Акълова 1 - Анкълова Лука

Сулайбан авараглис аᵸкълова 1 къаьм Байбикил

¹ Давудила оьждис, Израиллиъ ханлъилаъ зукъова Сулайбанис, аᵸкъилабла йаьжбо гей вагьаддо̄л.

² Гьоддо̄л ча̄хна гей аьдамла̄л аᵸкъло мокъанна, цӀодорлъилаъна адло-тадбирлиъна гьолло̄л муьхо-маьханна, аᵸкъилабла йаьжла̄ш гьоллол маьъна бикъанна.

³ Вагьаддо̄л ча̄хна гей аьдамла̄ъ адло-тадбир телилъанна, къацӀцӀо гьаькъабна, ритӀухъабна, бацӀадабна гьоллола йакӀкьа йеᵸцанна.

⁴ Аᵸкъло гаьчча̄л аᵸкъло мокъанна, оьлохъаллил илмо-лъайна бичӀна михъанна.

⁵ Вагьаддо̄л йаьжбо аьᵸдалаъ йеᵸйагьда, аᵸкъиллис лъайна телилъас, цӀодораблис цӀодорлъи-аᵸкъиллъи кӀетӀлъас.

⁶ Кици-бицеллис маьънана каламна бикъанна, аᵸкъилабла̄ла йаьжла̄ъ гаьгьийо балъголъи йикъанна ча̄хна гей вагьаддо̄л аᵸкълова.

Абола малъилахъа энекзи ахъ!

⁷ БетӀергьан Аллагьлихъа гьичӀейолъи – вагьли гей илмо-лъайлис бигъа. Аᵸкълована насигьатлана йа̄тӀаъцаса ба̄хъца аьбдалла.

Кьодда̄с аᵸкъло-лъай Мунагьликьас инкар бо̄йолъи

⁸ Ми энекзи ахъ, дие оьжо, абола малъилахъа, ийос нисойона йугъола̄къа.

⁹ Дибола къаьмил къиматаб матӀайиᵸцо йахъца гьули, билъалъил кӀетӀо тетенана йахъца гьули.

¹⁰ Йе дие оьжо, мунагь-гьаькълила агьлола гьидедой кьисада, эᵸкьа̄къа муьгъалӀ.

¹¹ Гьолло дӯхъа нисас: «Тос илогъой, гьинона йохна гьоᵸс пуланаб сукӀо икьал. Аьйиб гаьччо сукӀо икьал гьаьй йохал тос.

¹² Боваханна бовахна вагьаллийа̄ аьдамла иле, журжагьлицой, къацӀцӀа̄ мийаълал, шуналицой къацӀца̄ мизаъ мийахъолал.

¹³ Илол михъас батӀ-батӀаяб хазина, илосзу билӀована бечедабли давлалис йилӀа йовацӀлал.

¹⁴ Мина илогъой къацӀо цӀула йагъос, окколас кисана илос къацӀос бахъца!»

¹⁵ Вере, дие оьжо, ми гьоллола гьид эᵸкьа̄къа, гьоллола гьиддойс ми ата̄ боха дибо хаьба.

¹⁶ Гьоллос хаьба̄ кешлъилал чӀанабагъос, гьеᵸ къе̄ мейал бохойбалъечӀе гей гьолло̄л.

¹⁷ Пайда гаьъа къӣ тӀутӀийас, йогбаццала мигьна̄нна йеганна.

¹⁸ Гьидесзу гьеᵸ къе̄ мейал гьолло̄л гьинона йохна бечена гей, гьидесзу руьгь бугъолцас гей гьолло̄л.

¹⁹ Гьаьрамаб давла батӀийас гей вагьаллийо гьино, вагьло давла ко̄ъ михъо̄йо сукӀона угъолца гьолълъо.

Аᵸкъиллъи аьдамчой йикълашеш Къабул йовагьеэса малъийа

²⁰ Аᵸкъиллъила къатӀлиъкьа̄ аьгьи богьцас гей, будакӀаллиъкьа̄ гьокӀ йагъона илӀеш гьолълъо,

²¹ Хъуй-гьай тели гаьгьийа мицаъ илӀелацас гей, шагьарбала кавлидой йечена, аᵸкъиллъила вагьаддийа̄ йаьжбо нийасоцас гей:

²² «Йа, кьолла̄ аьдамла, нитокцалди мизол вагьли аьнтлъи хира йахъца? Йа, йаьгь-ламус гаьчча̄ аьдаьмла, нитокцалди миже кеп йокчиш кӀетӀосинабликьа лъоᵸвабана? Йа, аьбдалла, нитокцалди мизол илмо-лъай цӀодоло бегас?

²³ Дие йаьжбо аьᵸдалаъна йеᵸйагьна, миже кантӀизи ба̄хъда, до мизокьа гуъал диела йакӀиъ гаьгьийосинаб жо, дие йаьжбона йеᵸйагьал мизол.

²⁴ До илӀела̄йо – миже энекзи ба̄хъеэш, до ко̄ гуцӀолло – лъона гьули йохеэш.

²⁵ Миже йовахеэш къацӀцӀа̄ дие аᵸкълова, дие малъийана мизола йакӀил оьвалеэш.

²⁶ Вагьалълъобза дона лъоᵸва̄л мизокьа балагь мокъа̄лъо, дона кеп йокчал мизокьа йукъо гьинкъи кьодо йоᵸкъа̄лъо.

²⁷ Мизокьа гьасаъас гьолошиги-болоцой йукъо гьинкъи кьодо йоᵸкъа̄лъо, йилӀа йукъо залӀоцой балагь кьодо мокъа̄лъо, акъуба-къарилъила билӀабакъонна боваха̄лъо,

²⁸ миже дӣхъа илӀелаба̄л муьхобалъдана, до энекзи йахъаъас, до йиᵸзал муьхобалъдана, мизол до йиᵸхъаъас,

²⁹ илмо-лъайна мизол батӀаъалъ, БетӀергьаллиъкьа̄ мокъоцас гьинкъина къабул боваъалъ,

³⁰ Дие аᵸкъло-насигьатлана аьᵸдалаъ йеᵸйагьаъалъ, дие малъна бохаъалъ.

³¹ Гьидела лъаькъейа̄ ишла̄ла хоьхкьа гуцӀойо чикейо пихъ йуьᵸхъча гьолло, гьидела чикейа̄ пикрова̄ оᵸхана йовацӀилца гьолло,

³² кьолла̄ аьдамла̄ла гьинода̄ гьолло̄л бувагъоллъо, аьбдалла̄слъийо пикро гаьччолъила гьолло̄л пасад бовагьлъо.

³³ Амма дӣхъа энекзи ахъцас сукӀо сагъ-саламатлъилаъ гьихлъас, балагьлихъа гьичӀечӀе гьули раьгьатлъилаъ ахъас».