Yohan 9 - Gvray Shànshér Mòngkà Kagvp Àngshv́r

Nemàn dvba:nò we

¹ Yesu di dvgvp, gv̀l daqà ni kèní nemàn tiqpè À:ngí yv̀ng bǿà.

² Wekvt Àng coqcv́nrìí, “Rabiá, vsv̀ng yapè gà:lò ni kèní ne vmàn lòng nø, kagǿ mvrà rvt í má? Àng mvrà rvt í má? Mø̀íni àngpè àngmèní mvrà rvt í má?” wa rø:tnòe.

³ Yesuí, “Àng mvrà rvt gø, àngpè àngmèní mvrà rvt gø mø̀í. Àng taqkèní Gvray jórnònggùn dvtanlv́m dvpvt mv̀ng íe.

⁴ Àngni shini gá dvgvp Ngà sv̀ng dèzv́r dakngà pè bv̀nlìrì nøngmaqí wá mvn ràe. Kagǿ gø bv̀nlì wá mvlúnshì we yaqdø̀ng tuq rae.

⁵ Rvgaq tø̀mø Ngà vl dvgvp, Ngà nø rvgaq gálòng ǿngàe,” wa vtá:nòe.

⁶ Yadø shø̀:nò dá:ngí, vba tø̀m sv̀ng tøl tølshì nø̀ tø:lí tìkwè wàòe. Tìkwè welù:ngí àng vne ma:tnaòe.

⁷ Wekvt àng sv̀ng, “Silom Tìdøm yv́ngsv̀ng èdi nø̀ èzv́lshìvm,” a:lòe. (“Silom” nø “Dvzv́rshaq” wa kà íe). Àng dìá:mì nø̀ zv́lshì bǿì kvt, vne yvngshì bǿì nø̀ loá:mì.

⁸ Chø̀m shvnvngrì nv̀ng àng nø vzv̀ng dvgvp røtnvm pè í we vyv́ngshaq rìí, “Yapè nø rung nø̀ røtnvm pè mø̀í má?” wae.

⁹ Tiqmaqí nø, “Wepè íe,” wae. Dvgá tiqmaqí nø, “Mø̀í, àng dø vshv́m we tiqpè íe,” wae. Íwe àng nø, “Ngà ni ǿngàe,” wa shǿn mvnshìe.

¹⁰ Àngmaqí, “Íni, nà vne nø kadøwa èyvngshì bǿì má?” wa rø:tnòe.

¹¹ À:ngí, “Yesu a:lò pèí tìkwè wàò nø̀, ngà vne èmatnang dá:ngí, ‘Silom Tìdøm yv́ngsv̀ng èdi nø̀ èzv́lshìvm,’ èvle. Wervt ngà døngv́mà nø̀ zv́lshø̀ng kvt yv̀ng lóngà,” wa vtá:nòe.

¹² Àngmaqí, “Àng kayv́ng vl má?” wa rø:tnòe. “Mvshángò,” wa àng vtv́nshìe.

¹³ Wekvt àngmaqí nemàn ívp pè kaq Parisirì yv́ngsv̀ng shøl bǿà.

¹⁴ Yesuí tìkwè wàò nø̀ àng vne dvba:naò ni nø Narni íe.

¹⁵ Wervt Parisirìí gø kadøwa àng vne yvngshìa:pmì lòng rø:tnòe. “À:ngí ngà vne taq tìkwèí èmatnang bǿngà nø̀, zv́lshø̀ng bǿngà kvt vneí yv̀ng lóngà,” wa à:ngí a:lòe.

¹⁶ Parisirì tiqmaqí, “Vsv̀ng yapè nø Narni dvrá mvcv̀n rvtnø̀, Gvray yv́ngkèní mø̀í,” wae. Íwe dvgá tiqmaq nø, “Mvrà vl vsàngí yadø í we vtiqlv́m bv̀nlìrì kadøwa wá ngutshì má?” wae. Wekvt àngmaq dvhø̀ vzø̀ng lú:ngì.

¹⁷ Àngmaqí vrá tiqkvt nemànpè sv̀ng, “Íni nà vne dèbana bǿì pè nø kagǿ íe èwa má?” wa rø:tnòe. Wepèí, “Àng nø kàdvtutshú íe,” a:lòe.

¹⁸ Wepè nø nemàn í nø̀ ne yvngshì lú:ngì lòng sv̀ng Yuda vsv̀ng shølshúrì mvkv́m. Wervt, àngpè àngmèní sv̀ng goò dá:ngí,

¹⁹ “Gv̀l daqà ni kèní nemàn íe, wa èshø̀nshò we yapè nø nàní cè íe má? Íni akvt kadøwa àng vne yvngshì lú:ngì má?” wa rø:tnòe.

²⁰ Àngpè àngmèníí, “Yapè nø ngàní cè í we nv̀ng àng nø gv̀l daqà ni kèní nemàn í we sháshòe.

²¹ Íwe, akvt kadøwa àng vne yvngshì lú:ngì we nv̀ng kagǿí àng vne dvbana bǿà we mvsháshò. Àng sv̀ng èrøtnø̀ng. Àng nø vbat téá:mì rvt àng vdè shǿnshì longe,” wa vtá:nòe.

²² Àngpè àngmèní yadø shø̀n we nø, Yuda vsv̀ng shølshúrì kaq svre rvt íe. Kadø íe wani Yesu nø Kristu íe, wa vchà:ngò we kagǿ ínìgø júrøt chø̀m kèní lùnglv́m rvt, Yuda vsv̀ng shølshúrì vrashìshaq íe.

²³ Wervt àngpè àngmèníí, “Àng nø vbat téá:mì. Àng sv̀ng èrøtnø̀ng,” a:lò we íe.

²⁴ Nemàn ívp pè sv̀ng àngmaqí vníbaq wabaq goa:tnà nø̀, àng sv̀ng, “Kàdøng èshø̀n weí Gvray dvgùng shèri:ngò. Vsv̀ng yapè nø mvrà vl vsv̀ng í we nøngmaqí sháìe,” a:lòe.

²⁵ À:ngí, “Àng nø mvrà vl vsv̀ng í mø̀í we ngàí mvshángò. Ngàí shángò we tiqlòng nø, ngà nemàn yv́ngkèní akvt vneí yv̀ng lóngà lòng íe,” wa vtá:nòe.

²⁶ Wekvt àngmaqí àng sv̀ng, “À:ngí kapà èwáa bǿì má? À:ngí nà vne kadø dèban bǿì má?” wa rø:tnòe.

²⁷ À:ngí, “Akvtni nàmaq sv̀ng shø̀n bǿngànø̀ng gø, nàmaqí mètánø̀ng. Pàwá vrá tiqkvt tá mèyǿnø̀nge lè? Nàmaq gø Àng coqcv́n wáshì mèyǿnø̀ng má?” wa vtá:nòe.

²⁸ Wekvt àngmaq dvrøq sórí, “Nà mv̀ng Àng coqcv́n èíe. Nøngmaq nø Moshi coqcv́nrì íshàe.

²⁹ Moshi sv̀ng Gvray kà shø̀n yà:ngì we nøngmaqí sháìe. Íwe yapè nø kayv́ng kèní í we gø mvsháì,” a:lòe.

³⁰ Wepèí, “À:ngí ngà vne dèban bǿngànø̀ng gø, Àng kayv́ng kèní í we nàmaqí mèshánø̀ng rvt yalòng mv̀ng vtiqrà íe dvwvng lá!

³¹ Mvrà vl vsv̀ng kà nø Gvrayí mvtáa we sháìe. Gvray kaq vpǿ svre nø̀ Àng nøt cv̀n gǿ kà mv̀ng À:ngí táaòe.

³² Gv̀l daqà ni kèní nemàn í we tiqgǿ sv̀ng tiqgǿ gǿí ne dvba:naò we nø rvgaq pá:nò ni kèní, kagǿí gø kadvgvp gø mvtá dá:rì.

³³ Vsv̀ng yapè nø Gvray yv́ngkèní mø̀í nìnø, À:ngí kapà gø wá mvlú:nò,” wa a:lòe.

³⁴ Wekvt àngmaqí, “Nà nø mvrà vdòngø ègv̀l daqì we tiq dvrá:tní nøngmaq sv̀ng shèngøtshàe má?” a:lò nø̀ àng sv̀ng lùng bǿà.

³⁵ Wepè kaq lùng bǿà we sv̀ng Yesuí tá bǿà. Wemèpvng Yesuí àng sv̀ng lá lún bǿà nìnø, “Vsv̀ng Àngcèpè sv̀ng nà èkv́me má?” wa rø:tnòe.

³⁶ À:ngí, “Vshaqpèá, Àng sv̀ng ngà kv́mlv́m dvpvt Àng kagǿ í we dètángà,” wa vtá:nòe.

³⁷ Yesuí àng sv̀ng, “Nàí Àng kaq vyv́ngshaq íe. Àng nø akvt nà nv̀ng kà dvmv̀n pè íe,” a:lòe.

³⁸ Wekvt à:ngí, “Kàngpèá, ngà kv́me,” wa nø̀ Àng sv̀ng noqòe.

³⁹ Yesuí, “Vne mvyvngshì rì yvngshìlv́m nv̀ng, vne yvngshì rì mvyvngshìvm dø kàngé we vhǿmlv́m dvpvt rvgaq tø̀m sv̀ng Ngà dø̀ng dakngà,” a:lòe.

⁴⁰ Àng shvnvng vl we Parisirì tiqmaqí yadv́ng pv̀n tá bǿà kvt Àng sv̀ng, “Íni, nøngmaq gø nemàn íshà má?” a:lòe.

⁴¹ Yesuí, “Nàmaq nø nemàn èínø̀ng nìnø, mvrà mèv̀lnø̀ngni we íe. Ínìgø, ‘Vne yvngshàìe,’ èwanø̀ng rvt, nàmaq mvrà nø v́ldv̀ng wae,” a:lòe.