aRom 8 - Izere New Testament

Kutser kaye̱e̱r kabik

¹ Kamok anong, amok bu kuse natoon áya a ta se kaye̱e̱r aYeso Kiristi baꞌ.

² Kamok kukyem Kabik ku ta nyesek kutser kaye̱e̱r aYeso Kiristi sak mi sor ne̱k, kaye̱e̱r kukyem rine̱n ne riku.

³ Kamok ike̱ng iya Itsi aMusa tá kyem i nye baꞌ, be kuse kufe rinerawe, nye ike̱ng Adakunom tá nye nizen a tá tom igon wu kaye̱e̱r kuro̱m. A no̱o̱k nong a ta te asidaka rine̱n ne a yirik kukyem rine̱n kaye̱e̱r kuro̱m.

⁴ Adakunom nye anong, nong a tin shining yir be koakye ike̱ng i ta se gye̱r nasho̱o̱n wu iya Itsi tá fe̱ ye a ra nye, yir aya sang i ta sor yir kaye̱e̱r kuse rinerawe baꞌ, amma kaye̱e̱r Kabik.

⁵ Áner aya a ta sor kaye̱e̱r kuro̱m a ti te riye̱ natoon ike̱re̱ kuro̱m. Áner aya a ta kuus ike̱ng iya Kabik ta fe̱ be ba min te riye̱ ba nike̱re̱ Kabik.

⁶ Ke rine̱n ne ri te nye rigwo̱m natoon wan, wan ta ku, amma ke Kabik ne ka te nye rigwo̱m natoon wan, wan ta se̱ kutser ne kameneng riye̱.

⁷ Kamok koangan afe rine̱n tin nye rigwo̱m natoon wu te amudo̱n Adakunom'ong, kamok a kuus Itsi Adakunom ta fe̱ baꞌ, a ta kyem a nye baꞌ.

⁸ Áner aya rine̱n tin nye rigwo̱m natoon ba ta kyem á kare̱p Adakunom riye̱ baꞌ.

⁹ Amma yin, Kabik Adakunom ne ka ti nye rigwo̱m natoon yin sang rine̱n baꞌ, ke Kabik Adakunom sor kaye̱e̱r yin. Aner aya a ta be Kabik aKiristi baꞌ, a nye afe aKiristi baꞌ.

¹⁰ Amma ke aKiristi sor kaye̱e̱r yin, yin ta kus yin kamok rine̱n, amma kabik yin nye katser kamok yin se yin gye̱r nasho̱o̱n Adakunom.

¹¹ Ke Kabik Adakunom aya a tá dorok aYeso nure̱k sor kaye̱e̱r yin, to̱, wu aya a tá dorok aYeso kaye̱e̱r kure̱k tá no̱o̱k iro̱m yin kuya ku tana bus kutser kamok Kabik wu kaya ka ta sor kaye̱e̱r yin.

¹² Kamok anong aroneng, yir be yir itomong, amma sang ta sor yir kuri kusor kuri kufe rinerawe baꞌ.

¹³ Kamok ke yin sor yin kaye̱e̱r kuse rinerawe, yin tà kus yin. Amma ke yin sor yin kaye̱e̱r Kabik, ne yin won yin kunye rine̱n, yin ta se̱ yin kutser.

¹⁴ Kamok áner aya ne Kabik Adakunom tu ku ko̱k ba kasho̱o̱n ne á nye inoon Adakunom.

¹⁵ Kamok Kabik a tá ka no̱o̱k yin nye kabik kaya ka tana ka sak yin ta te yin asam ne i fok yin inyim baꞌ. Amma yin se̱ yin Kabik ku te inoon Adakunom be anong ne yir yis yir Adakunom ye, “Abba, Ada.”

¹⁶ Kabik Adakunom be rice wu nyim be kafe yir a ta tonong ye yir nye yir inoon Adakunom.

¹⁷ To̱, ke i nye ye yir nye yir inoon'e, i nye ye yir nye yir áya kutse Adakunom, ta ya yir kutse'me mak be aKiristi kum ke i nye ye yir tà so̱ yir risam mak be wu nong ta se̱ yir kuyiik mak be wu.

Kuyiik tana se̱ yir nasho̱o̱n

¹⁸ Mi no̱o̱k katsak ye a ta kyem a maas risam yir ta sen so̱ yir'e kyo̱o̱rna be kuri kuyiik kuya a tanin tonong yir nasho̱o̱n baꞌ.

¹⁹ Koakye ike̱ng Adakunom ta nye sen tor be ifeng nong á tà di inoon Adakunom'me.

²⁰ Ike̱re̱ Adakunom tá nye, shining ike̱ng i ta sak a tá ka nye ba baꞌ, sang i se ye kamok ike̱re̱'me ta shim anong baꞌ, amma kamok Adakunom shim anong. A nye anong ne a ni te riye̱,

²¹ ye ike̱re̱'me cei be rice ba tà se̱ kashesh, a tà ba bus baꞌ. I ta se̱ kusor ne̱k'ong be kuyiik a tana tonong inoon Adakunom'me.

²² Yir ren yir ye ike̱re̱'me cice̱r Adakunom ta nye'me ru rus kyo̱ndi aner abining tá rus nizen kutes ma kyo̱o̱rna.

²³ Sang ike̱re̱'me tsek baꞌ, amma yir gip, yir aya a tin no̱o̱k yir kunang Kabik Kazhe̱l'e kaya a tin no̱o̱k yir kum ni ime̱se̱ng'e, i rus yir kaye̱e̱r aye̱ yir ne i tor yir be ifeng nong Adakunom tin sok yir i ta te yir inoon wu ne a shesh iro̱m yir.

²⁴ Kamok kuni te riye̱'ong ne a ti shesh yir, amma ke yir n di yir ike̱ng yir ta min te yir riye̱'me, to̱, iyong ba nye ku ni te riye̱ baba baꞌ. Angan ti te riye̱ nike̱ng iya wu tan se̱ e̱?

²⁵ Amma ke yir min te yir riye̱ nike̱ng iya sang yir tan se̱ yir nizham baꞌ, yir naka tsesek yir ta tor yir.

²⁶ Anong ne Kabik ti se̱ mo yir kaye̱e̱r kuraar yir. Yir ren yir ka ane̱ ne i ta nye yir aduwa baꞌ, amma Kabik be rice wu ne a ti nye yir aduwa be kurus kuya akak tana kyem a fe̱ baꞌ.

²⁷ Adakunom aya a ta ren kaye̱e̱r riye̱ ánerawe ren koakye Kabik ta shim kamok Kabik'e nye izong kamok ázhe̱l'e kyo̱ndi Adakunom ta shim.

Kushim Adakunom kaye̱e̱r aYeso

²⁸ Yir ren yir kaye̱e̱r koakye, Adakunom nye gye̱r kamok áya a tu ku shim áya a ta ma ka yis ba kaye̱e̱r kanye̱k wu.

²⁹ Kamok aya Adakunom tá tsang a kasa gbugbang ne a ku sak ba ze̱e̱r nong a tá sok kuse Igon wu, Igon'e ta sor asho̱n kaye̱e̱r ároneng whe̱re̱.

³⁰ Áya wu tá tsang a ku sak ba ze̱e̱r, a tú ku yis ba'me, ne a ku sak ba a tá se gye̱r nasho̱o̱n wu, ne ku te yiik ba.

³¹ To̱, iyong yir tà fe̱ yir ane̱ natoon ike̱re̱ na e̱? Ke Adakunom se mak be yir, akye̱ ti daam yir ke a ti ra yir e̱?

³² Wu afe a tin roon yir Igon wu baꞌ, amma a sok a tá no̱o̱k kamok yir cice̱r. Aser, wu Adakunom afe a tá tsang a ni no̱o̱k yir Igon wu ta won dar a ni no̱o̱k yir ribir ike̱re̱ wu cice̱r washak aꞌa.

³³ Angan ne a ta nye kukun áya Adakunom tan kasa e̱? Adakunom be rice wu ne a fe̱ ye ba se gye̱r nasho̱o̱n wu.

³⁴ Angan ne a ta kyem a ta te̱n anerawe amok e̱? aYeso Kiristi, aya a tá ku, sang a ku tsek baꞌ, a tú ku dorok nure̱k be kutser, aya a ta se nubo̱k riya Adakunom ne a nye izong kamok yir.

³⁵ Angan ta kyem a tin kam yir be kushim aKiristi tin shim yir e̱? Risam ka kudaam, ka kutabak, ka izong ka kudun ike̱ng, ka kawei, ka riku e̱?

³⁶ Kyo̱ndi i ta se ni izibir kaye̱e̱r rife̱ Adakunom, “Kamok wan ne yir yiir i ye̱re̱k yir riku ye̱rye̱r: a ti ko̱k yir kyo̱ndi ítsamang iya á ta ba itse̱k'e.”

³⁷ Wayo, kaye̱e̱r ike̱re̱ na cice̱r, yir nar yir agap áya a tana fe̱ ye á be agap kaye̱e̱r aYeso aya a tin shim yir.

³⁸ Kamok mi ti no̱o̱k katsak dim ye riku ka kutser ka ámaleka ka ítseng ka kuse kyo̱o̱rna ka kufe kasho̱o̱n ka koakye kuri kukyem,

³⁹ ka kuso̱p'e ka kutsik'e ka koakye kuri ike̱ng Adakunom ta nye, ike̱ng ikak kuse i tana kyem i tin kam yir be kushim afe Adakunom tin shim yir kaye̱e̱r aYeso Kiristi Agwo̱m Ágwo̱m yir baꞌ.