aRom 2 - Izere New TestamentAmok Adakunom se gye̱r 1 Kamok anong, wan be ike̱ng kufe̱ baꞌ, wan afe i ta to̱ akak amok. Be ike̱ng ife wan tin to̱ akak amok'e, wan naka to̱ amok'ong kamok wan nye ike̱re̱'ong. 2 Yir ren yir ye amok Adakunom tà to̱ aner aya a ta nye ike̱re̱ kuri iyong se gye̱r. 3 Kamok anong ke wan afe i ta nye anerawe tsek, wan to̱ akak amok natoon ike̱re̱ iya wu tá nye, amma ne wan nye ike̱re̱'ong, wan di ye wan tà wher amok Adakunom a? 4 Ka wan zhe̱e̱sh agbang ritek Adakunom be kutsesek wu ne kuse whiwhe̱ wu e̱? Wan ren ye ritek Adakunom tá sak wan tá shishing kuse wan aꞌa? 5 Amma kamok kushonong wan i ta gaar kushishing kuse wan, wan naka tusung amok Adakunom natoon rice wan ma katuk riye̱ kubeseng Adakunom, nizen iya a tana to̱ kazatse amok kaye̱e̱r katsak. 6 Adakunom tà no̱o̱k “Koangan ishorong wu te̱re̱ be ike̱ng iya a tá nye.” 7 Áner áya a ta tsesek kaye̱e̱r kunye ike̱re̱ itek nong a ta se̱ nakerek be kuyiik ne kutser kufe izen izen, ba ne Adakunom tà ka no̱o̱k ba ishorong kutser kufe izen izen. 8 Amma áya a ta shim rice ne á gaar katsak ne á nye amaan kunye, a tù ku karang ba be riye̱ kubeseng ne riye̱ riwe. 9 Koangan afe a ta nye ike̱re̱ imaan'e, a tà so̱ risam ne a fok kuro̱'me, a ta san'e be áner aYahuda ne áya sang á ta nye áner aYahuda baꞌ, ni kuus. 10 Amma koangan afe a tá nye ike̱re̱ itek, Adakunom tù ku no̱o̱k kuyiik be nakerek ne kameneng riye̱. A tà san'e be áner aYahuda ne áya sang á ta nye áner aYahuda baꞌ nikuus. 11 Kamok Adakunom daam ka wan nye angan e̱ baꞌ. 12 Koangan afe a tá nye rine̱n kamok sang a ta ren Itsi aMusa baꞌ, a tà wei sang be Itsi'me baꞌ, amma afe a ta nye rine̱n ne a ren Itsi aMusa'me a tù ku to̱ amok be Itsi'me. 13 Sang áya a foos Itsi ne a se gye̱r nasho̱o̱n Adakunom baꞌ, amma áya a ta kuus ike̱ng iya Itsi'me tá fe̱, ne a se gye̱r nasho̱o̱n Adakunom. 14 (Katsak'e, ke aner aya sang a ta nye áner aYahuda baꞌ, be Itsi baꞌ, gip be anong nizen ikak a nye ike̱re̱ iya Itsi ta fe̱ ye a ra nye kyo̱ndi kuto̱ro̱ng ba tú ku no̱o̱k ba. Iyong tonong ye ba áya a tá sor dar Itsi te Itsi be rice ba. 15 Kunye ba tonong ye ike̱re̱ Itsi tá fe̱ ye a ra nye se kaye̱e̱r ba, kuto̱ro̱ng aye̱ ba tonong anong gip. Kamok izen ikak kuto̱ro̱ng aye̱'me tonong ye ba taam, nizen ikak ne i ku tonong ba ye ba taam baꞌ.) 16 Anong ne i bu se katuk Adakunom tana sak aYeso tana to̱ ike̱re̱ iya anerawe ta ne̱r kaye̱e̱r riye̱ amok, kyo̱ndi mi ta fe̱ kaye̱e̱r Rife̱ Ritek mi tá ka taas yin. Aner aYahuda be itak kukuus Itsi 17 To̱, wan afe i ta fe̱ ye wan nye áner aYahuda, wan ti fereng natoon Itsi ne i ni itsor kafok ye wan ren Adakunom, 18 ne i fe̱ ye wan ren ike̱ng iya Adakunom ta shim ne i ren ike̱ng iya i ta nar kuse gye̱r kamok a tá ka bo̱so̱p'e ye Itsi fe̱ anong. 19 Wan ren gye̱r ye wan ne i ta ko̱k akpato̱o̱n kuse̱ ne i sor akanang nufe áner aya a ta sor kaye̱e̱r awhi, 20 ne i bo̱so̱p azizik'e ike̱re̱ ne i bo̱so̱p azhizhe̱k'e gip, kamok Itsi ta bo̱so̱p ike̱re̱ cei ne i ka tonong katsak'e. 21 To̱, wan afe i ta bo̱so̱p ánerawe'me, wan naka bo̱so̱p e̱ a? Wan afe i ta taas ye, rife̱ Adakunom roon itsang, wan nye itsang aꞌa? 22 Wan afe i ta fe̱ ye, sang a tu nye rikuna baꞌ, wan nye aꞌa? Wan afe i ta di ike̱re̱ itsi kye̱re̱ wan nye itsang naro̱ itsi aꞌa? 23 Wan afe i ta tsor kafok be Itsi aMusa, wan zhe̱e̱sh Adakunom nizen iya wan ta gaar kukuus Itsi'me aꞌa? 24 Kyo̱ndi i ta se ni izibir ye, “Kamok yin áner aYahuda ne áya sang á ta nye áner aYahuda baꞌ, zhe̱e̱sh riyerek Adakunom.” 25 Izhak a ta ka nye'me se gye̱r ke wan kuus Itsi'me. Ke wan kuus ike̱ng iya Itsi ta fe̱ baꞌ, wan se tite̱re̱ be aner aya a tu ku nye izhak baꞌ. 26 Ke áner aya sang á tú ku nye ba izhak baꞌ, kuus ike̱ng iya Itsi aMusa ta fe̱, aser, a tu ku di ba tite̱re̱'e be áner aya a tá ká nye ba izhak aꞌa? 27 Aner aya a tú ku nye izhak baꞌ, amma ne a kuus Itsi'me gye̱r, wu tà ka to̱ amok, wan afe i ta ren Itsi i tan nye izhak gye̱rtatan i ra kuus ike̱ng iya Itsi'me ta fe̱ baꞌ. 28 Aner aYahuda afe katsak nye aner aya a tu ku nye izhak nuro̱m tsek baꞌ. Izhak ife katsak ne i nye izhak iya a ta tse̱e̱r aner tsek baꞌ. 29 Aner aYahuda afe katsak ne a nye aya a ta nye áner aYahuda kaye̱e̱r riye̱ wu, izhak ife katsak nye izhak ife Kabik ta nye kaye̱e̱r riye̱, sang ife Itsi aMusa baꞌ. Adakunom ne a kerek aner kuri ayong sang anerawe baꞌ. |
© Wycliffe Bible Translators, Inc
Nigeria Bible Translation Trust