɔmɔt na dis wɔl, dɛn kɔmɔt to Gɔd, we gɛt pawa; na dɛn wi de tek rut dɛn tin we tinap traŋa. Wi de yus dɛn fɔ sho se dɛn agyu we pipul de agyu bɔt Gɔd na nɔnsɛns;

⁵ wi de tek dɛn pwɛl dɛn tin we de mek pipul prawd we mek dɛn nɔ want fɔ no Gɔd; wi de yus dɛn fɔ mek pɔsin tap fɔ tink ɛnitin we go mek i nɔ du wetin Gɔd se i fɔ du, so i go chenj ɛn i go want du wetin Gɔd se i fɔ du.

⁶ Wɛn una go dɔn pruv se fɔ tru una de fala Krays, wi go rɛdi fɔ pɔnish ɛnibɔdi we nɔ de du wetin Gɔd want.

⁷ Na wetin pɔsin de si nɔmɔ, una de luk. If pɔsin de we tink se in blant Krays, mek i no se aw in blant Krays, na so wisɛf blant Krays.

⁸ A nɔ de shem ivin if i tan lɛkɛ se a de bost tumɔs se na di Masta sɛn wi fɔ kam ɛp una, nɔto fɔ mek una tap fɔ biliv.

⁹ A nɔ want mek i tan lɛkɛ se di lɛta dɛn we a de rayt na fɔ mek una fred.

¹⁰ Sɔntɛm sɔm pipul de tɔk se, “Dɛn lɛta ya we Pɔl de rayt traŋa o, bɔt wɛn yu si insɛf, i nɔ tan lɛkɛ fɔ se nain de rayt di lɛta dɛn, bikɔs i nɔ ebul tɔk bɛtɛ sɛf.”

¹¹ If ɛnibɔdi de tɔk so, da pɔsin de fɔ ɔndastand se wetin wi de rayt na wi lɛta dɛn ɛn wetin wi de du wɛn wi kam to una, nɔto tu difrɛn tin.

¹² Unasɛf no se wi nɔ go kɔmpia wisɛf wit dɛn wan we fil se dɛn bɛtɛ pas ɔda pipul. Dɛn nɔ gɛt sɛns, fɔ tru! Dɛn jɛs de kɔmpia dɛnsɛf wit dɛn kɔmpin, ɛn na wetin dɛn tink se rayt dɛn de tek jɔj dɛnsɛf!

¹³ Bɔt wi nɔ go bost bɔt ɛni ɔda tin pas wetin wi fɔ bost bɔt; dat na di wok we Gɔd gi wi fɔ du, ɛn di wok we wi de du fɔ una miks de.

¹⁴ So wi nɔ de du ɛnitin pas wetin wi fɔ du we wi de tɛl una di Gud Nyuz, bikɔs na wi fɔs bin rich to una ɛn tɛl una di Gud Nyuz bɔt Krays.

¹⁵ Wi nɔ de bost bɔt wetin ɔda pipul dɔn du; wi de abop se aw una de biliv Gɔd mɔ ɛn mɔ, na so wisɛf go de ɛp una mɔ ɛn mɔ.

¹⁶ Afta dat, wi go lɛf una go na sɔm ɔda kɔntri dɛn we nɔ ɔda pɔsin nɔ tɔk di Gud Nyuz yet, ɛn tɛl pipul di Gud Nyuz, so dat wi nɔ go gɛt fɔ bost bɔt di wok we ɔda pɔsin dɔn du.

¹⁷ Bɔt wi fɔ du lɛkɛ aw dɛn rayt na Gɔd in Buk, we dɛn se, “Ɛnibɔdi we want bost, fɔ bost bɔt di wok we di Masta dɔn du.”

¹⁸ Pɔsin we Gɔd gri fɔ, na pɔsin we in tɔk se du wɛl, nɔto pɔsin we nainsɛf de tɔk se in de du wɛl.