1 कुरिंती 13 - Korwa Bible

¹ ईंग सेरमोरिकुःआ बराहीलकूराः अरू होड़कूराः भासीरे होयिंग बड़रा, मनदो ईंग एटाः होड़कू मेरिंग दुलार दो छिपी टका-टोँड़ा इया, अरू खंजड़ी विरीनता हना इया इदानिंगा।

² ईंग भगवानराः बड़रायिंग कता अवे, अरू भगवानराः ओकोत कता अरू कनहून जमालेःआयिंग बुझाव अवेन, अरू पहाड़कून चलाः एंडागे इयाःआ बिसवास ईंग एचेरे इदान हों ईंग एटाः होड़कू मेरिंग दुलार दो, ईंग कही कोवायिंगा।

³ ईंग इनिंगराः जमा आन-धान गरीब होड़कूयिंग एमेवा, अरू ईंग ईंगराः देह बाल लो एंडागे लगायिंग जिमा अवेय, मनदो ईंग एटाः होड़कू मेरिंग दुलार दो, ईंग कही कोवायिंगा।

⁴ एटाः होड़कूय दुलारता हाँयग होड़ मयादार अरू सहाव घड़ीने दोहोनता। हाँय मेरेय इरावाकूता, सहे मेरेय बड़वारता। हाँय मेरेय फुलाईता,

⁵ सहे गियुः इया मेरेय सलाःता। हाँय अनँयग नफा लगा मेरेय ओंगलेता, सहे ओहेन मेरेय रिसुःता। हाँय एटाःकूराः गारबार, अनँयग जीवरे मेरेय ओंगोल दोहोयता।

⁶ हाँय बेलूर बुतारे मेरेय ननायगुःता, मनदो सताय कताकूनरेय ननायगुःता।

⁷ एटाःकूय दुलारता हाँयग होड़ जमालेःआय अयूम पसावगोडता, जमालेःआ मेरेय जाःगेता, जमालेःआ लगाय असरागेता, जमालेःआय सहवेता।

⁸ भगवानराः बड़रा कता होड़कूराः कता चबा जुवाःता, अनबुझ भासीकू बड़राता हँकुःआ होड़कूराः बड़रा केड़े जुवाःता, कनहूनदारकूराः कनहून टुटीग जुवाःता, मनदो एटाः होड़कूय दुलारता हाँयग होड़राः दुलार कहियो ओरो टगावनेना।

⁹ अबूराः कनहून गुनुनमिन इदा, अरू अबू भगवानराः बड़राबू कताता हना उडु-बुडू कोवानेःआ।

¹⁰ मनदो उडु बुडूत कता होयाःता हना टुटीग बेलारे, उडु-बुडूत कोवानेःआ हना जमाकून टगाव जुवाःता।

¹¹ ईंग लँइगिंग दोहोन मेला, लनँइग इयायिंग बुतुड़ुःआ, अरू लइंकू इयायिंग ओंगलेःआ, अरू लनँइग इयायिंग ओंगोल चुवेरगुःआ। मनदो ईंग सयाँड़यान दो, ईंग लँइग इया ओंगोलकून मिनी मुरुखियायिंग अड़ाः एंडागोतेडा।

¹² नुँहू अबू अइनारे उंबूलताबू ञेलता हना इया कोयोल कोयोलबू ञेञेलतना। मनदो हनमेला अबू मुहा-मुहीबू ञेलता। नुँहू ईंग एचेरे गुनुनमिन कनहून इदा। मनदो भगवान ईंग बदीरे उडु-बुडूय सुदीकेरा हनन इया हनमेला ईंग हों उडु-बुडूयिंग सुदीगोडता।

¹³ दो अबू बिसवासगेता, अरूबू असरागेता, अरूबू दुलारता, नाःआ पेनेय मेनेर टगाःता। मनदो नाःआ पेनेय अते मनइद मरंग एटाःकू दुलारता हना हवे।