Юнус 4 - Һазирқи Заман Уйғурчә Тәрҗимиси

Юнус пәйғәмбәрниң Худаниң көрсәткән меһир-шәпқитигә аччиқлиниши

¹ Юнус бу иштин толиму нарази болуп, наһайити аччиқланди.

² Шуңа у Пәрвәрдигарға мундақ деди: — Әй Пәрвәрдигар, өз жутумда турғинимда Сениң шундақ қилидиғанлиғиңни өз-өзәмгә ейтмиғанмидим? Мән Сениң интайин меһриван вә рәһимдил Худа екәнлигиңни биләттим. Сән асанлиқчә ғәзәпләнмәйсән, меһир-муһәббәткә толғансән. Балаю-апәт кәлтүрүштин йенивалидиғанлиғиңни биләттим. Шуңа Испаниягә қачмиғанмидим?

³ Әнди, әй Пәрвәрдигар, җенимни алғин! Тирик яшиғинимдин өлгиним яхши!

⁴ Пәрвәрдигар униңға җававән: — Аччиқлинишиң тоғриму? — деди.

⁵ Шуниң билән Юнус шәһәрниң сиртиға чиқип, шәһәрниң шәриқ тәрипидә олтарди. У бир кәпә ясап, униң сайисида олтирип, Нинәви шәһиридә немә вақиә йүз беридиғанлиғини күтти.

⁶ Пәрвәрдигар Худа Юнусни көңүл беарамлиғидин қутулдуруш үчүн бир қапақ пәлигини үндүрүп, Юнусниң бешиға сайә болсун дәп, униң үсти тәрипигә йейилдурди. Юнус болса қапақ пәлиги үчүн интайин хуш болди.

⁷ Лекин әтиси әтигәндә Худа Өзи бир қурутни әвәтти. Бу қурут келип, қапақ пәлигини йәп, уни кесип қурутувәтти.

⁸ Күн чиққанда, Худа күн чиқиш тәрәптин иссиқ шамал чиқарған еди, қизиқ аптап Юнусниң бешиға чүшүп, уни һалидин кәткүзди. Шуңа у өлүмни тиләп: «Тирик яшиғинимдин өлгиним яхши!» деди.

⁹ Лекин Худа униңдин: — Сениң бу қапақ пәлиги үчүн аччиқлинишиң тоғриму? — дәп сориди. — Һә-ә, аччиғимда өлгүдәк болуп қалдим! — дәп җавап бәрди Юнус.

¹⁰ Пәрвәрдигар униңға: — Сән өзәң йә өстүрмәй, йә униңға әмгәк сиңдүрмәй, бир кечидә өсүп, иккинчи кечиси йоқ болуп кәткән бир түп қапақ пәлигигә шунчә ичиң ағриған йәрдә,

¹¹ Мән ақ-қарини пәриқләндүрәлмәйдиған бир йүз жигирмә миң адими вә нурғун һайванлири бар Нинәвидәк чоң шәһәргә ич ағритмай тураламдим? — деди.