aMarkus 6 - Izere New Testament

Aner kuzarap be kuyiik nuwo̱p wu baꞌ

¹ aYeso won karo̱ kayong nong a tú ku bun nuwo̱p wu mak be álimazhiri wu.

² Kunom Asabar tá fa nye ayong a san kubo̱so̱p ánerawe'me kaye̱e̱r kutu aduwa. Ánerawe whe̱re̱ be̱ nong a tú ku foos, azhing tú ku yiir ba ayong áfe ye, “Aner na se̱ ike̱re̱ iyu akye̱? Akye̱ kuri kuren ike̱ng ne a tu no̱o̱k, nong a tin nye ike̱re̱ azhing e̱?

³ Ayu ne a nye akapinta a? Ayu ne a nye igon aMarya aꞌa? Aronyining aYakub be aYusufu ne aZhud be aSiman aꞌa? Ángasnyining se aze mak be yir aꞌa?” Ayong riye̱ ba beseng be wu.

⁴ Ayong aYeso fe̱ be ba ye, “Aner kuzarap be kuyiik koakye, amma kaye̱e̱r kasa wu ne kaye̱e̱r áfe iri wu be kaye̱e̱r kuwo̱p wu tsek ne a be kuyiik baꞌ.”

⁵ aYeso kyem a nye ike̱ng azhing azong baꞌ, ma ke a tin saas ibo̱k natoon ánerawe cie̱k nong á tá te atser.

⁶ A te zhing kamok kuwon dar kuno̱o̱k katsak ba. Ayong aYeso tsang a gorok ne a bo̱so̱p ánerawe'me kaye̱e̱r iwo̱p ikak izhizhe̱k'e.

aYeso tom kuso̱k be afa ame

⁷ Ayong a yis álimazhiri wu kuso̱k be afa ame nong a tú ku tom ba afufa afufa ne a ku no̱o̱k ba kukyem kuturung amaan nabik.

⁸ Ne a fe̱ be ba ye, “Sang tu sok yin ike̱ng ikak kamok kutseng yin'e baꞌ, tú be yin naya, ka ishika, ka itso̱m kaye̱e̱r ishika ares yin baꞌ.

⁹ Tes yin akpatak amma sang tú be yin akpiin afa baꞌ.

¹⁰ Izen iya ne yin no̱ yin nasa kakak, sor yin azong ma izen iya yin tana won yin kuwo̱p'e.

¹¹ Ke áner karo̱'me tá shan yin baꞌ, ka á tá fok yin kuto baꞌ, ne yin re̱ng yin iwur atak yin nizen afe yin tana won yin azong nong i ta sor asheda natoon ba.”

¹² Anong ne á dorok nong á tá se taas anerawe ye á ru shishing kuse ba.

¹³ Á turung ámaan nabik dide̱ng ne á ni kon name na áfe iro̱k whe̱re̱ ne ka sak ba, á tá te atser.

Riku aYohana aner abatisma

¹⁴ Ayong aHiridus fok itak'e, kamok riyerek aYeso tsang ri tseng koake̱. Ma ákak fe̱ ye, “aYohana aner abatisma ne a bun an dorok be kutser. Iyong ne i sak kukyem kunye ike̱re̱ azhing ta se be itomong.”

¹⁵ Ákak fe̱ ye, “Aner'e nye Iliya.” Ne ákak fe̱ ye, “Aner'e nye aner kuzarap akak ze̱e̱r kaye̱e̱r áner kuzarap agbugbang'e.”

¹⁶ Amma nizen iya aHiridus tá fok anong, ayong a fe̱ ye, “Aner'e nye aYohana, aya mi tá te̱n rice wu, ne a mo ku dorok nure̱k!”

¹⁷ aHiridus be rice wu tsang a no̱o̱k Itsi ye, a ra yiir aYohana nong a tú ku te ni itso̱m. A nye anong kamok aHiridus nye kuwe̱ne̱ng be aHirudiya, abining aronyining wu, aFilibus.

¹⁸ Kamok aYohana tsang a yiir kufe̱ be aHiridus, ye, “I nye rine̱n, wan tana sok abining aronyining wan.”

¹⁹ Ayong aHirudiya a yiir be aYohana riye̱, a shim nong a tú ku fe̱r. Amma a kyem baꞌ.

²⁰ Kamok aHiridus fok inyim aYohana, ne a ren ye a nye aner a tá be katsak ne a se zhe̱l. Ayong a tú fek, nizen aHiridus tá fok rife̱ aYohana ne a no̱ nudaam dide̱ng, gip be anong a shim a tá ku fok.

²¹ Ni igang'e aHirudiya se̱ izen makong. Nizen kunye riye̱ rikan kutes aHiridus, a nye naya kamok ágbang áner ne áko̱k kasho̱o̱n ásozha, be áya a tá nye áritek kaye̱e̱r kuwo̱p aGalili.

²² Nizen iya angas aHirudiya'me tá no̱ nong a tá to nato, a kare̱p aHiridus riye̱ be átsen wu ame. Ayong agwo̱m ame fe̱ be kanamang'e ye, “Ni rip koakye ike̱ng iya wan tá shim. Mi tà ka no̱o̱k.”

²³ Ne a shu ye, “Ike̱ng iya wan tá rip, mi tà ka no̱o̱k, ko ribir kaben'i.”

²⁴ Ayong a wuruk nufang nong a ta se rip anyining wu ye, “Akye̱ ne mi ta rip e̱?” Anyining'e fe̱ be wu ye, “Rice aYohana aner abatisma.”

²⁵ Kanamang ame tseng nufe agwo̱m zizirik nong a ta se fe̱ ye, “Mi shim rice aYohana aner abatisma kyo̱o̱rna kaye̱e̱r kures.”

²⁶ Agwo̱m'me daam dide̱ng, amma kamok wu ta tsang a ya kushu nasho̱o̱n átsen'e, a shim a tu ku roon ne baꞌ.

²⁷ Ayong a tom áya a ta nye itomong azong zizirik nong á tá be̱ be rice aYohana. Áner ame tseng nong á ta se te̱n rice aYohana nitso̱m,

²⁸ nong á tá be̱e̱n'e nures. A no̱o̱k kanamang'e, ne kanamang'e no̱o̱k ango̱ wu.

²⁹ Nizen iya álimazhiri aYohana tá fok anong, yong á be̱ á tá be sok kubir kuro̱m'e nong á ta se ne̱r.

aYeso no̱o̱k ánerawe izungu itoon naya

³⁰ Ámanzo aYeso ame tú ku gorok nong á tú ku taas ike̱re̱ iya ba tá nye ne iya ba tá bo̱so̱p cice̱r.

³¹ Kamok ánerawe tá mak whe̱re̱, á be̱s ne á bun á ku burung, ma ámanzo'me kyem á se̱ izen nong á tá yas baꞌ, yong aYeso fe̱ be ba ye, “Be̱ yin, a wan yin nong ta be yir naro̱ ka ta se yu nong ta song yir azong.”

³² Ayong á no̱ kaye̱e̱r kukpara ashi nong á tá tseng naro̱ kakak wu ze̱r.

³³ Amma ánerawe whe̱re̱ áya a tá di ku dorok ba, á tu ren ba, yong á dorok be itsi nong á ta se tsang á ku kuus.

³⁴ Nizen aYeso tá wuruk kaye̱e̱r kukpara ashi'me, a di ánerawe whe̱re̱, yong a fok kuro̱ riye̱ ba, kamok a se kyo̱ndi itsamang dar afek. Ayong a san ku kabo̱so̱p ba ike̱re̱ whe̱re̱.

³⁵ Izen'e se nabas kawheshirim yong álimazhiri wu be̱ nufu nong á ta fe̱ be wu ye, “Yir se yir katse, izen m bo̱ karo̱.

³⁶ Kamok anong won ánerawe'me nong á ta se tse̱r naya kaye̱e̱r iwo̱p iya i ta se bubarak nong á ta shan ike̱ng ikak ife kuya.”

³⁷ Amma aYeso fe̱ be ba ye, “Ku no̱o̱k yin ba ike̱ng ikak nong á ta ya.” Ba fe̱ be wu ye, “Iyu ta sok itso̱m ife̱n ikara aner aya a ta nye itomong! Yir ta sok yir itso̱m anong, nong ta se fe̱r yir natoon abiredi nong tu ku no̱o̱k yir ba nong á ta ya a?”

³⁸ Ayong aYeso tú ku rip ba ye, “aBiredi amang ne yin be yin e̱? Tseng ta se ye̱re̱k yin.” Nizen ba tá di ayong á fe̱ ye, “Ágbang abiredi atoon be izos ifa.”

³⁹ aYeso fe̱ be álimazhiri wu ye, á ra sak ánerawe'me cei nong á tá sosok nagwo̱m iso̱k itutoon natoon agam ashirim.

⁴⁰ Ayong a sak ánerawe'me tá sosok nagwo̱m, ákak kuso̱k inyak ne ákak iso̱k itoon.

⁴¹ aYeso sok ágbang abiredi atoon be ízos ifa ame. Ne a sok rice naza a tá tonong riye̱ rikan be Adakunom. A te̱se̱ng abiredi ame, a tá no̱o̱k álimazhiri wu nong á tá saas ánerawe'me. aYeso bun a tú kasap ba izos ifa ame.

⁴² Cice̱r ba ya ma á whas,

⁴³ ne álimazhiri'me tusung ribir ribir'e cip ma íderse kuso̱k be ifa.

⁴⁴ Áner a tá kuya abiredi'me kuse atek izungu itoon.

aYeso tseng natoon ashi

⁴⁵ Gbashak ne aYeso wor a sak álimazhiri wu tá no̱ kaye̱e̱r kukpara ashi nong á tá tseng na aBatseda nasho̱o̱n wu, nong wu tá ra ma kute ánerawe'me ni iren.

⁴⁶ Nama a tú ku te ba niren'e ne a ngarak natoon kawhanang nong a ta se nye aduwa.

⁴⁷ Kawheshirim tá fa nye ne kukpara ashi se natite kudung, aYeso rusek wu ze̱e̱r natoon rigung'e.

⁴⁸ aYeso tá fa di álimazhiri ta sen so̱ risam nong á ta gor be kukpara ashi ba'me, kamok kuwun tu zim ba. Nabas itso̱m itaar natuk, yong a ti wuruk niba natoon ashi. A tseng kyo̱ndi a tú ku gor ba.

⁴⁹ Amma izen á tú ku di a tá sen tseng natoon ashi'me, ba sor ye itseng, áyong a tang ikun,

⁵⁰ kamok cei ba tú di, inyim tú ro̱ ba. Ayong aYeso fe̱ be ba gbashak ye, “Na ka tsesek yin. Sang tu fok yin inyim baꞌ. Aner'e nye mi.”

⁵¹ Ne a no̱ nukpara ashi'me mak be ba ne kuwun ame nyeseng. Iyong á te ba azhing,

⁵² kamok ba ren ike̱ng ife agbang abiredi ame tá sor baꞌ, kamok ike̱ng'e tu se ba whi kaye̱e̱r aye̱.

⁵³ aYeso be álimazhiri wu tá fa tar agbang kudung'e, á tiik ba niben aGenesaret, a rusom kukpara ashi ba ame azong.

⁵⁴ Kum be kuwuruk ba kaye̱e̱r kukpara ashi ame, ánerawe wor á ren ye aYeso'ong.

⁵⁵ Ayong ánerawe nes niben'e ze̱r ze̱r be itsi nong á tá be̱s'e be áfe iro̱k natoon ike̱re̱ kameneng ba, koakye karo̱ ba tá fok ye aYeso tú ku se.

⁵⁶ Koake̱ ne aYeso no̱, ni iwo̱p izhizhe̱k'e be igbang'e ne ife ikim'me, a se̱s áfe iro̱k ánerawe tan meres na naro̱ rizhik. Á tú nye izong ye, a ru ku won ba nong a ta ras kanu kukpiin wu, ne áya a ta ras cice̱r te atser.