Лука 14 - Анкълова Лука

14 къаьм Шамат водиъ лъӣла унтилаъ кӀокӀо̄ сукӀо ахъилло

¹ Гьоᵸс шамат водиъ фарисейлила сид укъа гьаькимлила билӀоъ Иса эсал оᵸкъолъ, Гьолцо сийоле йовалла̄лӀона гувабацӀона бечена зувакъойо гьулиъ гаьгьийа̄ аьдамла.

² Гьолцодой аьᵸйда̄ оᵸкъойо оᵸхаъ лъи йечена кӀокӀо̄ сукӀо.

³ Вагьлиъис Иса диниябла аьлимла̄хъана фарисейла̄хъана нисолло: «Шамат водиъ кӀовакӀова̄ аьдамла сагъ бовал ба̄хъцад йаги ба̄хъаъасди?»

⁴ Гьогго̄л гьокӀа йоваъинна гьихбалъойо. Иса ко̄на йеᵸхенна гьули сукӀо ахъилло бета билӀогъа э̄ᵸйо.

⁵ Иса гьоллохъана нисойо: – Мизос лъойсна аᵸу йаги оᵸс лъи гаьгьийа тагьризлиъ бекда, шамат водо гейлӀо нисода, гиса багъаъасди миже гьоло?

⁶ Гьоллохъа кьа̄ь гьоьшшона нисона йахъеэш.

МутӀиъ бахъал нуцӀоцалас дарс

⁷ Гьолцогъой бесал бовакӀийа аьдамла̄ супралгъа со̄ᵸ гьидел санаъатаб кӀетӀо маьче бохал аьᵸйдаба̄кчаш бегабалъ, Иса гьоллол гьоᵸс хабар ме̄йо.

⁸ – Бейтеллиъ ийалӀелъ, кьушеллидой шеблаъ къе̄ беца̄къа. Гьулиъ къе̄ бецал илӀейа̄ъ дӯгъана къиматаб сукӀо зогъца.

⁹ Мийа̄ъ, илӀейо бадисо сукӀо оᵸкъолъ, кьодо оᵸкъова бетӀергьалли дӯхъа нисас: «НилӀа гьоцо сукӀол маьче», – лӀо. Ницна ахъна, аьгъиъна биссун муьгъатта̄ла мицаъ къе̄ эцал нуцӀас.

¹⁰ Оᵸкъослаъзу, ми бишшун муьгъатта̄ къе̄ эче. БетӀергьаллил ми эга̄йоназу, дудойна гогьна нисас: «Гьалмагъ, аьгъиъна аьᵸйда̄ кӀетӀа мицаъ къе̄ эче», – лӀо. Гьолълъогъа муьгъатта̄ бейтелликьа гаьгьийа̄ъ эᵸдо дибо къадро-къиматна кьодда̄кас.

¹¹ СудлӀо нисода гьинизу жу кьодда̄кӀийо сукӀо Аллагьлидой аьᵸйда̄ лӀийода̄ ахъца, жу лӀийода̄ эгацас сукӀо кьодда̄кца.

¹² Бета Иса билӀола бетӀергьаллихъа нисойо: – Вагьаддийо бес-хулӀо̄лъи йо̄лъ, бовакӀийа сукӀоба̄ мина кьа̄ь окӀаллакьа кулна богьна, гьоллоъкьа̄ гьоᵸсдана пайда гаьгьийо жо йахъаслӀона, дибо вацца̄на, иснана, аьгарлъина, бечедабла мадугьаллана бовакӀа̄къа.

¹³ Вагьаллийо бес-хулӀо̄лъи йо̄лъ, ми бовакӀа гьардухъаллана, азизабла аьдамлана, гьула̄зу лаьхъдийа̄, боцдийа̄ сукӀобана.

¹⁴ Талигьаб гей ми гьоглохъа дул йоцӀона йахъаъалъ. Жейса дуниялликьа гьоглол йо̄йо жо хиса къиямасаб водиъ муъмилла бувагъоваъас баьгъбаъла̄лъо дул гьули йиᵸхъас.

Бесал бовакӀийа̄кьас хабар

¹⁵ Вагьли тухълъо, гьулиъ гаьгьийа сидцойсола Гьолцохъа нисойо: – Гьардараб гей Аллагьлила Парчагьлиъ къе̄на эчена баьба муьхъчаш сукӀо.

¹⁶ Исана гьолцохъа кьа̄ь нисойо: – Нишел тели аьдамла бесал илӀал гьоькмо бахъийо гьоᵸс пуланаб сукӀос.

¹⁷ Бесалцо бог мокъолъ, гьолцо э̄ᵸйолӀо гьинис лагъ бовакӀийа аьдамла бесал илӀал. Эᵸкьена лагъли гьоглохъа нисойолӀо: «Гугь миже, къацӀцӀо кен-оᵸх лъикъона».

¹⁸ КъацӀцӀола гьоᵸс сикӀо йогьна нисойо жуво̄л нигъана гувал бахъаъаслӀо; ми илокьа кьодос тилӀкилӀо. Сиди нисойолӀо: «Гьини гьоᵸс маьче бохна гей, гьоло маьче бега̄л эᵸкьал нуцӀос, гьарзи йо̄с дӯхъа, ми дӣкьа кьодос тилӀки».

¹⁹ Бацосола нисойолӀо: «Гьини ацӀона оᵸс бохна гей, вагьалло̄л лӀийаᵸгьна йийакъелал йа̄тӀна гей, гьарзи йо̄с дӯхъа, ми дӣкьа кьодос тилӀки».

²⁰ Лъанасла нисойолӀо: «Гьини жейса ахъо йоᵸкъона гей, вагьалълъобза жу говал ахъаъас».

²¹ Лагъ кьа̄ь билӀогъа оᵸкъолъ, ме̄йолӀо гьинила бетӀергьаллихъа къацӀцӀо йахъийа жойлас хабар. Гьолълъогъа муьгъатта̄ симо бӣйа гьолцо нисона гей лагълихъа: «Хехлъи ахъна эᵸкьена къатӀла̄ъна хъаьчӀла̄ъна иᵸхъойо шинаб гьардухъаллана, гьула̄зу азизаблана, боцдийа̄на, лаьхъдийа̄на аьдамла ба̄къолла гьолӀоъ».

²² Э̄ᵸйацос оᵸкъолъ, лагъли нисойолӀо: «Дибо амро тӀубази бо̄йо, бетӀерчӀахъаяв! Амма жена маьче гьихлъона гей».

²³ БетӀергьалли нисойолӀо лагълихъа: «Гьинолкьана кала̄гъойна мийахъова̄ аьдамла ба̄къоллина гогь. Дие билӀо аьдамла̄ш йоцӀала.

²⁴ Амма нисос мизохъа: до ийабалӀена гуйэшла̄ диела билӀоъос кен-оᵸх йуьᵸхъаъаш».

Иса авараглигъой муьгъалӀ мекьейа̄с къимат 1. БилӀо йогьцалакьас хабар

²⁵ Тели аьлам зукъойо Исагъой къацӀо мекьецас. Гьоллохъана гоцӀохъна Гьолцо нисойо:

²⁶ – Гьинила ийо-абоъ, къова-хъизаллиъ, исна̄ъ, вагьла̄зу гьинила оьмролалъда̄ рокьукълъи гаьччо сукӀо Дӣдой оᵸкъода, гьули сукӀо Дие асгьаблъилаъ ахъаъас.

²⁷ Гьинис хъанчна бохна, Дӣгъой говаъцасна сукӀо Дие асгьаб ахъаъас.

²⁸ СукӀод мизоъ эᵸдо гей, билӀо йовал хийал гаьгьийо сукӀо, гьакъкъа къе̄на эчена гьисаб боваъцас: оьлалди гьаьжа-къай, окко-месед билӀо йогьна гикьа йоᵸкъолал.

²⁹ Гьолълъол бигъана гунна гьули билӀо йогьна лъикъаъда, бета гьолцокьа аьдамла лъоᵸваба̄с,

³⁰ билӀо йовал уьᵸхолъна гьули йогьна гикьа йоᵸкъонна йахъеэшлӀо нисона.

2. Рагълиъ эᵸкьал атӀийа ханликьас хабар

³¹ Йана бацо ханлил данде эгъал аьгъиъийо хан къе̄на эчена ургъизи ахъал нуцӀаъасди: хъона гьазай рагъухъан гаьгьийо тушмаллила аскарлил данде ацӀона гьазай рагъухъан гаьгьийо аскарна жуна эгъна ахъалдилӀо нисона.

³² Эгъна ахъаъцаслъи икъелъ, тушман цӀихода̄ гаьгьийаъзу, гьолцо ханли рекъел бовалъгъа йатӀийо жо нисолал мейас гьинис чапарла.

³³ Вагьла̄ мизоъ эᵸдо гаьгьийо шинабли къацӀцӀо жойлакьас инкар боваъда, гьолло̄л Дие асгьабла ба̄хъаъас.

3. Гемо йолъова циᵸйакьас хабар

³⁴ Цаᵸ кӀетӀо жо гей. Амма гьолълъос гемо йугъода, кьа̄ь гемона йоᵸкъонна йахъаъалъ, гьолълъоъкьа̄ пайда гаьъа гьоᵸссидилна.

³⁵ Йа̄ гьули мицал йуьᵸхаъаш, йа мицалъ гулцала йаᵸкол йуьᵸхаъаш. Гьули къе̄ чӀалӀеш. Аьᵸгъа̄ гаьгьийа̄л тухъала гьули!