یعقوب 1 - Пәймана Ну (Инщил)

Сьлавкьрьн

¹ Жь Аԛубе хӧламе Хԝәде у Хӧдан Иса Мәсиһ: Сьлав ль ԝә һәр донздәһ әʼширед дьнйайеда бәлабуйи бә.

Баԝәри у сәрԝахти

² Хушк-бьрайед мьн, шабунәкә мәзьн һʼәсаб кьн, гава һун бькʼәвьнә нава щурʼә-щурʼә щерʼьбандьна.

³ Фәʼмдари йә, кӧ щерʼьбандьна баԝәрийа ԝә сәбьре пешда тинә.

⁴ У сәбьр жи, бьра бь думька дьреж бә, ԝәки һун кʼамьл у гьһишти бьн, тʼӧ кемасикә ԝә тʼӧнәбә.

⁵ Һәгәр сәрԝахтийа йәки жь ԝә тʼера ԝи накә, бьра һиви жь Хԝәде бькә у ԝе жь ԝирʼа бе дайине. Әԝ бь мәрʼдани дьдә һʼәмуйа у тʼӧ кәси беԛәдьр накә.

⁶ Ле тʼәне бьра бь баԝәрийе бьхԝазә у дӧдьли нәбә, чьмки йе дӧдьли мина пелед бәʼре йә кӧ жь байе бьльнд дьбьн у датиньн.

⁷ Мәрьве ӧса бьра нәфькьрә, кӧ ԝе тьштәки жь Хӧдан бьстинә.

⁸ Әԝ мәрьве кӧ сәр дӧ ньга дькӧлә, һʼәму гавед хԝәда нә сәр йа хԝә йә.

Фәԛир у дәԝләти

⁹ Бьрайе бәләнгаз бьра сәр бьльндбуна хԝә бьфьрʼә,

¹⁰ ле йе дәԝләти сәр ньмьзбуна хԝә, чьмки әԝе мина гӧлед гиһе һʼьшк бә һәрʼә.

¹¹ Чаԝа тәʼв бь гәрмайийа хԝәва дәрте гиһе һʼьшк дькә, гӧл же дьԝарьн у бәдәԝәтийа диндара ԝе жи ӧнда дьбә, ӧса жи йе дәԝләти ԝе ише хԝәда бьчʼьлмьсә һәрʼә.

Кʼәтьн-рʼабун

¹² Хԝәзи ль ԝи мәрьви, кӧ щерʼьбандьнада тәйах дькә, чьмки гава бь щерʼьбандьне рʼуспи дәре, әԝе тʼаще жийине бьстинә, кʼижан кӧ Хԝәде ԝанрʼа соз дайә, йед кӧ Ԝи һʼьз дькьн.

¹³ Бьра тʼӧ кәс, йе кӧ нава щерʼьбандьнеда йә, нәбежә: «Хԝәде мьн бь хьрабийе дьщерʼьбинә», чьмки Хԝәде хьрабийада найе щерʼьбандьне у нә жи йәки дьщерʼьбинә.

¹⁴ Ле һәр кәс дьбә машоԛе дьлһавьжийед хԝә, дьхапә у те щерʼьбандьне.

¹⁵ Һьнге дьлһавьжи кәле хԝә дьстинә, гӧнә же дьфьрькә у гӧнә жи кӧ мәзьн дьбә, мьрьн же дьбә.

¹⁶ Нәхапьн хушк-бьрайед мьнә дәлал!

¹⁷ Һәр дайина ԛәнщ у һәр пʼешкʼеша кʼамьл жь жор ә, жь Бав, жь Әʼфьрандаре рʼонайа те хԝаре, Йе кӧ нә Хԝәха те гӧһастьне, нә жи си бәр Ԝи дадьгәрʼә.

¹⁸ Әԝи ль гора ԛьрара Хԝә әм бь хәбәра рʼастийе жь Хԝә дьне хьстьн, ԝәки әм бьбьнә аԝазәки бәред дәрәмәта пешьнә әʼфьринед Ԝи.

Бьбьһен у бьԛәдиньн

¹⁹ Заньбьн, хушк-бьрайед мьнә дәлал, бьра һәр мәрьв бьһистьнеда сәрхԝә бә, ле хәбәрдан у һерскʼәтьнеда гьран бә,

²⁰ чьмки һерса мерьв һәԛийа Хԝәде найнә сери.

²¹ Ләма һʼәму мьрʼдарʼийе у һәр хьрабийе жь хԝә дур хьн, бь мьлуктийе ԝе хәбәра нава ԝәда чанди ԛәбул кьн, йа кӧ дькарә рʼӧһʼе ԝә хьлаз кә.

²² Хәбәре бьԛәдиньн, нә кӧ тʼәне бьбьһен у ӧса хԝә бьхапиньн.

²³ Һәгәр йәк хәбәре тʼәне дьбьһе у наԛәдинә, әԝ мина ԝи мәрьви йә, йе кӧ нәйнькеда рʼәнг-рʼуйе хԝә дьньһерʼә.

²⁴ Хԝә дьбинә, дәрбаз дьбә дьчә у зу бир дькә, кӧ әԝ йәки чаԝа бу.

²⁵ Ле әԝе кӧ чʼәʼве хԝә жь ԛануна кʼамьлә кӧ аза дькә набьрʼә у нава ԝеда дьминә, дьбьһе бир накә, ле дьԛәдинә, әԝ ԝан кьрьнед хԝәда хԝәзьли йә.

²⁶ Һәгәр йәк хԝә хԝәденас һʼәсаб дькә у зьмане хԝә нькарә, әԝ хԝәха хԝә дьхапинә, хԝәденасийа ԝи пʼучʼ ә.

²⁷ Ль бәр Бав Хԝәдейе мә хԝәденасийа рʼаст у беԛӧсур әв ә: Тәʼли-тәнгийада дәст бавежьнә сеԝийа у жьнәбийа у һʼәвза хԝә жи жь ләкʼед дьне бькә.