aYohana 6 - Izere New Testament

aYeso no̱o̱k ánerawe izungu itoon naya

¹ Nama izen cie̱k, aYeso tar agbang kudung aGalili a tá yis ye kudung aTibariya.

² Ne ánerawe whe̱re̱ tú ku kuus kamok ba di ike̱re̱ azhing iya a tá nye natoon áfe iro̱k.

³ Ayong aYeso ngarak natoon kawhanang nong a tá se sonong azong be álimazhiri wu.

⁴ Izen afe áner aYahuda tana nye riye̱ rikan aPasova tsang be̱ bubarak.

⁵ aYeso tá fa sok anyisi naza ne a di ánerawe whe̱re̱ á tá saase nufu ayong a fe̱ be aFilibus ye, “Ake̱ ne yir tà se̱ yir naya nong tá shan yir kamok ánerawe na nong á tà ya á tá whas e̱?”

⁶ aYeso rip aFilibus anong, nong a tú ku bo̱mo̱ng tsek, kamok wu tsang a ren ike̱ng iya wu tana nye.

⁷ Ayong aFilibus fe̱ be wu ye, “Ko, itso̱m itomong alebura ife ife̱n ikara ta kyem kushan naya nong koangan ta se̱ ikpis'e baꞌ.”

⁸ Amma azining kaye̱e̱r álimazhiri wu'ame, aya a tú ku yis ye, Adarawus aronyining aBitrus fe̱ ye,

⁹ “Di, igon kakak na be naban agba abiredi natoon, a tá nye be ikpe abale ne naban izos ifa, amma iyu tà san ane̱ nong i ta kyem ánerawe'me e̱?”

¹⁰ Ne aYeso fe̱ be álimazhiri wu'me ye, “Sak yin ánerawe'me ta sosok kaben.” Agam tú se whe̱r naro̱'me, yong ánerawe'me sosok. Ánerawe'me se kyo̱ndi izungu itoon.

¹¹ Ayong aYeso sok abiredi'me nong a tá nye aduwa, a tonong riye̱ rikan wu, ne a kasap ánerawe á tá sosok kyo̱ndi ba tá shim. A nye anong be izos'e gip.

¹² A tá fa ya a whas cei ba, ne aYeso fe̱ be álimazhiri wu ye, “Tusung yin ikpis'e iya ba tá won, tú won yin ike̱ng ikak tá beseng baꞌ.”

¹³ Ayong á tusung ribir abiredi'me cei ma i shining iderse kuso̱k be afa, ribir iya ánerawe tá ya'me.

¹⁴ Ánerawe tá di itomong azhing iya aYeso tá nye ayong á rife̱ ye, “Katsak'e, ayu ne a nye Aner Kuzarap aya a ta se ye a ta be̱ kaye̱e̱r kazatse.”

¹⁵ aYeso tá ren ye ba se be kanye̱k nong a tù ku sak a tà te agwo̱m be agap, ayong a bun a tú bun natoon kawhanang wu ze̱r.

aYeso tseng natoon ashi

¹⁶ Kawheshirim tá fa nye, ayong álimazhiri wu be nukim agbang kudung.

¹⁷ Á ta no̱ nukpara ashi nong á tá tar kudung'e á tá be na aKapanum. Nizen iyong katuk tsang ka nye. aYeso tsang a be̱ nufu ba nizham baꞌ.

¹⁸ Ne amaan kuwun dorok natoon ashi'me be agap ma ashi'me tang agung.

¹⁹ Nama ba tá tseng kyo̱ndi akilomita atoon ka igataar ana, ba di aYeso tá sen tseng natoon ashi, a tseng a be nabas kukpara ashi'me, yong ba fok inyim dide̱ng.

²⁰ Ne aYeso fe̱ be ba ye, “Sang tu fok yin inyim baꞌ. Aner'e nye mi.”

²¹ Ayong ba shim á tú sok kaye̱e̱r kukpara ashi'me. Kukpara'me tseng be ba zizirik naro̱ afe ba tú ku be.

Ánerawe tse̱r karo̱ aYeso

²² Kadiding tá fa karak, rigwo̱m ánerawe tá tsang a se nunyi kudung'e ren ye kukpara kuzining ne kuse azong. Ba ren ye aYeso n no̱ mak be álimazhiri wu baꞌ, amma ba tseng a ku wan ba.

²³ Ne akpara ákak a ta nye azhizhe̱k'e a tá ne na aTibariya be̱ azong bubarak be karo̱ kaya ánerawe tú ku ya abiredi aya aYeso tin nye aduwa natoon ame.

²⁴ Nizen rigwo̱m ánerawe'me tá ren ye, aYeso ka álimazhiri wu tú se azong baꞌ, yong á no̱ kaye̱e̱r akpara ashi ame nong á ta be na aKapanum ni itse̱r aYeso.

aYeso ne a nye aBiredi Kutser

²⁵ Nizen iya á tú ku se̱ nunyi kudung'e, á tú ku rip ye, “Aner Kubo̱so̱p, akye̱ izen ne wan be̱ aze e̱?”

²⁶ aYeso fe̱ be ba ye, “Katsak'e, mi ta ka tak yin, yin tsang ni itse̱r yin, kamok yin tá ya yin abiredi ame i tá whas yin amma sang kamok yin tá di yin itomong azhing iya mi tá nye baꞌ.

²⁷ Sang tu so̱ yin risam ni itomong naya nafe na tana beseng baꞌ, amma nye yin itomong natoon naya nafe na tana no̱o̱k kutser kufe izen izen. Iyuna ne i nye kuri naya Igon Anerawe tana ka no̱o̱k yin. Kamok Ada yir Adakunom min te izizo̱ wu ni wu.”

²⁸ Ayong ánerawe rip aYeso ye, “Akye̱ ne yir tà nye yir nong ta shining yir ike̱ng iya Adakunom ta shim e̱?”

²⁹ Ne aYeso fe̱ be ba ye, “Ike̱ng ife Adakunom ta shim yin ta nye yin nye: Ni no̱o̱k yin katsak naya afe wu tá tom.”

³⁰ Iyong ánerawe'me tú rip ye, “Akye̱ kuri ike̱ng azhing ne wan ta nye nong yir ta di yir nong tin no̱o̱k yir katsak ni wan e̱? Akye̱ ne wan tà nye e̱?

³¹ Átukop yir ya naya a tá yis ye amanna kaye̱e̱r katse, kyo̱ndi á tá zibir ye, ‘A tú ku no̱o̱k ba naya na tá ne natoon kaza nong a tà ya.’ ”

³² Ne aYeso fe̱ be ba ye, “Katsak'e, mi ta ka tak yin, sang aMusa ne a tá ka no̱o̱k yin naya na tá ne natoon kaza'ong baꞌ, amma Ada mi ne a tá ka nyesek yin naya nafe katsak na ta ne naza.

³³ Naya Adakunom nye aya a tá ne naza a tá tiik kaben ne a no̱o̱k kazatse kutser.”

³⁴ Áyong a fe̱ be wu ye, “Atekasa, yiir i ni nyesek yir naya kuri na yong ye̱r ye̱r.”

³⁵ Ayong aYeso fe̱ be ba ye, “Mi ne i nye naya naya na ta nyesek kutser. Aner aya a ta be̱ nunaan, a ba tà fok izong baꞌ. Aya a ti no̱o̱k katsak natoon'i, a tà ba fok kuto̱ kukoor baꞌ.

³⁶ Kyo̱ndi mi tá ka tak yin, yin min di yin, gip be anong yin ti no̱o̱k yin katsak baꞌ.

³⁷ Koangan afe Ada tin no̱o̱k, a tà be̱ nunaan. Aner aya afe a ta be̱ nunaan, mi tù ku ro baꞌ.

³⁸ Kamok mi ne naza i tá tiik kaben nong ta nye ike̱ng riye̱ mi ta shim baꞌ, amma nong ta nye ike̱ng ife aya a tin tom.

³⁹ Kushim aya afe a tin tom se ye, sang mi tu wei be azining kaye̱e̱r aya wu tá min no̱o̱k baꞌ, amma ye i ra ka dorok ba katuk igang'e.

⁴⁰ Kamok kushim Ada mi nye ye, koangan afe a tin sak anyisi na Igon'e ne a ni no̱o̱k katsak, a tà se̱ kutser kufe izen izen, ne mi ku dorok katuk igang'e.”

⁴¹ Iyong áner aYahuda san anyinye̱m natoon aYeso kamok wu tá fe̱ ye, “Mi ne i nye abiredi aya a tá ne naza.”

⁴² Iyong ba fe̱ ye, “Aser, ayu ne a nye aYeso igon aYusufu, aya yir ta ren yir anyining be atek aꞌa? Akye̱ sak wu ta fe̱ ye, ‘Mi ne naza e̱?’ ”

⁴³ Ne aYeso fe̱ be ba ye, “Won yin anyinye̱m.”

⁴⁴ “Akak ta kyem a be̱ nunaan baꞌ, ma ke Ada'me a tin tom ne a tu ko̱ro̱k, ne mi ku dorok be kutser katuk igang'e.

⁴⁵ I se ni izibir kaye̱e̱r afumung áner kuzarap agbugbang'e ye, ‘Adakunom ne a tu ku bo̱so̱p ba'me cice̱r ba.’ Koangan afe a ta wesek kuto na Ada'me ne a bo̱so̱p nufu, a ta be̱ nunaan.

⁴⁶ Akak kun di Ada'me baꞌ, ma ke aya a ta ne nufe Adakunom, wu tsek ne a kun di Ada'me.

⁴⁷ Katsak'e ne mi ta ka tak yin, aner aya a tin no̱o̱k katsak ni mi, a be kutser kufe izen izen.

⁴⁸ Mi ne i nye naya kutser.

⁴⁹ Átukop yin ya naya a ta yis ye amanna kaye̱e̱r katse, gip be anong á kus.

⁵⁰ Amma ayu ne a nye naya naya na ta ne naza, ke akak ya a tà ku baꞌ ma izen izen.

⁵¹ Mi ne i nye naya kutser naya na ta ne naza, ke akak ya naya na, a ta sor ma izen izen, naya'me nye kuro̱m'i kuya mi tana no̱o̱k nong kazatse ta se̱ kutser.”

⁵² Ayong áner aYahuda ame san nanan awan ba be agap ye, “Aner na ta nye ane̱ a tin no̱o̱k yir rinam kuro̱m wu nong ta ya yir e̱?”

⁵³ Ayong aYeso fe̱ be ba ye, “Katsak'e ne mi ta ka tak yin, ma ke yin ya yin rinam kuro̱m Igon Anerawe ne i so̱ yin naso̱k wu ke anong baꞌ, yin be yin kutser kaye̱e̱r yin baꞌ.

⁵⁴ Koangan afe a ta ya rinam kuro̱m'i ne a so̱ naso̱k'i, a be kutser kufe izen izen, mi tù ku dorok be kutser katuk igang'e.

⁵⁵ Kamok rinam kuro̱m mi nye kunik naya ne naso̱k'i nye kunik'e.

⁵⁶ Koangan afe a ta ya rinam kuro̱m mi ne a so̱ naso̱k'i, ne a sor kaye̱e̱r'e ne mi sor kaye̱e̱r wu.

⁵⁷ Kyo̱ndi Ada afe kutser tin tom ne mi sor be kutser kamok Ada'me, anong ne aner aya afe a tin sok i ta te naya wu tà sor be kutser kamok'i.

⁵⁸ Ayu ne a nye naya na tá ne naza. Átukop yir agbugbang'e ya naya a ta yis ye amanna amma a kus cice̱r ba. Aner aya ne a ya naya na, a tà sor ma izen izen.”

⁵⁹ aYeso fe̱ rife̱ na nizen a tá se be kubo̱so̱p ánerawe'me nutu aduwa na aKapanum.

aYeso nye Rife̱ Kutser

⁶⁰ Be kufok ike̱ng a tá fe̱ ákak kaye̱e̱r álimazhiri wu whe̱r fe̱ ye, “Kubo̱so̱p kuyu ro̱ dide̱ng. Angan ta shim e̱?”

⁶¹ aYeso tá ren ye álimazhiri wu sen fe̱ nyinye̱m natoon kubo̱so̱p'e yong a fe̱ be ba ye, “Kubo̱so̱p na ta beseng yin aye̱ a?

⁶² To̱, ke yin di yin Igon Anerawe sen kubun naro̱ wu tú ku ne ane̱ e̱?

⁶³ Kabik ne ka nyesek kutser, kuro̱m ti barang ike̱ng ikak baꞌ. Rife̱ mi tá fe̱ be yin nye rife̱ kabik ne kutser.

⁶⁴ Gip be anong, ákak yin kuse áfe sang á tin no̱o̱k katsak baꞌ.” Kum ni ime̱se̱ng'e aYeso tsang a ren áya a tin no̱o̱k katsak baꞌ, be aya a tana ku re̱p.

⁶⁵ Iyong a ya kasho̱o̱n be rife̱ ye, “Iyu ne i sak mi tá ka tak yin ye, akak ta kyem a be̱ nunaan baꞌ, ma ke Ada'me tú se̱ mo.”

⁶⁶ Nama anong álimazhiri wu whe̱re̱ tú bun kama, á ba ku kus baꞌ.

⁶⁷ Ne aYeso rip álimazhiri wu kuso̱k be afa'me ye, “Yin tà tseng yin gip a?”

⁶⁸ aSiman Bitrus fe̱ ye, “Atekasa, yir ta tseng yir nufe angan e̱? Wan ne i ta be Rife̱ Kutser.

⁶⁹ Yir ti no̱o̱k yir katsak ne i ren yir ye wan ne i nye Azhe̱l'e afe Adakunom.”

⁷⁰ Iyong aYeso tú shim'e ye, “Mi ne i tá kasa yin kuso̱k be afa aꞌa? Gip be anong azining kaye̱e̱r yin nye Ishetan.”

⁷¹ (aYeso ti fe̱ na aYahuza, igon aSiman Iskariyot, aya a ta se kaye̱e̱r kuso̱k be afa'me, wu ne a tu ku re̱p.)