Colossians 4 - Sa Ugud Apudyus

¹ Diḵayu ḵade ap-apuwon da musassu, ḵoonyu da ustu ya da ambaḻu ḵan dida te igammuyu we awad os apuyu'd langit.

Sa Bagbaga Atta Namati

² Ipapatiyu we alluwaḻu ḵad ummanyu sosomḵon da panggobyu we iluwaḻu ya anggappiya ḵayu bos ḵan Apudyus.

³ Iluwaḻuwanyu bos diḵani ta itton Apudyus ambaḻu we timpu si angiwaḻagawaganni'tte banage adipun nipaigammu si awe mipanggob ḵan Kristu te sana gapun ni nabaḻudaḵ.

⁴ Iluwaḻuwanaḵ ta lamogḵu we angipaḵaawate ustu te sanat da banage ḵooḵ oḵyan.

⁵ Ummanyu'tta gunayyu'tta daampun amati, ḵad usaronyu losane timpu we angibaga ḵan dida si mipanggob ḵan Kristu.

⁶ Ḵad pasig oḵyan ampalayad ḵan ustu da ugudonyu ta awad ḵad angimus ḵan diḵayu igammuyu ustu we isongbatyu.

Sa Anungus Ni Annae Suḻat

⁷ Aḵ Tychicus angipaigammu ḵan diḵayu'tta losane naḵwa ḵan saḵon. Ḵad siya osa'tta sunud taḵu ḵan Kristu we ay-ayatoḵ ya buḻunḵu we mataḻgodane sammilun Apu.

⁸ Siya ibuunni ḵan diḵayu ta ipaigammuna da maḵmaḵwa ḵan diḵani sina ya soḻgagona da somsomoḵyu.

⁹ Maḵaoy aḵ Onesimus ḵan siya, sa ay-ayaton ya mataḻgodane sunud taḵu ḵan Kristu we osa ḵan diḵayu. Sana da duwae umoy angibaga ḵan diḵayu'tta losane maḵmaḵwa sina.

¹⁰ Aḵ Aristarchus we buḻunḵu we baḻud ya aḵ Mark we ḵapingsan Barnabas, pakumustaonda diḵayu. Inawatyu bilin atte mipanggob ḵan Mark, ḵad nu umali bumisita, mangiliyonyu we ustu.

¹¹ Aḵ Jesus we nangngadan aḵ Justus pakumustaona bos diḵayu. Abus da annae tuḻu we namati ye Judyu aḵ bummadang ḵan saḵon atte nangiwaḻagawaganni si mipanggob atte ampangatan Apudyus. Ḵad dida amapigsa'tte somsomoḵḵu.

¹² Aḵ Epaphras ḵad, osae kagrupuwanyu we angipapuute anserbi ḵan Jesu Kristu, pakumustaona bos diḵayu ya ipapatina iluwaḻuwan diḵayu ta pumigsa da pammatiyu, ta adi ḵayu anduwaduwae angunud si pinion Apudyus.

¹³ Taḵdoḻaḵe ipapuutnae anḵewaaḻ para ḵan diḵayu ya da awad ad Laodicea ya Hierapolis.

¹⁴ Aḵ Luke we ay-ayaton taḵu we an-aagas ya aḵ Demas, pakumustaon os diḵayu.

¹⁵ Pakumustaonyu da susunud taḵu ḵan Kristu ad Laodicea ya aḵ Nympha ya sa gimung da namati ye dam-on madagudagup atte boḻoyna.

¹⁶ Ḵad nu gangputonyu basaon annae suḻat, idagasyu ud os atta namati ye magimugimung ad Laodicea ta basaonda. Ḵad basaonyu bos suḻatḵu ḵan dida.

¹⁷ Ibagayu ḵappos ḵan Archippus ta igangputna ḵewaaḻe intaḻgod Apu ḵan siya.

¹⁸ Saḵon aḵ Paul we nangigili ye mismu si annae anungus ni annae suḻat. Kumusta ḵayu ya adiyu ḵappos saḵon maliwatane annaaḵ si babaḻḻudan. Awad oḵyan ḵan diḵayu ḵinabaḻu we maḻpu ḵan Apudyus.