John 11 - Sa Ugud Apudyus

Sa Ummuliyan Lazarus

¹ Inninggaw laḻaḵi ye nasaḵite nangngadan aḵ Lazarus ad Bethany ye ilin da Mary ḵan Martha we sunudna.

² Aḵ Mary ḵad, siya nangisig atte bangbanglu we lana'tte suḵin Jesus woḵ pinunasana bos si buuḵna.

³ Gapu ḵad ta nasaḵit aḵ Lazarus, nangibuun da ansunud aḵ umoy angibaga ḵan Jesus ḵanane, “Apu, nasaḵit ay-ayatome buḻbuḻunnu.”

⁴ Dingngoḻ ḵad Jesus ḵanana, “Sa sanate saḵit, daḵampun aḵ miḵatoy yaḵon ambanag si midayawan Apudyus ta sa Abeng Apudyus midayaw gapu'tte sanat.”

⁵ Aḵ Jesus ḵad, ay-ayatona da ansusunude da Martha, Mary ya aḵ Lazarus.

⁶ Pun dingngoḻna ḵade nasaḵit aḵ Lazarus, inninggaw aḵ duwan aḻgaw si ili ye inninggawana.

⁷ Pun naḻaḵpus ḵad duwan aḻgaw, ḵanana'tta disipuluna, “Intaḵu mipauli'tte probinsiya'd Judea.”

⁸ Ḵanan da disipuluna, “Mistulu, singsington da Judyu amatuwanda ḵan siḵa, ngaipaḵa bos umoy?”

⁹ Ḵanan Jesus, “Daḵampun ḵamman aḵ nasawaḻan aḵ duwae oras sin-aḻgaw? Nu anaddaḻan tagu si aḻgaw, adipun misaballut te ampadda.

¹⁰ Yaḵon nu labi anaddaḻanan ni tagu, misaballut te anggiḵbot.”

¹¹ Ginangputna ḵad imbaga da sana ḵanana, “Aḵ Lazarus we buḻbuḻun taḵu nasuyop yaḵon iyyaḵ bangonon.”

¹² Ḵanan da disipuluna, “Apu, nu nasuyop aḵ Lazarus, malin-awaan.”

¹³ Sa pion Jesus ḵanan, natoy. Yaḵon ḵananpun da disipulu nu tuttuwae nasuyop.

¹⁴ Pune sadi, ḵanan Jesus we nangipaḵaawat, “Natoy aḵ Lazarus

¹⁵ ya gapu ḵan diḵayu allaylayadaḵ te naidaḵpun sidi ta amati ḵayu. Yaḵon intaḵu ḵan siya.”

¹⁶ Ḵanan Thomas we ngannonda Ḵapil atta buḻunnae disipulu, “Intaḵu ta maḵaḵatoy taḵu ḵan Jesus.”

¹⁷ Dummatongda ḵad ad Bethany, inigammun Jesus we opat aḻgaw naḻaḵpus si nilibonan Lazarus.

¹⁸ Ad Bethany adani'd Jerusalem, sa bootna umoye taddaḻanon ni osa si adipun masin-orasan.

¹⁹ Pun adu da Judyu we ummoy nalliwliwa ḵan da Mary ḵan Martha mipanggob si sunudda.

²⁰ Dingngoḻ ḵad Martha we annate umali'ḵ Jesus, lummawa woḵ ummoyna inabot. Yaḵon aḵ Mary, inninggaw atte boḻoyda.

²¹ Ḵanan Martha ḵan Jesus, “Apu, nu inninggawḵa sina, adipun oḵyan sunudḵu natoy.

²² Yaḵon taḵon ay sinsadi, igammuḵe itton Apudyus da ngaimane ḵodawom ḵan siya.”

²³ Ḵanan Jesus, “Umuli'ḵ sunudnu.”

²⁴ Ḵanan Martha, “Igammuḵe umuli'tte umuliyan da natoy si anungus ni aḻgaw.”

²⁵ Ḵanan Jesus, “Saḵon anagu ḵasin atta natoy ya angitod atte biyag aḵ inggana. Ḵad ngaimane amati ḵan saḵon, taḵon ay nu matoy, matagu'ḵ inggana.

²⁶ Ḵad ngaimane matagu ya amati ḵan saḵon, adipun paat matoy. Patiyom ḵamman anna?”

²⁷ Ḵanan Martha, “On Apu, amatiyaḵe siḵa Kristu we Abeng Apudyus we umali si annae lubung.”

²⁸ Imbagan ḵad Martha sana, nipauli'ḵ ḵuwada woḵ inayagana'ḵ sunudnae Mary, ḵananae nangiyagapaap, “Awad aḵ Mistulu we paayagna siḵa.”

²⁹ Dingngoḻna ḵad ay, natanaḵdog woḵ ummoy niyabot ḵan siya.

³⁰ Te aḵ Jesus ḵad, daampun miduum atte ili yaḵon sissiya si nangabotan Martha.

³¹ Da Judyu we inninggaw ḵan Mary si boḻoye nalliwliwa ḵan siya, innilada ḵade natanaḵdog woḵ lummawa, tinun-udda te ḵanandapun nu umoy umibil si libon.

³² Dummatong ḵad aḵ Mary si igaw Jesus, nanalluḵu si sinagungna woḵ ḵanana, “Apu, nu inninggawḵa sina, adipun oḵyan sunudḵu natoy.”

³³ Innilan ḵad Jesus we umibiibil aḵ Mary ya da Judyu we nibuḻun ḵan siya, amo nasuḻsuḻdung,

³⁴ woḵ ḵanana, “Dinu nangilibonanyu?” Ḵananda, “Apu, awwaynu ta inḵa ilan.”

³⁵ Ummibil aḵ Jesus.

³⁶ Pun ḵanan da Judyu, “Ilanyu ḵad, ay-ayatona pagay aḵ Lazarus.”

³⁷ Yaḵon ḵanan da udum, “Daḵampun ḵamman aḵ siya naniyat atta atan ni naḵuḻap ḵad ngaipana adi ḵinaan saḵit Lazarus ta adi oḵyan natoy?”

³⁸ Pun nasuḻsuḻdung os aḵ Jesus woḵ ummoy si libone liyange batu onobna.

³⁹ Ḵanan Jesus, “Ḵaanonyu sanate batu.” Ḵanan Martha we sunud Lazarus, “Apu! Ambuyuḵ te ḵapat aḻgawnae nilibon.”

⁴⁰ Ḵanan Jesus, “Adiḵpun ḵamman imbagae nu amatiḵa, ilam madayawan Apudyus?”

⁴¹ Pune sadi, ḵinaanda batu. Ḵanan Jesus we nantangad, “Ama, anggappiyaaḵ ḵan siḵa te dingngoḻnu saḵon.

⁴² Inigammuḵe pasige dongngom saḵon yaḵon ibagaḵ sana mipagapu'tta annae tagu we ataḵtaḵdog ta amatidae siḵa nangibuun ḵan saḵon.”

⁴³ Inabusna ḵad imbaga anna, indangsoḻna ḵanane nampoḵaw, “Lazarus, tumoḵwaḻḵa!”

⁴⁴ Pun tummoḵwaḻ aḵ Lazarus we nabadabadan da imana ya da suḵina si sinnun ya nabusdung uḻuna si sinnun. Ḵanan Jesus, “Uḵasanyu badabadna ta anaddaḻan.”

Sa Inondae Angongat Ḵan Jesus

⁴⁵ Pun adu'tta Judyu da naḵaoy ḵan da Mary, innilada ḵad ḵingwan Jesus, namatida ḵan siya.

⁴⁶ Yaḵon da udum, ummoyda'tta Pharisee woḵ imbagada ḵingwan Jesus.

⁴⁷ Pun da papangat da papadi ya da Pharisee, impaayagda da ḵuḵunsisaḻ woḵ ḵananda, “Ngai ḵoon taḵu? Te adu da ḵingwan ni annae tagu we nakaskasdaawe sinyal.

⁴⁸ Te nu ipayam taḵu ya ḵooḵoona, losan da tagu amati ḵan siya. Ḵad umali da iRome we angipangat ḵan ditaḵu ya dadailonda templo ya sa ili taḵu.”

⁴⁹ Yaḵon sa osa ḵan didae aḵ Caiaphas we ḵangatuwane padi'tte sadi ye tawon, ḵanana'tta udum, “Naippun pulus igammuyu.

⁵⁰ Adiyupun os ay maawatane unnoyna oḵyan ossaan aḵ matoy para'tta tagu ta adi da losane umili matoy?”

⁵¹ Adinapun imbaga sana si ḵasomsomḵana yaḵon gapu ta siya ḵangatuwane padi'tte sadi ye tawon, impadtunae ḵasapuḻane matoy aḵ Jesus ta matagu da losane ḵailiyanae Judyu.

⁵² Ḵad daḵampun aḵ abus da ḵailiyana yaḵon andaḵdaḵngona da abeng Apudyus we naas-asipaḻaḵ atta nansabasabali ye ili ta da losane abeng Apudyus Judyu man ḵan Gentil an-ossaanda.

⁵³ Pun inggan ni sadi ye aḻgaw, namplanu da papangat da Judyu nu ngai inondae angongat ḵan Jesus.

⁵⁴ Pun adipun ogon aḵ Jesus umoy ampaila'tte maḻamaḻang atta Judyu yaḵon ummoy atte ili'd Ephraim we adani si bumbummaaw. Naḵaigaw sidi atta disipuluna.

⁵⁵ Madam-an ḵad de Gayagayan da Judyu we ngannonda Nallausan, summang-at da adu we tagu'd Jerusalem we naḻpu'tta probinsiya ta umoyda papoḻḵason da long-agda si daan misaḻad gayagaya.

⁵⁶ Singsingngitda'ḵ Jesus woḵ ḵanan da ataḵtaḵdog atte paway ni templo we nan-asiimus, “Ngai ḵasomsomḵanyu? Adipun ḵamman umali maḵagayagaya'ḵ Jesus?”

⁵⁷ Imbilin da papangat da papadi ya da Pharisee ye nu ngai angigammu si igaw Jesus ipaigammuda oḵyan ḵan dida ta padoḵmada.