San Marcos 7 - San Marcos Mixteco de Coicoyán de las Flores

Ña̱ sántuväꞌa na̱ yuví

¹ Ta ki̱xa̱a̱ na̱ fariséo xíꞌin na̱ sána̱ꞌa̱ léy Ntióxi̱ ña̱ nta̱koo Moisés na̱ ke̱e ñuu Jerusalén, ta ku̱yachin‑na̱ nu̱ú Jesús.

² Ta na̱ yóꞌo xi̱ni‑na̱ ña̱ íyo na̱ sákuaꞌa nu̱ú‑Ña̱ xíxi‑na̱ xi̱tá va̱ꞌa, ra ya̱kua̱ ntaꞌá‑na̱, chi köníntaꞌá va̱ꞌa‑na̱.

³ (Saá chi na̱ fariséo xíꞌin ntikuíi na̱ judío, ni̱ka̱an‑na̱ na̱xa ku̱va ni̱xi̱yo na̱ táta‑na̱ xi̱naꞌá, chi kua̱ꞌá va̱ꞌa ntáꞌá‑na̱, nu̱ú köo, ra küxi‑na̱.

⁴ Ta tá ntíkó‑na̱ nu̱ú ya̱ꞌvi, átu ná ntäꞌá‑na̱, ra küxi‑na̱. Ta íyo kua̱ꞌá ka ña̱ꞌa ña̱ ni̱ka̱an‑na̱ kíxa‑na̱, tá ku̱va ña̱ ntákatia‑na̱ yaxín ña̱ xíꞌi‑na̱, xíꞌin ti̱nto̱ꞌó, xíꞌin ki̱si ka̱a̱, [xíꞌin xi̱to‑na̱].)

⁵ Ña̱ ikán na̱ fariséo xíꞌin na̱ sána̱ꞌa̱ léy Ntióxi̱ ña̱ nta̱koo Moisés nta̱ka̱túꞌun‑na̱‑Ña̱, káchi‑na̱ saá: ―¿Na chiñu na̱ sákuaꞌa nu̱ú‑ún köntíku̱n‑na̱ ku̱va sa̱na̱ꞌa̱ na̱ táta‑yó nu̱ú‑yó? chi xíxi‑na̱, ra köníntaꞌá va̱ꞌa‑na̱.

⁶ Ta ka̱chi‑Ña̱ saá xíꞌin‑na̱: ―¡Síín ña̱ káꞌa̱n‑ntó, ra síín ña̱ kíxa‑ntó! Ña̱ nta̱a̱ kúú‑ña̱ tia̱a Isaías xa̱ꞌá‑ntó, tá sa̱ya̱ꞌa‑ra̱ ña̱ ni̱ka̱ꞌa̱n Ntióxi̱, káchi‑ra̱ saá: Na̱ ñuu yóꞌo, yuꞌú‑na̱ ntása káꞌnu‑na̱ yu̱ꞌu̱, suu ínima̱‑na̱ xíka íyo‑ña̱ nu̱ú‑i̱,

⁷ chi ña̱ uun ntása káꞌnu‑na̱ yu̱ꞌu̱, chi káchi‑na̱ ña̱ sána̱ꞌa̱‑na̱ tu̱ꞌun‑i̱ suu ña̱ ntáku ini na̱ yuví va kúú ña̱ sána̱ꞌa̱‑na̱.

⁸ ’Ta nta̱koo‑ntó míí tu̱ꞌun Ntióxi̱, ta ntíku̱n‑ntó ku̱va káchi na̱ yuví.

⁹ Ka̱chi tu‑Ña̱ saá va xíꞌin‑na̱: ―Ntóꞌo̱, ra, ntákoo va̱ꞌa‑ntó iin xiyo tu̱ꞌun Ntióxi̱, ra ntíku̱n‑ntó ku̱va ni̱ka̱an mií‑ntó.

¹⁰ Moisés ka̱chi‑ra̱ saá: “Kasa tǒꞌo‑ntó táta‑ntó xíꞌin nána‑ntó”, ta “Na̱ chíka̱a̱ chiꞌña táta‑na̱ á nána‑na̱, ña̱ ntúxá kuvi̱‑na̱.”

¹¹ Suu ntóꞌo̱ káchi‑ntó saá: “Ña̱ ná kachi iin na̱ yuví xíꞌin táta‑na̱ á nána‑na̱: ‘Küvi chinteé‑i̱ yóꞌo̱, chi Corbán kúú xǔꞌun yóꞌo’” (ña̱ kúni̱ kachi «ntaꞌá Ntióxi̱ taxi‑i̱ xǔꞌun yóꞌo»),

¹² ta ntóꞌo̱ kötáxi ka‑ntó míí na̱ yuví ikán ná chinteé ka‑na̱ táta‑na̱ á nána‑na̱.

¹³ Ra saá ntákoo‑ntó Tu̱ꞌun Ntióxi̱, ra ntíku̱n‑ntó ku̱va ni̱ka̱an mií‑ntó, ta sána̱ꞌa̱‑ntó‑ña̱ nu̱ú iinka‑na̱ ña̱ ná säku̱su̱vi‑na̱ míí Tu̱ꞌun Ntióxi̱. Ta kua̱ꞌá‑ña̱ kíxa‑ntó ku̱va saá.

¹⁴ Ta ka̱na tuku Jesús na̱ yuví kua̱ꞌá, ta ka̱chi‑Ña̱ saá xíꞌin‑na̱: ―Kutiaa so̱ꞌo ntiꞌi‑ntó, ta kunta̱a̱ ini‑ntó:

¹⁵ Köo ña̱ꞌa ña̱ kíꞌvi ini iin na̱ yuví ña̱ kuvi sántuväꞌa ñaꞌá, suu ña̱ va̱xi ínima̱‑na̱, ña̱ ikán kúú‑ña̱ sántuväꞌa ñaꞌá.

¹⁶ [Na̱ xíni so̱ꞌo, ná kuni va̱ꞌa so̱ꞌo‑na̱.]

¹⁷ Tá nti̱ꞌi, ku̱xíka‑Ña̱ nu̱ú na̱ yuví kua̱ꞌá, ta ni̱ki̱ꞌvi‑Ña̱ iin veꞌe, ra ni̱nta̱ka̱túꞌun na̱ sákuaꞌa nu̱ú‑Ña̱‑Ña̱ xa̱ꞌá míí tu̱ꞌun ña̱ táxi ku̱va ikán.

¹⁸ Ta ka̱chi‑Ña̱ xíꞌin‑na̱: ―¿Á nii ntóꞌo̱ kökúnta̱a̱ ini? ¿Á kökúnta̱a̱ ini‑ntó ña̱ ntiꞌi ña̱ꞌa kua̱ꞌa̱n ini na̱ yuví küvi sántuväꞌa ñaꞌá‑ña̱?

¹⁹ Chi kökua̱ꞌa̱n‑ña̱ ínima̱‑na̱, chi ti̱xin va‑na̱ kua̱ꞌa̱n‑ña̱, ra tá nti̱ꞌi, xítia̱ va‑ña̱. Ña̱ ka̱chi‑Ña̱ saá, ña̱ va̱ꞌa kúú ntiꞌi va ña̱ꞌa xíxi‑yó.

²⁰ Ta ka̱chi tu‑Ña̱ saá va: ―Ña̱ sántuväꞌa na̱ yuví kúú ña̱ va̱xi ínima̱‑na̱.

²¹ Chi ínima̱‑na̱ va̱xi ña̱ väꞌa ntákani ini‑na̱; ña̱ xíka‑na̱ xíꞌin iinka na̱ yuví, ra íyo ñá síꞌi‑na̱ á ií‑na̱; ña̱ kíxi̱ xíꞌin táꞌan‑na̱, ra täꞌan ka tanta̱ꞌá‑na̱; ña̱ xáꞌní‑na̱ ntii;

²² ña̱ ntúkuíꞌná‑na̱; ña̱ iin ku̱u‑na̱ kúni̱‑na̱ koo kua̱ꞌá ka ña̱ꞌa nu̱ú‑na̱; ña̱ kíxa‑na̱ ña̱ väꞌa; ña̱ sántáꞌvi ñaꞌá‑na̱; ña̱ kíxa‑na̱ ña̱ kúni̱ mií‑na̱; ña̱ kútóo‑na̱ koo ña̱ꞌa ña̱ íyo nu̱ú iinka‑na̱ nu̱ú‑na̱; ña̱ káꞌa̱n väꞌa‑na̱ xa̱ꞌá Ntióxi̱; ña̱ la̱nto̱‑na̱; xíꞌin ña̱ kökúni̱‑na̱ ntakoo‑na̱ ña̱ väꞌa kíxa‑na̱.

²³ Ña̱ ikán kúú ña̱ väꞌa va̱xi ínima̱‑na̱, ra sántuväꞌa‑ña̱‑na̱.

Iin ñá nána Sirofenicia kántíxa‑ñá Jesús

²⁴ Ta ka̱na Jesús kua̱ꞌa̱n‑Ña̱ chí Tiro xíꞌin Sidón. Ta ni̱ki̱ꞌvi‑Ña̱ iin veꞌe, ta köníkuni̱‑Ña̱ ña̱ nii iin‑na̱ ná kunta̱a̱ ini, suu köníkuvi ntasěꞌe‑Ña̱.

²⁵ Chi iin ñá nána kúꞌvi̱ ñá loꞌo se̱ꞌe xíꞌin ta̱chí u̱ꞌvi̱, tá xi̱ni so̱ꞌo‑ñá xa̱ꞌá Jesús, nti̱ku̱n ki̱xa̱a̱‑ñá nu̱ú‑Ña̱, ta nta̱kuntúꞌú sítí‑ñá nu̱ú‑Ña̱.

²⁶ Ñá nána ikán süvi ñá judío kúú‑ñá, chi ñá Sirofenicia kúú‑ñá. Ta ki̱xáá‑ñá xáku ntáꞌvi‑ñá nu̱ú‑Ña̱ ña̱ ná tavá‑Ña̱ ta̱chí u̱ꞌvi̱ ini ñá loꞌo se̱ꞌe‑ñá.

²⁷ Ta ka̱chi Jesús saá xíꞌin‑ñá: ―Xina ka na̱ se̱ꞌe ná kuxi, chi väꞌa káa‑ña̱ ná xǐta‑yó xi̱tá ntaꞌá na̱ se̱ꞌe, ra taxi‑yó‑ña̱ ntaꞌá ti̱na.

²⁸ Suu nta̱kuiin ñá nána ikán, káchi‑ñá saá xíꞌin‑Ña̱: ―Aa̱n, táta, suu nta̱a̱ ti̱na xíxi‑rí xe̱ꞌe̱ yuꞌú na̱ se̱ꞌe ña̱ kôyo ti̱xin mésa.

²⁹ Ta ka̱chi‑Ña̱ saá xíꞌin‑ñá: ―Xa̱ꞌá ña̱ ka̱chi‑ún saá, kuáꞌan, chi xa̱ ka̱na ta̱chí u̱ꞌvi̱ ini se̱ꞌe‑ún.

³⁰ Ta tá ni̱xa̱a̱‑ñá veꞌe, xi̱ni‑ñá ña̱ xa̱ ka̱na ta̱chí u̱ꞌvi̱ ini se̱ꞌe‑ñá, ta íntúꞌú ñá loꞌo ikán nu̱ú xi̱to.

Sántuva̱ꞌa Jesús iin ra̱ sóꞌo, ra xíꞌin tia̱tia̱n‑ra̱

³¹ Ta ka̱na Jesús chí Tiro, nta̱kiꞌin‑Ña̱ kua̱ꞌa̱n‑Ña̱ chí Sidón, ta ni̱ya̱ꞌa‑Ña̱ chí Decápolis, ra ni̱xa̱a̱‑Ña̱ nu̱ú íyo már Galilea.

³² Ta ki̱xa̱a̱‑na̱ nu̱ú‑Ña̱ xíꞌin iin ra̱ sóꞌo, ra xíꞌin tia̱tia̱n‑ra̱, ta xa̱ku ntáꞌvi‑na̱ nu̱ú‑Ña̱ ná chinúú‑Ña̱ ntaꞌá‑Ña̱ sa̱tá‑ra̱.

³³ Ta sa̱kuxiyo Jesús tia̱ kúꞌvi̱ ikán nu̱ú íyo na̱ yuví kua̱ꞌá, ta chi̱ka̱a̱‑Ña̱ ntuku ntaꞌá‑Ña̱ so̱ꞌo‑ra̱, ta xíꞌin tiá sǐi‑Ña̱ ti̱in‑Ña̱ yâá‑ra̱.

³⁴ Ta nta̱kutoꞌni‑Ña̱ chí ntiví, ta nta̱kiꞌin‑Ña̱ ini‑Ña̱, ra ka̱chi‑Ña̱ saá: ―¡Efatá! (Ña̱ kúni̱ kachi: ¡Ntanu̱ná!)

³⁵ Ta nti̱ku̱n nta̱nu̱ná so̱ꞌo‑ra̱, ta ni̱sa̱ñá yâá‑ra̱, ta va̱ꞌa nta̱ka̱ꞌa̱n‑ra̱.

³⁶ Ta xa̱ꞌntia‑Ña̱ chiñu nu̱ú‑na̱ ná ntätúꞌun‑na̱ xíꞌin nii iin na̱ yuví, suu nani sási ka‑Ña̱ yuꞌú‑na̱, ta kua̱ꞌá ka ntátúꞌun‑na̱.

³⁷ Ta nta̱kutúꞌun ini‑na̱, ta káchi‑na̱ saá: ―Va̱ꞌa kíxa‑ra̱ ntiꞌi‑ña̱, chi na̱ sóꞌo ntánu̱ná so̱ꞌo‑na̱, ta na̱ i̱ꞌin ntáka̱ꞌa̱n‑na̱.