Luka 6 - Azelle New Testament Portions

Bi sanyarra a tara daro vonke

¹ Oye dara vonke Yeso neng anoyemasanga kame, nze nga ya nga na tano a, oye ja o iyeu, nze ane yemasanga kame nga pusa toye topana tu iyeu, Inga ceceke nga wuci.

² Nze toye tuFarisi nga go, “Yaze nyi ya wuza eme geme se makirri ma tuna wuza me a daro vonke?”

³ Nze Yeso garre gonnye, “Koi nyi mata barre a beleng be Ogomo Asharri eme geme se Dauda ma we se ma zen neng ana kame, se nga kuna ekomo ne?

⁴ Nane se Dauda ma pete atitǝu Ogomo Asharri ma yete yeborode ye makirri ma wuci, nze ma nya awantano me eme geme se dan kavi ze wucu ni, se tupiris base.”

⁵ Nze Yeso ma mase beleng begemme un ogona, “Mi Vana ono, Achakura a dara ovonke ze.”

Yeso ma we ono ware owasku a ngamo

⁶ Oye odara vonke gaze, nze Yeso pete ogora beroromo maza yemasanga. Oyeno za rame se oware belaiya bome oma wasku.

⁷ Nze ano masano makirri ma Musa neng tuFarisi nga jorto me a ji, nga ni ne Yeso ya ngona ano a ngamo a daro vonke, doguna nga morra me esharra.

⁸ Yeso ma ru adodonza ka nye, nze ma gon ono ware waskumi, “Wera tore a koovi nǝri.” Nze ono me wera ma ra ma tore.

⁹ Nze Yeso gon ono me, “Deken sannyarra nye, makirri ma geme se Ogomo Asharri ma nya Musa ma garre guna A wuza tolo a dara ovonke ne maburu? A ya buza rroma ne awoo ye me?”

¹⁰ Nze ma nǝrǝ nyi zal, nze ma gon ono me, “Nyiza oware okoi.” Ma wa nyiza oware me, nze oware me ngamo.

¹¹ Nze apuru sharro tuFarisi neng anemasanga ye to gogorro dede, nze nga bura beleng a topana tonye, a tara nane se nga neng ngonang Yeso.

Yeso ma zaka a toma biturru neng ngang ka repo

¹² A tumuru tugom me, Yeso ma ngame maka nyana ataro owoo baka ma we beroromo. Ma wuza beroromo o Ogomo Asharri.

¹³ Neng osanara, nze ma tisa ane yemasanga rrome nze ma zaka ano biturrun neng ngang ka repo ayima akanye ano ogeme se ma gunan nye a toma, a toma ageme se ma zaka nga ze.

¹⁴ Siman, maze ono gome se Yeso ma nya me yejarrome Bitrus Andarawus oweno Bitrus, Yakubu, Yohana, Filibus, Bartalomi,

¹⁵ Matiyu, Toma, Yakubu, vana Halfa, Siman ono narra wucajin nyanga ma me,

¹⁶ Yahuda vana Yakubu, neng Yahuda Iskariyoti, ono gome se ma nya Yeso ano nya me ne a me.

Yeso ma wuza ano yemasanga, ma ga wo nye a ngamo

¹⁷ Nze Yeso tu a tara owoo neng a toma ageme se ma zaka, nze ma tore aye zatara. Ane yemasanga kame chebete neng ano chebete se nga kasuru anyanga ma Yahudiya neng Urshalima, gaze neng turiya a Taya neng a Sidon se toze a binu bo rawa osaru. Nga rai baka nga kuna beleng be Ogomo Asharri, amaga ngona nye a ngamo.

¹⁸ Yeso ma ga we an ngai ono wazara obo a ngamo.

¹⁹ Nze kavi ayemme ma matana odora kame, baka a gata oya susame, nze owo nye aa ngamo zal.

O vati taye

²⁰ Yeso nyiza a ji ma nǝri ane yemasanga kame nze ma gon nye, “Nyi ono sana ze nyi ano tuyan, baka togomo to Ogomo Asharri ta tonyi ze!

²¹ Nyi ano sana ze nyi ano kone ekomo seginna, nyi ya seke! Nyi ano sana ze nyi ana geme se nyi ya rriwa seginna, baka nyi neng kerkozo!

²² Nyi ano sana ze inga ano tabarse nyi ni nga nya me ne nyi, nga ya tinza akanyi nga gusa nyi dan ana ngomai ne baka Vana Ono!”

²³ “Innga awunyi nane e chǝkǝnǝ uruntu erowa! Egarri errina baka eme geme se Ogomo Asharri mawee Asharri ebare, nane ze tunongona tonye tawe annabi.

²⁴ “Ama nyi neng nǝrǝ, nyi ano morra seginna, baka nyi na jamu kuna malowa manyi ni!

²⁵ Nyi neng nǝrǝ nyi se nyi zen eseke seginna baka se nyi ya chǝkǝnǝ neng ekomo! Nyi neng nǝrǝ, nyi no kerkozo seginna, baka nyi ya rriwa e chǝkǝnǝ neng sharro errewe!

²⁶ Nyi neng nǝrǝ nyi ana geme se ano zal nga ya tongarra akanyi, baka nane ze anoshowa akanyi nga ma ga we ano bezeze taye ton porre.”

Wonkone to barsa ano binyarna bonyi

²⁷ “Miya biza ka nyi, nyi se nyi ya rakara akan, ebarse ne ano binyarna bonyi, awe ano ageme se nga ze ma barsa o nǝrǝ ka nyi ni tolo.

²⁸ E sangarra Ogomo Asharri ma we ano tinza akanyi, osana, ekuri awe ano nya ka nyi uwahalla beroromo.

²⁹ Innga woi, woi ware opuwa ogina, owangarra o repo me gaze, innga woi kai udi osaru a ngo, uzuzu owa yimmi ogora ma nu.

³⁰ Zal ono gome se ma sanngarra eyabo a ngo onya me. Ono gome se ma yete eyabo ekei, togo ogo ama akursi neng no ne.

³¹ Wuza ano nane se nyi neng barsa guna nga ta awuze nyi.

³² “Ingase nyi ya barsa anagemese nga barsa nyi ze base, yaze nyi ya morra me Ogomo Asharri? Baka se ano masharra ma nga barsa ano ageme se nga barsa nye ze!

³³ Ingase nyi ya wuza ano wuza akanyi tolo toze tolo yaze nyi ya morra me Ogomo Asharri? Ano masharra ma nga wuza nane.

³⁴ Ingase ana geme se nga morra nga kursu nyi anuzi nga ze nyi ya nyakanye oduru base, yaze nyi ya morra me Ogomo Asharri? Baka ano masharra nga nyiza oduru a nye topana doguna nga kursu na nem me.

³⁵ A nyi, barse ne ano nyamine akǝnyi. Ewuza nye tolo. Nyizane oduru tego wuza adodonzo ogona a ya kursa ka nyi anumi. In ge owoza nane ze eya morra tolo to chebete, eya chǝkǝnǝ sakama Ogomo Asharri ono saru, baka me ono wuza ma rreze maze, ano se nga man ogodiyane nye gaze ane evira.

³⁶ Chǝkǝnǝ ne ane jai, sakama ashuo okunyi se ma zen ejai.

Tego nya woi esharra ne

³⁷ “Tego e nya woi esharra ne, nane ze Ogomo Asharri ze ma nya ka nyi esharra ne, tego wucu woi tomono ne azema wuca akanyi tomono ne tego mantǝ woi abiruwa ne azema manta ka nyi ne.

³⁸ Nyiza ne, a ya nyiza ka nyi, ukuyange obinja, a ya nokeme, azuku ukungkuzu, a ya wangarra o dangara me oware udi. Baka nane ze ukuyange ogome se nyi na gose neng no, oze a ya gose ka nyi neng no.”

³⁹ Nze Yeso kuru gonnye ayimi takara beleng ma go, “Uru neng wongku uru yeko? Nye zalle nga ma garra ayewo ne?

⁴⁰ Oye vana omasa ozemanu se ma neng kera oneyemasanga me ne, inga se vana me mana jamu omasa me zal maya chǝkǝnǝ sakama oneyemasanga rrome.

⁴¹ “Baka yaze ngona ngona a ji kovezo ayi rreji yo wanomo okoi, a ngo den nǝri yekutu a ngo a rriji ya rroi ne?

⁴² In ni zi, ngo ya bukuma owanoye, ‘Ngo, owanong, deken zuzui kovezo kogeme se koya ngo ayi rreji,’ a ngo den nǝri yekutu ye geme se eya ngo ayi rreji ne? Ngo ne evira! Bura zuzu yekutu ye geme se ye za ngo a rriji yarroi doguna onari dede nane se ngonang zuzu kovizo ayi rreji yo wanoye.

A ya ru otiti eburi egemese oyo so

⁴³ “Otiti orreze, ota yoso eburu esharro ne, otiti osharro, ota yoso eburu e ngoma ne.

⁴⁴ Aro koye otiti neng eburu me ata taza akwafu otiti bikanane, ne aneng taza innabi otiti bikana.

⁴⁵ Ono ngoma ma wuzaza to gogorro to ngoma togeme se tuya ma abiruwa, baka onevira ma wuzaza togogorro tusharro togeme se tuya ma abiruwa, eme geme se eya yimi biruwa e ze asusu anu.

An ka repo ano togoro

⁴⁶ “Baka eyaze nyi gosan mi, ‘Achakura, Achakura,’ a nyi ma wuza epegeme se mina buku ne?

⁴⁷ Zal ono geme se ma rauwami ma rakarrong, ama kunan maya wuza eme geme se miya narra me, deken beze nyi nanese ono meze.

⁴⁸ Maze sakama, ono gome se maya siya atitauwa me, nze ma gǝsǝ anyanga gwerrep nze ma shiti bigun ba tau bi me ataro opo. Nze orawa kabinja nze manyi maka suru ma terre ataumi nze ata zukuni baka mase bigun beme ataro opo.

⁴⁹ Ono gome se ma kuna beleng nga bon mata ngona epegeme se, mina guna ama we ne maze gagare ung ono gome se mata siya bigun be ngoma ne, Ma siya anyanga ze base ingase manyi mo rawa ma binja ma terre ataumi a dorra arizi. Urizi atitǝu wa agemme asharro dede.”