Psalms 8 - Keley-i Bible (Antipolo Ifugao)

Ya a-appeh David ni kameunnudin gitalah ni meidwat etan ni kamengipappangnguluddan kaman-a-appeh

¹ Apu Dios e Ap-apu mi, kameang-ang hu kasina-gey mud emin di hipan wadad puyek. Ya muka keidaydayawi ey endi kei-ingngehan tu, tep anin di kabunyan et hi-gam hu kameiddeyyaw.

² Anin idan u-ungnga niyadda geggellang et netuttudduan idan kayyaggud ni pandaydayaw ni hi-gam. Ey gapu tep ya et-eteng ni kabaelan mu ey nelakah mun pesikked hu ngehay idan buhul mu et meapput ida.

³ Hedin intangaw kud kabunyan, et inang-ang ku hu lintum ni bulan niyadda bittuwen ni inha-ad mud neiha-dan da,

⁴ ey kangkud nemnem kuy kaw hipa ngu anhan ida tuu et mudda kanemnemnema niya mudda kaipapaptek?

⁵ Lintum idan nebabbabah ni ekket nem yadda anghel, nem nekemtang ni ebuh. Ey impedaydayaw mudda,

⁶ niya pinutuk muddan pan-ap-apun emin ni lintum,

⁷ heniddan kalneroh, yadda baka, yadda edum ni kaman-ayyam di puyek,

⁸ yadda sisit, yadda deleg niyadda edum ni kaman-ayyam di baybay.

⁹ Apu Dios e Apu mi, makulug ni kameang-ang di emin ni hipan wada eyad puyek hu kasina-gey mu.