२ थेसलोनिकी 2 - ह्योल्मोतिहक्पागी मिह 1 आदा-नो़ह दाङ आज्यी-नुहमुया़, ओहराङगी चो़वो येशू मास्यीका येहपाराङ फेप नाङज्ये येह ओहले मिहरोला थुज्येला ओहराङ ङ्याम्बुराङ जोम्गेन्गी तेहन्दाला ङ्यिह राहङ फ़ेबे-म़ेहमेया़ला ओहर-छ्य़े स्युहउ येहबा, 2 लाहलागी नाम्स्यी लाहमले, लाहलागी सुङ लाहमले ओहले लाहलागी ङ्यिहती ल़ेहमुराङ यिह लाहमले चो़वोकी ङ्यिहमा लेप सिहन्दी येह म़ेदी स्य़ेसीन माना, ओ़ह केच्या थे़दी ख्या फे़बे मे़हमेया़की सेम मा़हन्ज्यीज्यु ओहले का माहक्याहल्ज्यु। 3 यिहॱनाङ ख्याला सुज्यीगीॱआङ काह-ठि पेहतीॱआङ गो़ कोर मा़हखुज्यु। किन्ज्योला टाह पेहती छ्यिम्बु ठ़ूस्यी सिहङदा माहकाहल थु ओहले तोङ कोहएँ पे यिहॱना़: छ्य़े-ठिम गोम्गे मिह माहयोहङ थु चो़वोकी ङ्यिहमा लेप्च्ये म़ेह। 4 ओहले मिहया़गी किन्ज्यो म़ेदी चा़ पेहक्यो थाम्ज्यीला ओहले छ्येपा फुल्गेन्गी थाम्ज्यीराङ से़हया़ला खोगी टाह पेहच्ये येह ओहले ओ़ह से़हया़ला म़ेदीॱआङ खोगी राहङगी राहङलाराङ चा़ छ्यिम्बु ज़ोज्ये येह, ओहले खोगी राहङगी राहङलाराङ किन्ज्यो यिहम्बा म़ेदी क्याहल्ज्ये येह ओहले खो किन्ज्योकी छ्योखाङ नाहङला तेहच्ये येह। 5 च्यि ख्या फ़ेबे-म़ेहमेया़ला टेहम्बा म़ेहबा ले? ङाह ख्या फ़ेबे-म़ेहमेॱया ङ्याम्बु तेहकेमुॱराङ ङाहगी दि तामया़ माक्यो येहकें। 6 ओ़ह राहङगी ती़हजीला थेन ओहङज्यु म़ेदी का़हन्दीगी ओ़हदीला नाहरे थु का़दी ज़्या़दी येहबा, दिनी राहङ फ़ेबे-म़ेहमेया़ला थुयी़राङ येहबा। 7 ओ़ह छ्य़े-ठिम गोम्गेन्दीगी राहङगी ल़ेहया़ नाहङदा-नाहङॱराङ पेहच्ये छू़-सीहन्दी येह। ओहले नाहरे थु कू़हदे ज़्या़गेन्दी खोगी लाहमले थेन्दी माहकाहल थु ओ़हदीला का़दीॱराङ ज़्या़ज्ये येह। 8 ओ़ह तिङले तिहक्पागी मिह थेन ओहङज्ये येह, ओहले खोला चो़वो येशूगी राहङगी स्याहलकी उगी तोङ च्य़ू नाङज्ये येह, मिहरो फेप नाङगेन क्या-साङे येहसेरगी खोला तोङ च्य़ू नाङज्ये येह। 9 ओ़ह छ्य़े-ठिम गोम्गेन्दीगी ती़ह गो-छ्येवागी ओङ लेहन्दी ओहङज्ये येह ओहले खोगी नामे नाजो चिहन क्याहप्ती ताक्छेनया़ तेन्ज्ये येह ओहले याहम्जेम्बागी ल़ेहया़ पेहच्ये येह। 10 तोङदी डोएँया़ला चिहन क्याहप्च्येला खो थाम्ज्यी ती़हया़ ङ्याम्बु ओहङज्ये येह, च्यिबेमाना खुङया़गी तेहन्दामकी स्याहलला चेवा माहबे ओहले खुङया़गी थार्पाॱआङ ज्योर मा़हखु। 11 ओ़ह सोङबे खुङया़गी चिहन क्याहप्केन्गी तामया़ला यिह छ्य़ेज्यु म़ेदी किन्ज्योगी खुङया़ थो़ला ओङज्या छ्यिम्बुगी गो़ कोर च्य़ूएँगी स़ेह च्यी़ ताङ नाङज्ये येह। 12 ओ़ह सोङबे खुङया़गी तेहन्दामकी स्याहलला यिह मा़हछ्ये, यिहॱनाङ चोक्पा ल़ेहया़ पेहच्येलाॱराङ खुङया़ला या़हबु ऩेसीन। ओ़ह सोङबे खुङया़ला ङ्य़ेहबा फो़सीन। थार्पागी तेहन्दाला दाम नाङग्योया़ 13 चो़वोगी चेवा जे नाङग्योकी आदा-नो़ह दाङ आज्यी-नुहमुया़, राहङ फ़ेबे-म़ेहमेया़गी तेहन्दाला ङ्यिहगी नाहम माॱनाङ किन्ज्योला थुज्यी-छ्ये़ फुलॱराङ कोहएँ च्यिबेमाना तोहङ यिहन्ज्युराङ नाम्पार-ताहक्पा थुगी टाहङबु ज़ोएँगी ल़ेह लाहमले ओहले तेहन्दामकी स्याहल थो़ला तेहपा पेहती थार्च्येला किन्ज्योगी राहङ फ़ेबे-म़ेहमेया़ला दाम नाङसीन। 14 दिगी तेहन्दालाराङ ओहराङगी स्येक्योगी या़हबु लेहङगु लाहमले ओहराङगी चो़वो येशू मास्यीकाकी ज़िज्यिद राहङ फ़ेबे-म़ेहमेया़गी ज्योर ख़ूज्यु म़ेदी किन्ज्योगी राहङ फ़ेबे-म़ेहमेया़ला क़े क्याहप नाङग्यो यिहम्बा। 15 ओ़ह सोङबे आदा-नो़ह दाङ आज्यी-नुहमुया़, ङ्यिहगी राहङ फ़ेबे-म़ेहमेया़ला स्ये़क्योकी ताम दाङ यिहगी लाहमले राहङ फ़ेबे-म़ेहमेया़गी ज्योरक्योकी लुहङला ठे-टेहती ज़्य़ू नाङदोङ। 16 ता़ह ओहराङला चेवा जे नाङगे दाङ काटीन लाहमले था़ म़ेहबाकी सेम-स्युक दाङ ज्यिबुराङ या़हबु रेहवा नाङगेन ओहराङ चो़वो येशू मास्यीका दाङ किन्ज्यो याहप राहङगीराङ, 17 ख्या फ़ेबे-म़ेहमेया़ला सेम ज़ुङ च्य़ू नाङज्यु ओहले ना थाम्ज्यीराङ या़हबु ल़ेहया़ दाङ किन्ज्योकी सुङला राहङ फ़ेबे-म़ेहमेया़ला थिक-चि पेहती ज़्या़ नाङज्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.