HAKIM–HAKIM 15 - Allah Wene Fano Wene Hupla Inane

Simson ap Filistin mene inom weim yafukwa wene

¹ A'nogo hilingitukwasik inenggi ekhe welagaukwasigen, gandum enggen palharek oba, at Simson wam kambing oan mene misik ekhe waluk agwe wogosigiluk lagaikhe. Lagaikhesik, agwe eisena mel yagatikhe: ”An nagwe ninom ambi asuogeluk oba kwigilugen yagaheti o,” iluk yagatikhe. A'nogo yagatikhe mene at he, agwe eisena a'nogo nen he, ”Fano. Kwin,” iluk yagati'lek kamo isikhe.

² A'nogo kamo isikhesik, Simson mel yagatikhe: ”Haren he, at ebe mondok habiren hilingiti lagen hea, iluk at ebe hat hagaila'lak omanogo mene ekhe wogetimo o. A'nogo hilingitiri'mo re, at elokhe endebat weak hangge mene at he, agot enek he, elokhe mondok fano o. Ma re, agot hat waninogo,” iluk yagatikhe.

³ A'nogo yagatikhemo, aren it mel yagaisasikhe: ”An nen hit afuni Filisitin mene faget hobuk hilingisigin andi ero an weak oba hilingisigin lek. Hit weak oba o,” iluk yagaisasikhe.

⁴ A'nogo yagaisasikhesik, mene olomene hangge mene ebe 300 nen fakfei lagaikhe. A'nogo hilingitikhesik, mene omanogo ebe pirendek lombokhigik agenggum oba esage ibilhu mene faget hele homarik lagaikhe.

⁵ A'nogo hilingfilik lagaikhesik, esage ebe ibilfilik lagaikhesik he, afuni Filistin mene ineabukwe omanogo loageluk obogerisasikhemo, gandum enggen palek welagaikhe mene omanogo mondogat endu ninggi logolik he, gandum inom, anggur inom, zaitun inom, yabukwe yago mene omanogo inomat nasikhe.

⁶ A'nogo nasikhemo, it afuni Filisitin mene nen he, ”Andi sa nen hilingite,” iluk heinok wilik lagaukwa. A'nogo heinok wilik lagunem, afuni ekhe nen he, ”Simson agwe eisena Timna mene a'nogo nen at Simson agaila'lak omanogo mene ekhe wogetemo nen, Simson nen hilingite o,” iluk isukwama, wene a'nogo kogol fuluk lagaukwasikhe it Filistin inap a'nogo nen hele a'nogo inom, awilokwe yi mene ti mene mondogat inom, eisena inom, endu fatukwama inebe inom felelenghogo nasikhe.

⁷ A'nogo hilingitukwama, at Simson nen ap Filisitin mene mel yagaisasikhe: ”Hiren hinobabut a'nogo hilingiti lagep meneat hilingitep higi. An nen hiren ninoatep mene andi inunggulmo hinoati'lek halok, an nen ungguulmo figi'lek logou re nabit,” iluk hombuk palogo yagaisasikhe.

⁸ A'nogo yagaisasikhesik, hobuk a'mageba it afuni Filisitin mene inoasigiluk lagaikhesik inebe hokhorogo inoatikhe. A'nogo inoa'luk, at ebe punu enu Etam oba andoma wagaikhesik oumo hinago welagaikhe.

Simson nen afuni Filisitin mene mabenet fisaluk inoati lagaikhe wene

⁹ At Simson a'nogo hina'lasi wagaikhesik werek kwelek, ap Filisitin mene afuni Yehuda inaiba wagaukwasik he, inawi tenda mene andoma wutukwa. A'nogo wutukwasik, o kota Lehi kwe yagarinafukwa.

¹⁰ A'nogo yagarinafukwama, afuni Yehuda mene nen he, ”Hiren nit ninoasuogeluk kwe yagatninafep andi, nenahalok?” iluk heinok wogisasukwama, iren he, ”Nit he, at Simson nen nit hilingninabi'lago andi hak hilingisuogeluk ebe fakfouwogeluk wago o,” iluk yagaisasukwa.

¹¹ A'nogo yagaisasukwama, afuni Yehuda mene inesanggo holhukwasik he, ap inebe 3.000 nen logalfesukwasik punu Etam andoma at Simson ebe oumo were'ma oba lagaukwasik he, mel yagatukwa: ”Afuni Filisitin mene nen nit fetninarek werek a'nogo honggot agendik yoma welagen a? Haren nit ninggi'nogo halok a'nogo hilingninafi lagen?” iluk yagatukwa. A'nogo yagatukwama, at Simson nen he, ”An he, we it afuni Filisitin mene nen an lalnafa andi nen onggo feigiluk hilingiti lagi o,” iluk yagaisasikhe.

¹² A'nogo yagaisasikhemo, it ap omanogo nen he, ”Nit he, hat henggi hele warogo afuni Filisitin mene wogisa louwogeluk wago o,” iluk yagatukwa. A'nogo yagatukwama, at Simson nen he, ”Hiren he, niren hat hoasugun mondok lego, iluk hombuk tak palini o,” iluk yagaisasikhemo iren he,

¹³ ”Fano. Niren hat hebe hoasugun mondok lego. We, henggi hele nek warogo hebe afuni Filisitin mene wogisouwogeluk wago o,” iluk yagatukwa. A'nogo yagatukwasik, Simson ebe hele pire ket palek meneba enggi hele homatukwasik, oumo andoma nen waluk wagaukwa.

¹⁴ At Simson ebe a'nogo hele homagaisogo waluk o Lehi wagaukwama, afuni Filisitin mene at oba kwikhi logolik, inane a'mit sup isukwasik kwisukwa. A'nogo kwisukwama, aremnogoat Tuhan omame at Simson wogotikhemo omame agaikhesik, enggi hele homatukwa mene a'nogo hele, we, halinonggo mene hakhogo tekhogo lagaikhe.

¹⁵ A'nogo tekhogo lagaikhemo hasukwasik, wam keledai misigat mene kerat wa'lagaikhe mene agaukwak oak heragaisogo wanhikhesik he, andiba afuni inebe 1.000 nen pinggi inoatikhe.

¹⁶ A'nogo inoatikhesik, wuni yi'nogo watikhe: ”Keledai agaukwak oak oba re ap inebe 1.000 mene inoati, keledai agaukwak oak oba re, inebe warek al sagalogo fisigi, iluk wuni watikhe,

¹⁷ Wuni a'nogo watikhesik, wam keledai agaukwak oak a'nogo woukhogo lakfisasikhe. A'nogo lakfisasikhe andi nen o andoma enu Aramat-Lehi, iluk salhukwa.

¹⁸ Hobuk at Simson endawimo i nele hokho agaikhemo, ane hokhorogo Tuhan mel yagatikhe: ”Tuhan neisena. An hamlogo nomame asuageluk yogondak yaat hilingnafenma, afuni inebe mondok hokhorogo mabenet fisigirik inoati meneat he, yogondak an i nele nen wa'lasumo afuni Filisitin mene hat hebe inonggot mene yoma nen, an nebe warek fa'nobagagun he nabiro, neisena,” iluk yagatikhe.

¹⁹ A'nogo yagatikhemo, at Allah nen he, helep tom o Lehi andoma mene anggwe folelfesikhemo, i elesi wulibi wagaikhemo, at Simson nasikhesik, attak welagaikhe hak oba yamuk isikhe. A'nogo hilinglagaikhe andi nen i elesi andi enu, ”I Hakot elesi wulibi wagarek oba,” iluk salhukwa. I elesi andi yogondak o Lehi andoma wulibi wagu mondogat werek.

²⁰ Afuni Filisitin mene nen Israel mene inawe a'ma ferinarek were'ma, at Simson afuni Israel mene inoe kain ferinarek logolik 20 tahun welagaikhe.