1 तिमुथियुस 4 - बिलासपुरी नौआं नियमझूट्ठे शिक्षक 1 पवित्र आत्मा साफ-साफ बोलां भई आखिरी दिनां च किछ लोकां मसीह रिया शिक्षा पर विश्वास करना छड्डिने दुष्टात्मां री शिक्षा पर विश्वास करना, तिन्हां भटकाणे औलियां बुरीआत्मां जो अपनाणा। 2 सै लोक जे ये झुट्ठियां शिक्षां देआं थे सै झूट्ठे लोक ये कने तिन्हांरी अन्तरात्मा मरी चुक्कीरी तियां जे भई गर्म लोहे तिन्हांजो जल़ाई तरा हो, 3 येढ़े लोक ये सखायें भई ब्याह करना कने किछ किस्मा रा भोजन खाणा गल़त आ। पर परमेशरे ये खाणा विश्वासी लोकां खातर बणाईरा सै जे सच्चिया शिक्षा जो जाणाँ ये भई परमेशरा रा धन्यवाद करीने खाया जाओ। 4 काँह्भई परमेशरा री बणाईरी हर इक चीज़ बधिया इ कने अहें सब किछ खाई सक्कां ये; पर ये भई धन्यवाद करीने खाई जाओ, 5 काँह्भई ये सब किछ परमेशरा रे वचन कने प्राथना रे जरिये शुद्ध हुई जां। मसीह रे उत्तम सेवक 6 जे तू विश्वासियां जो लगातार इन्हां गल्लां री याद दिलान्दा रैहंगा, कने विश्वास कने तिस खरे उपदेशा रियां गल्लां ते, तिन्हांजो जे तू मनदा आईरा तेरा पालन पोषण कराँ, तां तू मसीह यीशुये रा इक खरा सेवक हूणा। 7 पर मन घड़न्त कने बेकार कहाणियां ते दूर रैयां तिन्हांते जे परमेशरा जो आदर नीं मिलदा, बल्कि भगतिया रा जीवन जीणे खातर खुद लगातार मेहणत कर। 8 काँह्भई शरीरा रिया वर्जिशा रा किछ इ फायदा मिलां, पर आत्मिक वर्जिश सारियां गल्लां खातर फायदेमन्द इ, काँह्भई ये इक्की माहणुये रे जिऊंदा रैहन्दे हुये बी कने मरने ते बाद बी तिसरी मदद कराँ इ। 9 ये गल्ल सच्च कने हर तरिके ने मनणे लायक इ। 10 अहें मेहणत कने कोशिश इस इ खातर कराँ ये भई अहांरी आशा तिस जीवते परमेशरा पर इ सै जे सब माहणुआं रा कने खास कर विश्वासियां रा छुटकारा करने औल़ा। 11 विश्वासियां जो इन्हां गल्लां रा हुक्म दे कने सखा। 12 कोई तेरिया ज्वानिया जो बेकार नीं समझणे पाओ; पर वचन, कने चाल-चल़ण कने प्यार कने विश्वास, कने पवित्रता च विश्वासियां खातर आदर्श बणी जा। 13 तदुआं तका जे हऊँ नीं आऊं, तदुआं तका वचन पढ़ने कने उपदेश देणे कने सखाणे रा काम्म कर। 14 सै वरदान्न सै जे भविष्यवाणिया रे दवारा तूह पर प्राचीनां रे हाथ रखदे बगता तिज्जो मिलया था, तिस्सो लगातार तिज्जो इस्तेमाल करना चाहिन्दा। 15 इन्हां गल्लां जो करदा रै कने इन्हां गल्लां पर अपणा ध्यान लगाईने रख, ताकि तेरी तरक्की सारे देखी सक्को। 16 इस बारे च सावधान रै भई तू कियां जीं कराँ कने क्या सखाया राँ। इन्हां गल्लां जो लगातार करदा रै काँह्भई जे येढ़ा करदा रैंहगा, तां तू अपणा कने तिज्जो सुणने औल़यां रा बी छुटकारा करगा। |
This work is licensed under Creative Commons Attribution-ShareAlike 4.0 License.