Luka 2 - Azelle New Testament Portions

Oyo Yeso

¹ Ayimi sero segeme, se Kaisar Agustus Ogomo osaru ma nya owarri a barre ano, zal ana geme se nga ya yimi togomo tan nyanga ma Roma.

² (Agina ze amaze abarro a bibura a gemese ama wuza ocha ogomese Kiriniyus Ogomon a nyanga ma Suriya ayima Roma.)

³ Zal ano ma kursu a nyanga ma nye doguna a barra nye.

⁴ Yusufu ma deke ape a Nazarat ayima a Galili, ma ngame a Baitalami ayimi a nyanga ma Yahudiya ara geme se ama yo Ogomo Dauda geme. Yusufu ma rrekǝ agemme baka me birruza be Dauda be ze.

⁵ Ma nga na neng Maryamu baka maze, a wuza a nya kame, doguna a barra nye zale. Ocha ogomme ma zen apuru.

⁶ Se nga ze a Baitalami, nze tumuru toyo tome tudinye.

⁷ Mayo vana ome obura ma pate meneng tojebeto, nze ma latame aro nyiza etan emo wucu, baka nga ta morra ogora gen ne.

Ano kiwu neng atoma owo Ogomo Asharri

⁸ Oye owulu uwan nyanga magemme an ngai ano kiwu yanu se nga musi a zatara baka owankǝli etang ekenye neng atiyǝ.

⁹ Dan neng uru owo kunye ne, nze otoma owo Ogomo Asharri odorro owonko a nye, nze omalma Achakura owonko a nye owe arame sansang. Nze nga kuna beye dede.

¹⁰ Nze otoma owo Ogomo Asharri me gon nye, “Tego ekuna beye ne! Baka se na ran beleng be lo beze a nyi, bigeme se biya ngona ano zal apuru runtu nyi dede.

¹¹ Kane oginna ayima ape a Dauda ana yo Ono buza akanyi Kiristi Asharri!

¹² Epegina ze a chǝkǝnǝ ǝkǝnyi rrisheida se eya morra ana pate vana meneng tojebeto, ana latame eme geme se a wuza etan eyabo wucu anu.”

¹³ Dan nan uruwu nye ne nze atoma awo Ogomo Asharri chebete a suru Asharri nga dorra nga wonko neng otoma Ogomo Asharri obibura nga ya biye errina, owo tongarra Ogomo Asharri, nga ya gusa,

¹⁴ “Asharri dekei Ogomo Asharri ayima Asharri! Ayimi masano deke ichǝkǝnǝ chammo neng ana geme se Asharri kuna malowa ma nye!”

¹⁵ Nze atoma awo Ogomo Asharri tome tu warna neng nye nga kuru Asharri, nze ano kiwu me nga gon topana tonyi, “Deke ne a ngame a Baitalami a ngame aka nǝrǝ eme geme se ana wuza, se Ogomo Asharri na buka a woro.”

¹⁶ Nze nga ngame sasa, nze nga morra Maryamu neng Yusufu, nze nga nǝri vana me a tete ayimi eme geme se a wuza etan emo wucu ayim mi.

¹⁷ Ni se ano kiwu me nǝri mi, nze nga buku eme geme se otoma Ogomo sharri na buka a nye a tara vana me.

¹⁸ Zal anagemese nga kuna beleng beme nze ngame tonu baka nga na ni emo damara a tara eme geme se ano kiwu na buku.

¹⁹ Maryamu ma mantǝ zal eme geme se ama bi, maya dodonzo ama biruwa.

²⁰ Nze ano kiwu me kuru, nga ya dako obi irrina ewo tongarra Ogomo Asharri, baka eme geme se nga na kuna, nga na nǝrǝ eme geme se otoma Ogomo ma buku a nye.

Ama wǝtǝ Yeso Atitǝu awo Ogomo Asharri

²¹ Ni se vana me ngona tumuru urru, nze atuzu me, nze a nya me rriji Yeso, rriji ye geme se, otoma owo Ogomo Asharri ma nya, a dawa ngona apuru me ne.

²² Se ocha ogomme odenye, Maryamu neng Yusufu, nga ya ngona epegemese makirri ma Musa ma go awe a deke me sansang, nze nga zǝkǝ Yeso angame a Urshalima doguna awatǝ mi o Ogomo Asharri.

²³ (Na nem meze ama darese a makirri ma Ogomo Asharri, “Zal vana obura se ayo a ya wiyama a kerro baka Ogomo Asharri.”)

²⁴ Nze nga wuza ohadaya, sakama nane se makirri ma Ogomo Asharri, “Mago ewurrai erepo ne etantabara erepo e ze a ya tuzumi.”

²⁵ To, ocho gom me oye ono se maze a chǝkǝnǝ a Urshalima, se a gosan me Simiyon. Me ono ngoma ze, onorre rrebota Ogomo Asharri maya denta odara ogome se a ya buza Isaraila. URuhu Usansang ozenan me.

²⁶ URuhu Usansang oma gom me ozema wanǝni se una nǝrǝ Kiristi ogomese Ogomo Asharri ma go maya Toma nan no.

²⁷ Ni se uRuhu Usansang me ungamem me, nze ma pete Atitǝu Ogomo Asharri, ocha ogomme se, ana shon Yeso nga ra neng Yeso Atitǝu Awo Ogomo Asharri doguna a wuza eme geme se makirri ma Musa ma go a wuza.

²⁸ Nze Simiyon ma kai vana me a me oware, nze ma go kokan Ogomo Asharri ma go,

²⁹ “Se ginna, Achakura Ogomo Asharri nane se ngoma buki, deke orere okoi ama nga na shammo.

³⁰ Baka a ji akan ana nǝrǝ ubuzara okoi,

³¹ ogome se ngoma we baka ano zal,

³² maze esansang egemese maya wonko Ogomo Asharri ana geme se dan tuYahudi toze ne, maze a ngona ano ma nyiza anakai Isaraila.”

³³ Ashon vana me neng ayumi nga me tonu nga na ni emo damara eme geme se Simiyon na buku a tara a me.

³⁴ Nze Simiyon ma vati nyi taye, ma gon Maryamu ayun vana me “Ogomo Asharri na zaka vana ogina doguna ochǝkǝnǝ oruna owa rizin ngai neng uweran ngai chebete ayimi Isaraila eya chǝkǝnǝ rrishaida asuru Ogomo Asharri. Se ano chebete nga ze ma barsa me ne.

³⁵ Ana nen meze eme geme se nga zen no erowa eya parrusu, epeme eya ngona ka nye kwaiye sakama ogo usankali na tumui abiruwa boi.”

³⁶ Oye uwarre Annabi se gosan Hanatu, ogalla Fanuwel birruza ban Asha. Ma chǝkǝnǝ ara nya sewai sunare base,

³⁷ Nze onorromme ma wi, se ginna sewaiya some seze turru urru neng senaze. Ma dan deke Atitǝu Awo Ogomo Asharri ne maya wuza Ogomo owa Asharri rribauta atiyǝ neng odara a wuza beroromo do wucu eyabo ne.

³⁸ Derte ocha ogomme, nze ma pete, maya gusa kokan Ogomo Asharri, ma kuri ma buku beleng a tara vana ogome se ana geme se nga ya denta Ogomo Asharri ma nya Urshalima o buza ara.

³⁹ Nze Yusufu neng Maryamu se nga jamu zal epegeme se makirri mo ogomo Asharri mago a wuza nze nga kuru ape ka nye, Nazarat a Galili.

⁴⁰ Vana me ma bare ma we a gatama neng rremo, tolo ta Asharri toze neng me.

Yeso vana ayimi Atitǝu Ogomo Asharri

⁴¹ Koya rrewai, ano shon Yeso nga ngamze ze a Urshalima baka Obaki Owo Shakata.

⁴² Se Yeso binja sewai biturrun se repo neng oyo, nze nga ngame aro obaki mi, nane se nga na mina nu.

⁴³ Se ubakimi umaso, nze nga meshe oruna a kuru atitǝu, nze Yeso, vana ogomme, nze ma tore a Urshalima, den neng uru owa na shome ne.

⁴⁴ Nye nga ya gusa maze ayima ano, nze nga wuza tano to were vento. Nze a bate nga bura ugangarra me ayimi anawaname neng awantana me,

⁴⁵ Nze nga ta narǝ mi ni. Baka nane ze nga kuru a Urshalima a gangarri a me ageme.

⁴⁶ A dara otaro nze nga morra me ayimi Atitǝu Awo Ogomo Asharri a chǝkǝnǝ neng ano masanga no. Maya kunaza aka nye ma kuru ma wuza nye bi sanngarra.

⁴⁷ Zal ana geme se nga ya rakara kame ngame tonu nga za emo damara a tara uru eyabo, ekeme neng nane se maya garrasa belen.

⁴⁸ Ana shome nga ni emo damara neng unǝrǝ me ayem me, nze a yimi gunan me, “Vana okon baka yaya ze, ngona ngona do nane? Mi neng tata okoi woro na damo dede se woro dan narai ni.”

⁴⁹ Nze ma garre ma gon nye, “Baka yaya ze nyi ya gangarrǝ akan? Nye ta ru se eyakǝnǝ guna intaze atitǝu awa shon ne.”

⁵⁰ Nze nga ta ru eme geme se me maya bi beleng a tara me ne.

⁵¹ Nze ma wera ma tarse nye, nze nga kuru a Nazarat zalle, ma tarse ana shome. Ayu mi ma mantǝ zal eme geme se ama wuzaza ama biruwa.

⁵² Yeso ma bare yipung neng uruwe eyabo, ma kuru ma morra oka a ji ogomo Asharri neng ano zal.