Юнус 2 - Һазирқи Заман Уйғурчә Тәрҗимиси

Юнус пәйғәмбәрниң дуаси

¹ Пәрвәрдигар йоған бир белиқни Юнусни жутувелишқа әвәткән еди. Юнус белиқниң қосиғида үч кечә-күндүз болди.

² Юнус белиқниң қосиғида өз Худаси болған Пәрвәрдигарға мундақ дуа қилди:

³ Қийин-қистақта қалғинимда, Пәрвәрдигарға налә қилдим, У маңа қулақ салди. Өлүкләр дияриниң чоңқур йеридин пәрият чәктим, Сән мениң наләмгә қулақ салдиң.

⁴ Сән мени чоңқур деңизниң тегигә ташлидиң, Күчлүк сулар мени қоршавалди, Долқунлириң, өркәшлириң үстүмдин бесип өтти.

⁵ Мундақ дедим шу пәйттә: Мән Сениң нәзәриңдин ташлинип кәттим, Лекин йәнә муқәддәс ибадәтханаңни көримән.

⁶ Сулар мени җенимни алғидәк қоршавалди, Өркәшләр оравалди, Деңиздики от-чөпләр бешимни чирмавалди.

⁷ Деңиздики тағларниң һуллириға чөкүп кәттим, Чиқиш йоллири мәңгүгә етилгән җайға. Лекин, әй Пәрвәрдигар, Худайим, Җенимни өлүкләр дияридин Өзәң қутқузувалдиң.

⁸ Җеним чиқип кетәй дегәндә, Әй Пәрвәрдигар, Сени яд әттим. Дуайим Саңа йәтти, Сениң муқәддәс ибадәтханаңға.

⁹ Әрзимәс бутларға ибадәт қилидиғанлар Пәрвәрдигарниң меһир-муһәббитини тәрк етәр/рәт қилар.

¹⁰ Лекин мән болсам Саңа сунармән, Шүкүрләр билән қурванлиқлар. Қилған қәсәмлиримгә вапа қилармән, Чүнки қутқузулуш Пәрвәрдигардинла келәр.

¹¹ Шуниң билән Пәрвәрдигар һелиқи белиққа буйруқ қилған еди, белиқ Юнусни қуруқлуққа қусуп чиқарди.